ഗോൾഡൻ ബോളിന് അർഹൻ മെസിയല്ല ; അർഹത മറ്റൊരു താരത്തിനായിരുന്നു ; പുരസ്‌കാര വിതരണത്തെ വിമർശിച്ച് ക്രൊയേഷ്യൻ മോഡൽ ; ഇവാന നോളിന്റെ പ്രതികരണം ഫൈനൽ പോരാട്ടം നേരിട്ട് കണ്ടതിന് പിന്നാലെ
ദോഹ: ലോകകപ്പ് മത്സരങ്ങൾ കാണാൻ ഖത്തറിലെത്തിയ ക്രൊയേഷ്യൻ ആരാധികയും മോഡലുമായ ഇവാന നോൾ വലിയ ചർച്ചയായി മാറിയിരുന്നു. ഇൻസ്റ്റഗ്രാമിൽ ലക്ഷക്കണക്കിന് ഫോളോവേഴ്‌സുള്ള മോഡലും നർത്തകിയുമാണ് ഇവാന. ലോകകപ്പ് മത്സരങ്ങൾ കാണാൻ ഖത്തറിലെത്തിയ ക്രൊയേഷ്യക്കാരി തന്റെ വസ്ത്രധാരണം കൊണ്ടാണ് ശ്രദ്ധപ്പിടിച്ച് പറ്റിയത്. ലോകകപ്പ് ക്രൊയേഷ്യ നേടിയാൽ നഗ്‌നയായി ആഘോഷിക്കുന്നമെന്നത് അടക്കമുള്ള പ്രഖ്യാപനങ്ങളും ഇവർ നടത്തിയിരുന്നു.
ദോഹയിൽ താരമായ ഇവാന നോളിന്റെ ഇൻസ്റ്റഗ്രാം ഫോളവേഴ്‌സിന്റെ എണ്ണം മൂന്ന് മില്യണും കടന്നാണ് കുതിച്ചത്. എന്നാൽ, ഇപ്പോൾ ലോകകപ്പിന്റെ പുരസ്‌കാരങ്ങൾ നൽകിയതിലെ അതൃപ്തി തുറന്ന് പറഞ്ഞിരിക്കുകയാണ് ഇവാന. അർജന്റൈൻ നായകൻ ലിയോണൽ മെസി അല്ല ലോകകപ്പിലെ മികച്ച താരത്തിനുള്ള ഗോൾഡൻ ബോളിന് അർഹൻ എന്നാണ് ഇവാനയുടെ അഭിപ്രായം. ആ പുരസ്‌കാരം കിലിയൻ എംബാപ്പെയ്ക്കാണ് ലഭിക്കേണ്ടിയിരുന്നതെന്നും ഇവാന ഇൻസ്റ്റഗ്രാമിൽ കുറിച്ചു.
അർജന്റീന - ഫ്രാൻസ് ഫൈനൽ പോരാട്ടം കാണാൻ ഇവാനയും സ്റ്റേഡിയത്തിൽ ഉണ്ടായിരുന്നു. ഫ്രാൻസിനെ പിന്തുണയ്ക്കുന്നതായിരുന്നു ഇവാനയുടെ പോസ്റ്റുകൾ. അതേസമയം, ഖത്തർ ലോകകപ്പ് നേട്ടത്തിന് പിന്നാലെ റെക്കോർഡുകൾ വാരിക്കൂട്ടിയാണ് അർജന്റൈൻ നായകൻ മെസി ലുസൈൽ സ്റ്റേഡിയത്തിൽ നിന്ന് മടങ്ങിയത്. ഇതിഹാസ താരങ്ങളെ പിന്നിലാക്കി പുതിയചരിത്രം തന്നെ അർജന്റീനയുടെ മിശിഹ രചിച്ചു.
ഗോളടിച്ചും ഗോളടിപ്പിച്ചും ലോകകപ്പിന്റെ താരമായ മെസ്സിക്ക് അപൂർവമായ ഒരു റെക്കോർഡ് സ്വന്തമായി. രണ്ട് തവണ ഗോൾഡൻ ബോൾ പുരസ്‌കാരം സ്വന്തമാക്കുന്ന ആദ്യ താരമായാണ് മെസി മാറിയത്. നോക്കൗട്ടിലെ എല്ലാ മത്സരങ്ങളിലും ഗോൾ നേടുന്ന ആദ്യ താരമെന്ന റെക്കോർഡും അർജന്റൈൻ നായകൻ പേരിലാക്കി. വീണ്ടും ഗോൾ നേടി ടീമിന്റെ രക്ഷകനായ മെസി ഏറ്റവുമധികം സമയം ലോകകപ്പിൽ കളിച്ച താരവുമായി.
