റിയാദ്: പോർച്ചുഗീസ് ഫുട്‌ബോൾ ഇതിഹാസം ക്രിസ്റ്റ്യാനോ റൊണാൾഡോയെ ടീമിൽ ഉൾപ്പെടുത്താൻ സൗദി അറേബ്യൻ ക്ലബ്ബ് അൽ നസർ കൈവിട്ടുകളഞ്ഞത് ലോകകപ്പിൽ കാമറൂണിന്റെ സൂപ്പർ ഹീറോയായ സ്‌ട്രൈക്കർ വിൻസന്റ് അബൂബക്കറിനെയെന്ന് റിപ്പോർട്ട്. റൊണാൾഡോയെ ആരാധകർക്ക് മുന്നിൽ അൽ നസർ ക്ലബ്ബ് അവതരിപ്പിച്ചിരുന്നു. മാഞ്ചസ്റ്റർ യുണൈറ്റഡ് ടീമിലെത്തിക്കാൻ ശ്രമിക്കുന്നുവെന്ന് അഭ്യൂഹങ്ങൾ ഉയർന്ന സ്‌ട്രൈക്കർ വിൻസന്റ് അബൂബക്കറിന്റെ കരാർ റദ്ദാക്കിയ ശേഷമാണ് അൽ നസ്ർ റൊണാൾഡോയെ രജിസ്റ്റർ ചെയ്തത്.

റൊണാൾഡോയുടെ സൗദിയിലുള്ള അരങ്ങേറ്റം ജനുവരി 22ന് ആയിരിക്കുമെന്ന് ഉറപ്പായിക്കഴിഞ്ഞു. അൽ നസ്ർ വിജയകരമായി താരത്തെ രജിസ്റ്റർ ചെയ്യാനുള്ള നടപടികൾ പൂർത്തീകരിച്ചതായാണ് റിപ്പോർട്ട്. സ്‌ട്രൈക്കർ വിൻസന്റ് അബൂബക്കറിന്റെ കരാർ റദ്ദാക്കിയ ശേഷമാണ് ക്രിസ്റ്റ്യാനോ റൊണാൾഡോയെ അൽ നസർ ടീമിനൊപ്പം ചേർത്തത്. സൗദി ഫുട്‌ബോൾ ലീഗിൽ ഒരു ടീമിന് എട്ടു വിദേശ താരങ്ങളെ കളിപ്പിക്കാൻ മാത്രമാണ് അനുമതി.

അബൂബക്കറുമായുള്ള കരാർ പരസ്പര ധാരണയോടെ ഒഴിവാക്കിയെന്നാണ് ക്ലബ് അറിയിച്ചത്. കാമറൂൺ താരമായ വിൻസെന്റ് അബൂബക്കർ ഖത്തർ ലോകകപ്പിൽ മികച്ച പ്രകടനം നടത്തിയിരുന്നു. മൂന്നു കളികളിൽനിന്ന് രണ്ട് ഗോളുകളും ഒരു അസിസ്റ്റും താരം നേടി. റൊണാൾഡോയ്ക്കു വഴിയൊരുക്കാൻ കരാർ റദ്ദാക്കിയതോടെ വിൻസെന്റ് അബൂബക്കർ ഫ്രീ ഏജന്റായി. കരാർ അവസാനിക്കാൻ ഒന്നര വർഷം ബാക്കി നിൽക്കെയാണ് അബൂബക്കറിന്റെ പുറത്താകൽ. അൽ നാസർ വിൻസെന്റ് അബൂബക്കറിന്റെ കരാർ അവസാനിപ്പിക്കുകയും അദ്ദേഹത്തിന്റെ എല്ലാ സാമ്പത്തിക അവകാശങ്ങളും നൽകുകയും ചെയ്തുവെന്ന് ക്ലബ്ബ് വൃത്തങ്ങൾ അറിയിച്ചതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്തു.

ഇതോടെ ആരാധകന്റെ മൊബൈൽ ഫോൺ തകർത്ത സംഭവത്തിൽ ലഭിച്ച വിലക്ക് കൂടി കഴിഞ്ഞ് ജനുവരി 22ന് താരത്തിന് അൽ നസറിന് വേണ്ടി കളത്തിലിറങ്ങാം. ആരാധകർ കാത്തിരുന്ന അരങ്ങേറ്റം ഉണ്ടായില്ലെങ്കിലും അൽ നസറിന്റെ ഗോളിന് സൂപ്പർ താരം ക്രിസ്റ്റ്യാനൊ റൊണാൾഡോ കൈയടിച്ചിരുന്നു. ജിംനേഷ്യത്തിൽ വ്യായാമം ചെയ്യുന്നതിനിടെ അൽ നസറിന്റെ മത്സരം ടെലിവിഷനിലൂടെ കണ്ട റൊണാൾഡോ തന്റെ പുതിയ ടീമിന്റെ രണ്ടാം ഗോളിനെ കൈയടിച്ചാണ് വരവേറ്റത്.

ഈ സമയം സൈക്ലിങ് വ്യായാമം നടത്തുതായിരുന്നു റൊണാൾഡോ. അൽ തായിയെ എതിരില്ലാത്ത രണ്ട് ഗോളിനാണ് അൽ നസർ തോൽപ്പിച്ചത്. ബ്രസീലിയൻ താരം ടാലിസ്‌കയാണ് അൽ നസറിന്റെ രണ്ട് ഗോളുകളും നേടിയത്. 42ാമത്തെയും 47ാമത്തെയും മിനിറ്റുകളിലായിരുന്നു ടാലിസ്‌കയുടെ ഗോളുകൾ. ജയത്തോടെ സൗദി പ്രോ ലീഗീൽ ഒന്നാം സ്ഥാനത്ത് ലീഡുയർത്തുകയും ചെയ്തു. നിലവിൽ 12 കളികളിൽ 29 പോയന്റുമായാണ് അൽ നസർ ഒന്നാം സ്ഥാനത്ത് തുടരുന്നത്. ഒരു മത്സരം കുറച്ചു കളിച്ച രണ്ടാം സ്ഥാനത്തുള്ള അൽ ഷബാബിന് 25 പോയന്റാണുള്ളത്.

സ്പോർട്സ് ഡെസ്ക്

    സ്പോർട്സ് ഡെസ്ക്