മുംബൈ: പ്രഥമ വനിതാ ഐപിഎൽ ലേലത്തിനുള്ള താരങ്ങളുടെ ചുരുക്കപ്പട്ടിക പുറത്തുവിട്ട് ബിസിസിഐ. 409 താരങ്ങളുടെ പട്ടികയാണ് പുറത്തുവിട്ടത്. ഏറ്റവും ഉയർന്ന അടിസ്ഥാന തുകയായ 50 ലക്ഷത്തിന്റെ പട്ടികയിൽ 24 താരങ്ങളുണ്ട്. താരലേലം 13ന് മുംബൈയിൽ നടക്കും.

1525 താരങ്ങളിൽ നിന്നാണ് ഇത്രയും പേരുടെ പട്ടികയുണ്ടാക്കിയത്. 246 ഇന്ത്യൻ താരങ്ങൾ പട്ടികയിൽ ഉൾപ്പെട്ടിട്ടുണ്ട്. 163 ഓവർസീസ് താരങ്ങളും ലേലത്തിന്റെ ഭാഗമാവും. എട്ട് താരങ്ങൾ അസോസിയേറ്റ് രാജ്യത്തിൽ നിന്നാണ്. ക്യാപ്ഡ് താരങ്ങളായി 202 പേർ. 199 പേർ ഇതുവരെ ഇന്റർനാഷണൽ മത്സരങ്ങൾ കളിച്ചിട്ടില്ല.

ഇന്ത്യൻ ക്യാപ്റ്റൻ ഹർമൻപ്രീത് കൗർ, സ്മൃതി മന്ഥാന, ദീപ്തി ശർമ, ഇന്ത്യയുടെ അണ്ടർ 19 ലോകകപ്പ് ടീം ക്യാറ്റൻ ഷെഫാലി വർമ തുടങ്ങിയ പ്രമുഖർക്ക് 50 ലക്ഷമാണ് അടിസ്ഥാന വില. ഓസ്ട്രേലിയയുടെ യെല്ലിസ് പെറി, ഇംഗ്ലണ്ടിന്റെ സോഫിയ എക്ലെസ്റ്റോൺ, ന്യൂസിലൻഡിന്റെ സോഫി ഡിവൈൻ തുടങ്ങിയവരും ഈ ഗണത്തിൽ വരും. 13 ഓവർസീസ് താരങ്ങൾക്ക് 50 ലക്ഷം അടിസ്ഥാനവിലയുണ്ട്. 30 താരങ്ങളുടെ അടിസ്ഥാനവില 40 ലക്ഷമാണ്.

അടുത്തമാസം നാലിനാണ് വനിതാ ഐപിഎൽ ആരംഭിക്കുന്നത്. മാർച്ച് 26ന് അവസാനിക്കുന്ന രീതിയിലാണ് ഐപിഎൽ ക്രമീകരിച്ചിട്ടുള്ളത്. മുംബൈ ബ്രാബോൺ സ്റ്റേഡിയം, ഡിവൈ പാട്ടീൽ സ്റ്റേഡിയം എന്നിവിടങ്ങളിലായിട്ടാണ് മത്സരം നടക്കുക. അഞ്ച് ടീമുകൾ ഐപിഎല്ലിന്റെ ഭാഗമാവും. ഒരു ടീമിന് 15 മുതൽ 18 താരങ്ങളെ വരെ സ്വന്തമാക്കാനാവും.

വനിതാ ടി20 ലോകകപ്പ് അവസാനിച്ച് എട്ട് ദിവസങ്ങൾക്ക് ശേഷമാണ് ഐപിഎൽ ആരംഭിക്കുന്നത്. ദക്ഷിണാഫ്രിക്കയിൽ നടക്കാനിരിക്കുന്ന ലോകകപ്പ് ഫെബ്രുവരി 26നാണ് അവസാനിക്കുന്നത്. ഫ്രാഞ്ചൈസി ലേലം നേരത്തെ നടന്നിരുന്നു. ആകെ 4669.99 കോടിക്കാണ് അഞ്ച് ടീമുകൾ ലേലത്തിൽ വിറ്റുപോയത്.

അഹമ്മദാബാദ്, മുംബൈ, ബെംഗളൂരു, ഡൽഹി, ലഖ്നൗ എന്നീ നഗരങ്ങളാണ് അഞ്ച് ടീമുകളെ സ്വന്തമാക്കിയത്. പുരുഷ ഐപിഎല്ലിലെ ടീമുടമകളായ മുംബൈ ഇന്ത്യൻസിനും ഡൽഹി ക്യാപിറ്റൽസിനും റോയൽ ചലഞ്ചേഴ്സ് ബാംഗ്ലൂരിനുമൊപ്പം അദാനി ഗ്രൂപ്പും കാപ്രി ഗ്ലോബലുമാണ് ടീമുകളെ സ്വന്തമാക്കിയത്.

ലേലത്തിലെ ഏറ്റവും ഉയർന്ന തുകയായ 1289 കോടി രൂപയ്ക്ക് അഹമ്മദാബാദ് ടീമിനെ അദാനി സ്പോർട്സ്ലൈൻ പ്രൈവറ്റ് ലിമിറ്റഡ് റാഞ്ചി. 912.99 കോടിക്ക് മുംബൈ ടീമിനെ ഇന്ത്യാവിൻ സ്‌പോർട്സ് പ്രൈവറ്റ് ലിമിറ്റഡ് സ്വന്തമാക്കി. ബെംഗളൂരു ടീമിനെ റോയൽ ചലഞ്ചേഴ്സ് സ്‌പോർട്സ് പ്രൈവറ്റ് ലിമിറ്റഡ് 901 കോടിക്കും ഡൽഹി ടീമിനെ ജെഎസ്ഡബ്ലൂ ജിഎംആർ ക്രിക്കറ്റ് പ്രൈവറ്റ് ലിമിറ്റഡ് 810 കോടിക്കും ലഖ്നൗ ടീമിനെ കാപ്രി ഗ്ലോബൽ ഹോൾഡിങ് പ്രൈവറ്റ് ലിമിറ്റഡ് 757 കോടി രൂപയ്ക്കും കൈക്കലാക്കി.

സ്പോർട്സ് ഡെസ്ക്

    സ്പോർട്സ് ഡെസ്ക്