റോഡ്രിഗോയുടെ അസിസ്റ്റ്, കാസിമിറോയുടെ സൂപ്പർ ഫിനിഷ്!; സ്വിറ്റ്‌സർലൻഡ് പ്രതിരോധകോട്ട തകർത്ത് ബ്രസീൽ പ്രീക്വാർട്ടറിൽ; ജയം മറുപടിയില്ലാത്ത ഒരു ഗോളിന്; മഞ്ഞപ്പടയുടെ വിജയഗോൾ കളിതീരാൻ മിനുറ്റുകൾ ശേഷിക്കെ
ദോഹ: ലോകകപ്പ് ഗ്രൂപ്പ് ജിയിലെ ആവേശപ്പോരിൽ സ്വിറ്റ്സർലാൻഡിനെ വീഴ്‌ത്തി ബ്രസീൽ പ്രീക്വാർട്ടറിൽ. മറുപടിയില്ലാത്ത ഒരു ഗോളിനാണ് ബ്രസീലിന്റെ ജയം. 84ാം മിനിറ്റിൽ കാസിമിറോയിലൂടെയാണ് സ്വിറ്റ്‌സർലൻഡിന്റെ പ്രതിരോധക്കോട്ട കാനറികൾ തകർത്തത്. ലഭിച്ച ഒട്ടേറ സുവർണാവസരങ്ങൾ പലതവണ പാഴാക്കിയ മഞ്ഞപ്പട സമനിലയിൽ കുരുങ്ങുമോയെന്ന ആശങ്കകൾ ഉയരവെയാണ് രക്ഷകനായി കാസിമിറോ അവതരിച്ചത്.
ബോക്‌സിന് അകത്തുനിന്ന് കാസെമിറോയുടെ അതിമനോഹരമായ ഷോട്ട് സ്വിസ് പ്രതിരോധ താരത്തിന്റെ ദേഹത്തുതട്ടിയ ശേഷം ഗോളി യാൻ സോമറിനെ കാഴ്ചക്കാരനാക്കിയാണു വലയിലെത്തിയത്. റയൽ മാഡ്രിഡ് താരം റോഡ്രിഗോയുടെ പാസിൽ നിന്നായിരുന്നു ഗോൾ. മാഞ്ചസ്റ്റർ യുനൈറ്റഡ് താരത്തിന്റെ ഹാഫ് വോളി ഗോൾ കീപ്പറേയും മറികടന്ന് വലയിലേക്ക്. കാസെമിറോയുടെ തകർപ്പൻ ഗോളിൽ ലോകകപ്പിലെ രണ്ടാം ജയം സ്വന്തമാക്കി ബ്രസീൽ പ്രീക്വാർട്ടർ ഉറപ്പിച്ചു. ആദ്യ മത്സരത്തിൽ സെർബിയയെ എതിരില്ലാത്ത രണ്ടു ഗോളുകൾക്കു കീഴടക്കിയ ബ്രസീൽ ജി ഗ്രൂപ്പിൽ ആറു പോയിന്റുമായി ഒന്നാമതാണ്. ആദ്യ മത്സരം ജയിച്ച സ്വിറ്റ്‌സർലൻഡ് മൂന്നുപോയിന്റുമായി രണ്ടാം സ്ഥാനത്തുണ്ട്.
ആദ്യ പകുതിയിലെ ഗോൾവരൾച്ചയ്ക്ക് 64ാം മിനുറ്റിൽ വിനീഷ്യസ് ജൂനിയറിലൂടെ ബ്രസീൽ വലചലിപ്പിച്ചെങ്കിലും വാറിൽ കുടുങ്ങി ഓഫ്സൈഡ് വിളിച്ചതോടെ ആരാധകർ നിരാശയിലായി. കാനറികൾ പലതവണ സ്വിസ് ഗോൾ മുഖത്തെ വിറപ്പിച്ചെങ്കിലും ലക്ഷം കണ്ടില്ല. 52ാം മിനുറ്റിൽ ബ്രസീലിയൻ ഗോൾമുഖത്ത് അപകടം വിതച്ചൊരു പന്ത് സ്വിറ്റ്സർലാൻഡ് എത്തിച്ചെങ്കിലും ബ്രസീൽ പ്രതിരോധം തട്ടിമാറ്റി.
പരുക്കേറ്റു പുറത്തായ നെയ്മാറുടെ അഭാവം മുഴച്ചുനിൽക്കുന്ന കളിയാണ് ആദ്യ പകുതിയിൽ ബ്രസീലിന്റേത്. വേഗത കുറഞ്ഞ മുന്നേറ്റങ്ങൾ പലതും സമ്മർദങ്ങളില്ലാതെയാണ് സ്വിസ് താരങ്ങൾ പ്രതിരോധിച്ചത്. 12ാം മിനിറ്റിൽ ബ്രസീലിനു ഗോൾ നേടാൻ ലഭിച്ച സുവർണാവസരവും പാഴാക്കി. പക്വെറ്റയിൽനിന്ന് ഫ്‌ളിക് പാസായി പന്തു ലഭിച്ച റിചാർലിസന് സ്വിസ് പോസ്റ്റിനു മുൻപിൽ ഗോളി മാത്രം മുന്നിൽ നിൽക്കെ അവസരം ലഭിച്ചു. എന്നാൽ പന്ത് വിനീഷ്യസിനു കട് ബാക്ക് ചെയ്തു നൽകാനാണ് താരം ശ്രമിച്ചത്. സ്വിസ് പ്രതിരോധ താരം നികോ എൽവെദി പന്തു രക്ഷപെടുത്തി.
കാസെമിറോയുടേയും ഫ്രെഡിന്റേയും വൺ ടച്ച് പാസ് റിചാർലിസന് വീണ്ടുമൊരു അവസരം ഒരുക്കി നൽകിയെങ്കിലും നീക്കം ഗോൾകിക്കിൽ അവസാനിച്ചു. ആദ്യ പകുതിയുടെ 20 മിനിറ്റുകൾ പിന്നിടുമ്പോഴും ബ്രസീലും സ്വിറ്റ്‌സർലൻഡും ഒപ്പത്തിനൊപ്പമുള്ള പ്രകടനമായിരുന്നു. 27ാം മിനിറ്റിൽ വിനീസ്യൂസിന്റെ വോളി സ്വിസ് ഗോളി യാൻ സോമർ രക്ഷിച്ചു. 25 വാര അകലെനിന്ന് റാഫീഞ്ഞ എടുത്ത ഷോട്ടും യാൻ സോമർ പിടിച്ചെടുത്തു.
37ാം മിനിറ്റിൽ മിലിറ്റാവോയുടെ ഒരു ഗോൾ ശ്രമം സ്വിസ് താരം ഷാക്ക ബ്ലോക്ക് ചെയ്തു. റാഫിഞ്ഞയെടുത്ത കോർണറിൽനിന്ന് ഗോൾ നേടാനുള്ള തിയാഗോ സിൽവയുടെ ശ്രമവും ലക്ഷ്യത്തിലെത്തിയില്ല. സ്വിസ് പ്രതിരോധ താരം നികോ എൽവെദിയുടെ ബ്ലോക്കിൽ പന്തു ഗോൾ പോസ്റ്റിലെത്തിയില്ല. ആദ്യപകുതി അവസാനിച്ചപ്പോൾ സ്റ്റേഡിയം 974ൽ ഗോൾ പിറന്നില്ല. ആദ്യ പകുതിയിൽ ഒരു ഗോൾ ശ്രമം മാത്രമാണ് സ്വിറ്റ്‌സർലൻഡിൽനിന്നുണ്ടായത്.
ഗോൾ നേടുക ലക്ഷ്യമിട്ട് രണ്ടാം പകുതിയുടെ തുടക്കത്തിൽതന്നെ ലുകാസ് പക്വെറ്റയെ പിൻവലിച്ച് ബ്രസീൽ റോഡ്രിഗോയെ ഇറക്കി. 53ാം മിനിറ്റിൽ സ്വിസ് താരം സിൽവൻ വിഡ്മർ ബ്രസീൽ പോസ്റ്റിനു സമീപത്തുനിന്ന് നൽകിയ ലോ ഫീൽഡ് പാസിൽ റീഡർ സ്ലൈഡ് ചെയ്‌തെങ്കിലും കണക്ട് ചെയ്യാൻ സാധിച്ചില്ല. എന്നാൽ റീബൗണ്ടിൽ ജിബ്രിൽ സോയെ അലെക്‌സ് സാന്ദ്രോ ബ്ലോക്ക് ചെയ്തു. 63ാം മിനിറ്റിൽ വിനീസ്യൂസ് ജൂനീയർ ബ്രസീലിനായി വല കുലുക്കിയെങ്കിലും വിഡിയോ അസിസ്റ്റന്റ് റഫറിയുടെ സഹായത്തോടെ റഫറി ഓഫ് സൈഡ് വിളിച്ചു. കാസെമിറോയുടെ പാസിലാണ് ബ്രസീലിന്റെ ഗോൾ നേടിയത്. ഗോൾ നിഷേധിച്ചതോടെ ഗാലറിയിലെ ആയിരക്കണക്കിന് ബ്രസീൽ ആരാധകർക്കും നിരാശ.
മത്സരം 70 മിനിറ്റ് പിന്നിട്ടതോടെ റിചാർലിസനെയും റാഫിഞ്ഞയെയും പിൻവലിച്ച് ബ്രസീൽ ഗബ്രിയേൽ ജെസ്യൂസിനെയും ആന്റണിയെയും ഗ്രൗണ്ടിലിറക്കി. സെർബിയയ്‌ക്കെതിരെ രണ്ടു ഗോളടിച്ച റിചാർലിസൻ കാര്യമായൊന്നും ചെയ്യാനാകാതെയാണ് സ്വിറ്റ്‌സർലൻഡിനെതിരായ കളിയിൽ ഗ്രൗണ്ട് വിട്ടത്. രണ്ടാം പകുതിയിൽ സ്വിറ്റ്‌സർലൻഡും ടീമിൽ നിർണായക മാറ്റങ്ങൾ വരുത്തി. 75ാം മിനിറ്റിൽ റോഡ്രിഗോയുടെ ഫ്രീകിക്ക് സ്വിസ് പോസ്റ്റിൽ ഭീഷണിയാകാതെ പുറത്തേക്കുപോയി. 83ാം മിനിറ്റിൽ കാസെമിറോ മത്സരത്തിലെ ആദ്യ ഗോൾ നേടി. ബോക്‌സിന് അകത്തുനിന്ന് കാസെമിറോയുടെ അതിമനോഹരമായ ഷോട്ട് സ്വിസ് പ്രതിരോധ താരത്തിന്റെ ദേഹത്തുതട്ടിയ ശേഷം ഗോളി യാൻ സോമറിനെ കാഴ്ചക്കാരനാക്കിയാണു വലയിലെത്തിയത്.
87ാം മിനിറ്റിൽ റോഡ്രിഗോയുടെ ഷോട്ട് സ്വിസ് ഗോളി ബാറിനു മുകളിലൂടെ തട്ടിയകറ്റി. കോർണർ ലക്ഷ്യത്തിലെത്തിക്കാനും അവർക്കു സാധിച്ചില്ല. ഗോൾ നേടിയതോടെ മത്സരത്തിന്റെ അവസാന മിനിറ്റുകളിൽ സ്വിസ് ബോക്‌സിലേക്കു ബ്രസീൽ തുടർച്ചയായി പന്തെത്തിച്ചു. എന്നാൽ രണ്ടാമതൊരു ഗോൾ നേടാൻ ബ്രസീലിനു സാധിച്ചില്ല. ആറു മിനിറ്റ് അധിക സമയവും അവസാനിച്ചതോടെ ബ്രസീലിന് ഒരു ഗോൾ വിജയം. ആദ്യ മത്സരത്തിൽ സെർബിയയെ എതിരില്ലാത്ത രണ്ടു ഗോളുകൾക്കു കീഴടക്കിയ ബ്രസീൽ ജി ഗ്രൂപ്പിൽ ആറു പോയിന്റുമായി ഒന്നാമതാണ്. ആദ്യ മത്സരം ജയിച്ച സ്വിറ്റ്‌സർലൻഡ് മൂന്നുപോയിന്റുമായി രണ്ടാം സ്ഥാനത്തുണ്ട്.ഓരോ പോയിന്റ് വീതമുള്ള കാമറൂണും സെർബിയയുമാണ് മൂന്നും നാലും സ്ഥാനങ്ങളിൽ.
