ചിന്നസ്വാമി സ്റ്റേഡിയത്തിൽ ഇന്ത്യയുടെ ദീപവലി വെടിക്കെട്ട്; ശ്രേയസ്സിനും രാഹുലിനും സെഞ്ച്വറി; അർധസെഞ്ച്വറികളുമായി രോഹിതും ഗില്ലും കോലിയും; ലോക ക്രിക്കറ്റിലെ കുഞ്ഞന്മാരായ നെതർലൻഡ്‌സിന് മുന്നിൽ 411 റൺസിന്റെ റൺമല വെച്ച് ഇന്ത്യ
ബംഗളൂരു: ബംഗളുരുവിലെ ചിന്നസ്വാമി സ്‌റ്റേഡിയിൽ ഇന്ത്യയുടെ ബാറ്റിങ് വെടിക്കെട്ട്. സ്‌റ്റേഡിയം തിങ്ങി നിറഞ്ഞ കാണികളെ സാക്ഷി നിർത്തി കൊണ്ടായിരുന്നു നെതർലൻസിനെതിരെ ഇന്ത്യയുടെ ദീപാവലി വെടിക്കെട്ട്. തുടക്കം മുതൽ കത്തിക്കയറി ഇന്ത്യൻ ബാറ്റർമാർ അവസാനം വരെ അടിച്ചു തകർത്തു. ശ്രേയസ്സ് അയ്യരും കെ എൽ രാഹുലും സെഞ്ച്വറി നേടിയപ്പോൾ ഗില്ലും, രോഹിതും കോലിയും അർദ്ധ സെഞ്ച്വറികളുമായും കളം നിറഞ്ഞു. ഇതോടെ ടീമെന്ന നിലയിലെ ഉഗ്രൻ പ്രകടനത്തോട ഇന്ത്യ 50 ഓവറിൽ നാലു വിക്കറ്റ് നഷ്ടത്തിൽ 410 റൺസെടുത്തു.
ലോകകപ്പ് ലീഗ് റൗണ്ടിലെ അവസാന മത്സരമാണ് നെതർലൻഡ്‌സിനെതിരെ. ഇവിടെയും ഇന്ത്യ ഉന്നമിടുന്നത് തകർപ്പൻ വിജയം തന്നെയാണ്. ഈൗ ലോകകപ്പിലെ ഇന്ത്യയുടെ ഉയർന്ന സ്‌കോറാണിത്. 94 പന്തിൽ 128 റൺസുമായി ശ്രേയസ്സ് പുറത്താകാതെ നിന്നു. അഞ്ചു സിക്സും 10 ഫോറുമടങ്ങുന്നതാണ് ഇന്നിങ്‌സ്. 84 പന്തിലാണ് താരം സെഞ്ച്വറി കുറിച്ചത്. കരിയറിലെ നാലാം ഏകദിന സെഞ്ച്വറി കൂടിയാണിത്. രാഹുൽ 64 പന്തിൽ 102 റൺസെടുത്തു. നാലു സിക്സും 11 ഫോറും. നാലാം വിക്കറ്റിൽ ഇരുവരും ചേർന്ന് നേടിയ 208 റൺസിന്റെ കൂട്ടുകെട്ടാണ് ഇന്ത്യൻ സ്‌കോർ 400 കടത്തിയത്.
ഈ ലോകകപ്പിൽ രാഹുലിന്റെ രണ്ടാമത്തെയും ശ്രേയസ്സിന്റെ ആദ്യത്തെയും സെഞ്ച്വറിയാണിത്. ടോസ് നേടി ബാറ്റിങ്ങിനിറങ്ങിയ ഇന്ത്യക്കായി ഓപ്പണർമാരായ രോഹിത് ശർമയും ശുഭ്മൻ ഗില്ലും ഗംഭീര തുടക്കം നൽകി. ഇരുവരും ഒന്നാം വിക്കറ്റിൽ 11.5 ഓവറിൽ 100 റൺസാണ് അടിച്ചെടുത്തത്. 32 പന്തിൽ മൂന്ന് ഫോറും നാല് സിക്സുമടക്കം 51 റൺസെടുത്ത ഗില്ലിനെ പോൾ വാൻ മീകെറെൻ പുറത്താക്കി. പിന്നാലെ സൂപ്പർതാരം വിരാട് കോഹ്ലി ക്രീസിലെത്തി. കോലിയെ സാക്ഷിയാക്കി രോഹിത് അർധ സെഞ്ച്വറി നേടി. പിന്നാലെ രോഹിത്തും വീണു. 54 പന്തിൽ എട്ട് ഫോറും രണ്ട് സിക്സും ഉൾപ്പെടെ 61 റൺസെടുത്ത രോഹിത്തിനെ ബാസ് ഡി ലീഡ് പുറത്താക്കി.
ഇന്ത്യ 129 റൺസിന് രണ്ട് വിക്കറ്റ് എന്ന നിലയിലായി. ശ്രേയസ് അയ്യർ ക്രീസിലെത്തി. കോഹ്ലിയും ശ്രേയസ്സും ശ്രദ്ധയോടെ ബാറ്റേന്തി ടീം സ്‌കോർ 200ൽ എത്തിച്ചു. പിന്നാലെ 53 പന്തിൽ 51 റൺസെടുത്ത് കോഹ്ലിയും മടങ്ങി. താരത്തിന്റെ 71ാം അർധ സെഞ്ച്വറിയാണിത്. വാൻ ഡെർ മെർവിന്റെ പന്തിൽ കോഹ്ലി ബൗൾഡാകുകയായിരുന്നു. 50ാം ഏകദിന സെഞ്ച്വറിക്കായി ആരാധകർക്ക് ഇനിയും കാത്തിരിക്കണം. രണ്ടു റണ്ണുമായി സൂര്യകുമാർ യാദവ് പുറത്താകാതെ നിന്നു.
ഡച്ചുകാർക്കായി ബാസ് ഡി ലീഡ് രണ്ടു വിക്കറ്റെടുത്തു. നെതർലൻഡ്‌സ് നേരത്തെ തന്നെ സെമി കാണാതെ പുറത്തായിരുന്നു.
