ഫിറ്റ്നെസ് വീണ്ടെടുക്കാനുള്ള ശ്രമത്തിൽ സഞ്ജു സാംസൺ; എൻസിഎ വിട്ട് കൊച്ചിയിൽ ഫിസിയോയ്ക്കു കീഴിൽ പരിശീലനം തുടങ്ങി; സ്പ്രിന്റ് ചെയ്യുന്ന വീഡിയോ പങ്കുവച്ച് താരം; ആരാധകർ പ്രതീക്ഷയിൽ

കൊച്ചി: ഫിറ്റ്നെസ് വീണ്ടെടുത്ത് തിരിച്ചുവരവിന് ഒരുങ്ങി മലയാളി ക്രിക്കറ്റ് താരം സഞ്ജു സാംസൺ. ബെംഗളൂരുവിലെ ദേശീയ ക്രിക്കറ്റ് അക്കാദമി വിട്ട് കൊച്ചിയിൽ താരം പരിശീലനം തുടങ്ങി. ശ്രീലങ്കയ്‌ക്കെതിരായ ട്വന്റി20 മത്സരത്തിനിടെയാണു താരത്തിനു പരുക്കേറ്റത്.

ദേശീയ ക്രിക്കറ്റ് അക്കാദമിയിലെ പരിശീലനം അവസാനിപ്പിച്ച സഞ്ജു കൊച്ചിയിൽ ഫിസിയോയ്ക്കു കീഴിലാണ് പരിശീലനം തുടങ്ങിയത്. ഉടൻ തന്നെ സഞ്ജുവിന് ക്രിക്കറ്റ് കളിക്കാൻ സാധിക്കുമെന്നാണു പ്രതീക്ഷിക്കുന്നതെന്ന് ഒരു ദേശീയ മാധ്യമം റിപ്പോർട്ട് ചെയ്തു. പരിശീലനം നടത്തുന്നതിന്റെ ദൃശ്യങ്ങൾ സഞ്ജു ആരാധകർക്കായി സമൂഹമാധ്യമങ്ങളിൽ പങ്കുവച്ചിട്ടുണ്ട്.

രഞ്ജി ട്രോഫി മത്സരത്തിൽ കേരളത്തിനായി കളിക്കാൻ ബിസിസിഐയുടെ അനുമതി കാത്തിരിക്കുകയാണ് സഞ്ജു ഇപ്പോൾ. രഞ്ജിയിൽ കേരളം അടുത്ത റൗണ്ടിലേക്കു യോഗ്യത നേടിയാൽ താരത്തിന് കേരളത്തിനായി കളിക്കാൻ സാധിക്കുമെന്നാണു വിവരം. നിലവിൽ ഗ്രൂപ്പിൽ മൂന്നാം സ്ഥാനത്താണു കേരളം. കേരളം ആറു കളികൾ പൂർത്തിയാക്കിയപ്പോൾ മൂന്നെണ്ണമാണു വിജയിച്ചത്. രണ്ടു മത്സരങ്ങൾ സമനിലയിലായി.

ശ്രീലങ്കയ്‌ക്കെതിരെ മുംബൈയിൽ നടന്ന ട്വന്റി20 മത്സരത്തിനിടെ സഞ്ജുവിന്റെ കാൽ മുട്ടിനാണു പരുക്കേറ്റത്. ഫീൽഡിങ്ങിനിടെ പരുക്കേറ്റ താരത്തിന് ശ്രീലങ്കയ്‌ക്കെതിരായ മറ്റു മത്സരങ്ങൾ നഷ്ടമായിരുന്നു. പരിക്കിനെ തുടർന്ന് ന്യൂസിലൻഡിനെതിരായ ഏകദിന ട്വന്റി 20 പരമ്പര നഷ്ടമായിരുന്നു.

കാൽമുട്ടിന് പരിക്കേറ്റതിനെ തുടർന്ന് സഞ്ജുവിനെ ടീമിലേക്ക് പരിഗണിച്ചിരുന്നില്ല. പിന്നാലെ നാഷണൽ ക്രിക്കറ്റ് അക്കാദമിയിൽ പരിചരണത്തിലായിരുന്നു താരം. ഫിറ്റ്നെസ് വീണ്ടെടുക്കാനുള്ള ശ്രമത്തിലാണ് സഞ്ജു. താരം സോഷ്യൽ മീഡിയയിൽ പങ്കുവച്ച വീഡിയോയാണ് ഇപ്പോൾ വൈറലായിരിക്കുന്നത്. സ്പ്രിന്റ് ചെയ്യുന്ന വീഡിയോയാണ് സഞ്ജു പുറത്തുവിട്ടിരിക്കുന്നത്.

അതേസമയം, ന്യൂസിലൻഡിനെതിരായ ടി20 പരമ്പരയ്ക്ക് മുന്നോടിയായി പരിക്കേറ്റ് റിതുരാജ് ഗെയ്കവാദിന് പകരം സഞ്ജുവിനെ ഉൾപ്പെടുത്താനുള്ള സാധ്യത കുറവാണ്. ഇഷാൻ കിഷനും ശുഭ്മാൻ ഗില്ലും പൃഥ്വി ഷായും അടക്കമുള്ള ഓപ്പണർമാർ ടീമിലുള്ളതിനാൽ റുതുരാജിന്റെ പരിക്ക് ഇന്ത്യക്ക് വലിയ വെല്ലുവിളിയായേക്കില്ലെന്നാണ് സൂചന.