ലോകകപ്പിൽ വെയ്ൽസിനെതിരെ ഐതിഹാസികമായ വിജയം; ഹിജാബ് വിരുദ്ധ പ്രക്ഷോഭകർ അടക്കം 709 തടവുകാരെ മോചിപ്പിച്ച് ഇറാൻ; നടപടി, ലോകകപ്പ് വേദിയിൽ ഇറാൻ ആരാധകരുടെ പ്രതിഷേധം ചർച്ചയാകുന്നതിനിടെ
ടെഹ്‌റാൻ: ലോകകപ്പിൽ കരുത്തരായ വെയ്ൽസിനെതിരെ ഐതിഹാസികമായ വിജയം കുറിച്ചതിന് പിന്നാലെ ഇറാനിൽ 709 തടവുകാരെ മോചിപ്പിച്ചതായി റിപ്പോർട്ട്. ലോകകപ്പ് വേദിയിൽ ഇറാൻ ആരാധകർ കടുത്ത പ്രതിഷേധം ഉയർത്തിയത് ചർച്ചയാകുന്നതിനിടെയാണ് ഹിജാബ് വിരുദ്ധ പ്രക്ഷോഭകരെ അടക്കം മോചിപ്പിച്ചത്. രാജ്യത്തെ വിവിധ ജയിലുകളിൽ കഴിഞ്ഞിരുന്ന 709 തടവുകാരെയാണ് ആകെ മോചിപ്പിച്ചതെന്ന് ഇറാൻ മാധ്യമങ്ങൾ റിപ്പോർട്ട് ചെയ്തു.
ഹിജാബ് വിരുദ്ധ പ്രക്ഷോഭത്തെ തുടർന്ന് അടുത്ത കാലത്ത് അറസ്റ്റിലായവരും വിട്ടയച്ചവരിൽ ഉൾപ്പെടുന്നുണ്ട്. അടുത്ത കാലത്തെ സംഭവ വികാസങ്ങളിൽ അറസ്റ്റിലായവർ എന്ന് മാത്രമാണ് ഇതേക്കുറിച്ച് ജുഡീഷ്യറിയുടെ മിസാൻ ഓൺലൈൻ വെബ്‌സൈറ്റിൽ പറയുന്നത്. കൂടുതൽ വിശദീകരണങ്ങളും നൽകിയിട്ടില്ല.
നിർബന്ധിത ഹിജാബ് നിയമം ലംഘിച്ചുവെന്ന് ആരോപിച്ച് പൊലീസ് അറസ്റ്റ് ചെയ്യുകയും പിന്നീട് മത പൊലീസിന്റെ കസ്റ്റഡിയിൽ മരിക്കുകയും ചെയ്ത മഹ്‌സ അമിനിക്കായി ലോകകപ്പ് വേദിയിലും ഇറാൻ ആരാധകർ ശബ്ദുമയർത്തിയിരുന്നു. ലോകകപ്പിൽ വെയ്ൽസിനെയുള്ള വിജയം ഇറാന് പ്രതീക്ഷയേകുന്നതാണ്.
ഇഞ്ചുറി ടൈമിൽ രണ്ട് ഗോളടിച്ചാണ് കടലാസിലും ചരിത്രത്തിലും കരുത്ത് കൂടിയ വെയ്ൽസിനെ ഇറാൻ ഞെട്ടിച്ചത്. കളിയിൽ വഴിത്തിരിവായത് വെയ്ൽസിന്റെ ഗോളി ഹെൻസെ ചുവപ്പുകാർഡ് കണ്ട് പുറത്തായതാണ്. ഇംഗ്ലണ്ടിനെതിരായ ആദ്യമത്സരത്തിൽ ഗോളടിച്ച തരേമിയെ ബോക്‌സിനു പുറത്തേക്ക് ഓടിയിറങ്ങി മുട്ടുകൊണ്ട് മുഖത്തടിച്ചതിനാണ് ഹെൻസെക്ക് ചുവപ്പുകാർഡ് ലഭിച്ചത്.
തുടക്കം മുതൽതന്നെ മികച്ച മുന്നേറ്റങ്ങളുമായി ഉഷാറായി ആക്രമിച്ച് കളിച്ച ഇറാന്റെ തന്ത്രത്തിൽ വെയ്ൽസ് സൂപ്പർതാരം ഗാരെത് ബെയ്ലിറനെ പൂട്ടുക എന്നതും ഉൾപെട്ടിരുന്നു. ലോകകപ്പിൽ ഇതുവരെ ആദ്യറൗണ്ട് കടന്നിട്ടില്ലെന്ന ക്ഷീണം മാറ്റാനാകുമെന്ന പ്രതീക്ഷ നിലനിർത്താൻ ഇറാന് ഈ ജയം ഊർജം പകരും. സമനിലയിലേക്ക് നീങ്ങുമെന്ന് കരുതിയ മത്സരത്തിന്റെ ഇഞ്ചുറി സമയത്ത് നേടിയ രണ്ട് ഗോളിനാണ് ഇറാൻ ജയിച്ചത്. റൗസ്ബെ ചെഷ്മി, റമിൻ റസായേൻ എന്നിവരാണ് ഇറാന്റെ ഗോളുകൾ നേടിയത്.
