തിരുവനന്തപുരം: രഞ്ജി ട്രോഫി ക്രിക്കറ്റിൽ രോഹൻ പ്രേമിന്റെ മിന്നുന്ന സെഞ്ചുറിയുടെ മികവിൽ ഗോവയ്ക്കെതിരെ കേരളം ഭേദപ്പെട്ട നിലയിൽ. തുമ്പ, സെന്റ് സേവ്യേഴ്സ് ഗ്രൗണ്ടിൽ ടോസ് നേടി ബാറ്റിങ് തിരഞ്ഞെടുത്ത കേരളം ആദ്യദിനം സ്റ്റംപെടുക്കുമ്പോൾ അഞ്ച് വിക്കറ്റ് നഷ്ടത്തിൽ 247 റൺസെടുത്തിട്ടുണ്ട്.

രോഹൻ പ്രേമിന്റെ (പുറത്താവാതെ 112) തകർപ്പൻ ഇന്നിങ്്സാണ് കേരളത്തെ മികച്ച സ്‌കോറിലേക്ക് നയിച്ചത്. സഞ്ജുവിന്റെ അഭാവത്തിൽ ടീമിനെ നയിക്കുന്ന സിജോമോൻ ജോസഫ് (2) ക്രീസിലുണ്ട്. ശുഭം ദേശായി ഗോവയ്ക്ക് വേണ്ടി രണ്ട് വിക്കറ്റ് വീഴ്‌ത്തി.

14 ഓവറുകൾ എറിഞ്ഞെങ്കിലും ഗോവയ്ക്ക് വേണ്ടി കളിക്കുന്ന ക്രിക്കറ്റ് ഇതിഹാസം സച്ചിൻ ടെൻഡുൽക്കറുടെ മകൻ അർജുൻ ടെൻഡുൽക്കർക്ക് വിക്കറ്റൊന്നും നേടാൻ സാധിച്ചില്ല.

കേരളത്തിന്റെ തുടക്കം തകർച്ചയോടെയായിരുന്നു. സ്‌കോർബോർഡിൽ 25 റൺസുള്ളപ്പോൾ രോഹൻ കുന്നുമ്മലിന്റെ (20) വിക്കറ്റ് കേരളത്തിന് നഷ്ടമായി. മൂന്നാമനായി ക്രീസിലെത്തിയത് രോഹൻ പ്രേം. പി രാഹുലിനൊപ്പം 49 റൺസ് കൂട്ടിചേർക്കാൻ രോഹനായി. എന്നാൽ രാഹുലിനെ പുറത്താക്കി ശുഭം ഗോവയ്ക്ക് ബ്രേക്ക് ത്രൂ നൽകി.

നാലാമനായി ക്രീസിലെത്തിയ സച്ചിൻ ബേബിക്ക് (46) മികച്ച തുടക്കം ലഭിച്ചെങ്കിലും മുതലാക്കാൻ സാധിച്ചില്ല. സഞ്ജുവിന് പകരം ടീമിലെത്തിയ ഷോൺ ജോർജ് (6) ഒരിക്കൽ കൂടി നിരാശപ്പെടുത്തി. അക്ഷയ് ചന്ദ്രനും (20) രോഹിന് പിന്തുണ നൽകാൻ കഴിയാതെ വന്നു.

ഇതിനിടെ രോഹൻ സെഞ്ചുറി പൂർത്തിയാക്കി. ഇതുവരെ 238 പന്തുകൾ നേരിട്ട രോഹൻ ഒരു സിക്സും 14 ഫോറും നേടി. കേരളത്തിന്റെ നാലാം മത്സരമാണിത്. ജാർഖണ്ഡ്, ഛത്തീസ്‌ഗഢ് എന്നിവർക്കെതിരെ കേരളം ജയിച്ചിരുന്നു. എന്നാൽ രാജ്സ്ഥാനെതിരായ മത്സരം സമനിലയിൽ അവസാനിച്ചു. പോയിന്റ് പട്ടികയിൽ ഒന്നാമതാണ് കേരളം മൂന്ന് മത്സരങ്ങളിൽ 13 പോയിന്റാണ് കേരളത്തിന്. ഛത്തീസ്‌ഗഢ്, കർണാടക ടീമുകൾക്കും 13 പോയിന്റ് വീതമുണ്ട്.

സ്പോർട്സ് ഡെസ്ക്

    സ്പോർട്സ് ഡെസ്ക്