ചെന്നൈ: ഏകദിന ലോകകപ്പിലെ ജീവന്മരണ പോരാട്ടത്തിൽ ദക്ഷിണാഫ്രിക്കയ്‌ക്കെതിരെ 271 റൺസ് വിജയലക്ഷ്യം കുറിച്ച് പാക്കിസ്ഥാൻ. ചെന്നൈ, എം എ ചിദംബരം സ്റ്റഡിയത്തിൽ ടോസ് നേടി ബാറ്റിങ് തിരഞ്ഞെടുത്ത പാക്കിസ്ഥാൻ 46.4 ഓവറിൽ എല്ലാവരും പുറത്തായി. നാല് വിക്കറ്റ് നേടിയ ടബ്രൈസ് ഷംസിയാണ് പാക്കിസ്ഥാനെ നിയന്ത്രിച്ചുനിർത്തിയത്. മാർക്കോ ജാൻസന് മൂന്ന് വിക്കറ്റുണ്ട്. സൗദ് ഷക്കീൽ (52), ബാബർ അസം (50), ഷദാബ് ഖാൻ (43) എന്നിവരാണ് പാക്കിസ്ഥാന്റെ പ്രധാന സ്‌കോറർമാർ. ഒരു തോൽവി പാക്കിസ്ഥാന്റെ സെമി സാധ്യതകൾ പ്രശ്നത്തിലാക്കും.

പതിഞ്ഞ തുടക്കമായിരുന്നു പാക്കിസ്ഥാന്റേത്. ആദ്യ ഏഴ് ഓവറിനുള്ളിൽ തന്നെ ഓപ്പണർമാരായ ഇമാമുൾഹഖിന്റെയും (18 പന്തിൽ 12) ഷഫീക്കിന്റെയും (17 പന്തിൽ 9) വിക്കറ്റുകൾ നഷ്ടമായി. മുഹമ്മദ് റിസ്വാൻ 27 പന്തിൽ 31 റൺസ് നേടി പുറത്തായി. ഇഫ്തിക്കർ അഹമ്മദിനും (31 പന്തിൽ 21) അധിക നേരം പിടിച്ചുനീക്കാനായില്ല. ബാബർ കൂടാരം കയറിയതിന് പിന്നാലെ ആറാം വിക്കറ്റിൽ ഒത്തുചേർന്ന സൗദ് ഷക്കീൽ ഷദാബ് ഖാൻ (36 പന്തിൽ 43 റൺസ്) സഖ്യമാണ് പിന്നീട് പാക് നിരയെ കരകയറ്റിയത്.

38 റൺസെടുക്കുന്നതിനിടെ അവർക്ക് ഓപ്പണർമാരായ അബ്ദുള്ള ഷെഫീഖ് (9), ഇമാം ഉൾ ഹഖ് (12) എന്നിവരുടെ വിക്കറ്റുകൾ നഷ്ടമായി. ജാൻസനാണ് ഇരുവരേയും മടക്കിയത്. നാലാം വിക്കറ്റിൽ ബാബർ - മുഹമ്മദ് റിസ്വാൻ (27 പന്തിൽ 31) സഖ്യം 48 റൺസ് കൂട്ടിചേർത്തു. എന്നാൽ റിസ്വാൻ ജെറാൾഡ് കോട്സീയുടെ പന്തിൽ ക്വിന്റൺ ഡി കോക്കിന് ക്യാച്ച് നൽകി. പിന്നീട് പാക്കിസ്ഥാൻ മധ്യനിര ഷംസി തകർത്തെറിഞ്ഞു.

ഇഫ്തിഖർ അഹമ്മദിനെയാണ് (21) ഷംസി ആദ്യം മടങ്ങുന്നത്. പിന്നാലെ ബാബറിനേയും തിരിച്ചയച്ചു. നാല് ഫോറും ഒരു സിക്സും ഉൾപ്പെടുന്നതായിരുന്നു ഇന്നിങ്സ്. ഇതോടെ അഞ്ചിന് 141 എന്ന നിലയിലായി പാക്കിസ്ഥാൻ. എന്നാൽ ഷദാബിനെ കൂട്ടുപിടിച്ച് ഷക്കീൽ രക്ഷാപ്രവർത്തനം നടത്തി. ഇരുവരും 84 റൺസ് കൂട്ടിചേർത്തു. എന്നാൽ ഷദാബിനെ പുറത്താക്കി കോട്സീ ബ്രേക്ക് ത്രൂ നൽകി.

ഷക്കീലിനെ ഷംസിയും മടക്കി. ഷഹീൻ അഫ്രീദിയെ കൂടി പുറത്താക്കി ഷംസി നാല് വിക്കറ്റ് പൂർത്തിയാക്കി. ഇതിനിടെ മുഹമ്മദ് നവാസിന്റെ 24 റൺസ് 250 കടക്കാൻ സഹായിച്ചു. മുഹമ്മദ് വസീമാണ് (7) പുറത്തായ മറ്റൊരു താരം. ഹാരിസ് റൗഫ് (0) പുറത്താവാതെ നിന്നു.

അഫ്ഗാനിസ്ഥാനെതിരെ തോറ്റ ടീമിൽ രണ്ട് മാറ്റങ്ങളുമായാണ് പാക്കിസ്ഥാൻ ഇന്ന് ദക്ഷിണാഫ്രിക്കക്കെതിരെ ഇറങ്ങുന്നത്. അസുഖ ബാധിതനായ പേസർ ഹസൻ അലിക്ക് പകരം വസീം ജൂനിയറും ഉസ്മാൻ മിറിന് പകരം മുഹമ്മദ് നവാസും പാക്കിസ്ഥാന്റെ അന്തിമ ഇലവനിലെത്തി. ദക്ഷിണാഫ്രിക്കൻ ടീമിൽ ക്യാപ്റ്റനായി ബവൂമ മടങ്ങിയെത്തി. ബവൂമക്ക് പുറമെ ടബ്രൈസ് ഷംസിയും ലുങ്കി എങ്കിഡിയും ദക്ഷിണാഫ്രിക്കയുടെ അന്തിമ ഇലവനിലെത്തിയപ്പോൾ റീസ ഹെൻഡ്രിക്സും കാഗിസോ റബാഡയും ലിസാർഡ് വില്യസും പുറത്തായി.

സ്പോർട്സ് ഡെസ്ക്

    സ്പോർട്സ് ഡെസ്ക്