റിയാദ്: ക്രിസ്റ്റ്യാനോ റൊണാൾഡോയെ റെക്കോർഡ് തുകയ്ക്ക് അൽ നസർ ക്ലബ്ബിൽ എത്തിച്ചതിന് പിന്നാലെ അർജന്റീന നായകൻ ലയണൽ മെസ്സിയെ സൗദി അറേബ്യയിലെത്തിക്കാൻ അൽ ഹിലാൽ ക്ലബിന്റെ നീക്കം. നിലവിൽ ഫ്രഞ്ച് ലീഗിൽ പിഎസ്ജിയുടെ താരമാണു മെസ്സി. പിഎസ്ജിയുമായുള്ള കരാർ അവസാനിക്കാനിരിക്കെ മെസ്സി ഇതുവരെ പുതിയ കരാറിൽ ഒപ്പിട്ടിട്ടില്ല. ഇതോടെ ആരാധകരുടെ ആകാംഷ ഏറുകയാണ്.

അൽ നസർ ക്ലബ് പോർച്ചുഗൽ താരം ക്രിസ്റ്റ്യാനോ റൊണാൾഡോയെ സ്വന്തമാക്കിയതോടെയാണ് വൻ തുക വാഗ്ദാനം ചെയ്ത് മെസ്സിയെ സൗദിയിലെത്തിക്കാനുള്ള അൽ ഹിലാലിന്റെ നീക്കം. അൽ ഹിലാൽ മെസ്സിക്കായി എത്ര തുക വേണമെങ്കിലും മുടക്കാൻ തയാറാണെന്നാണു പുറത്തുവരുന്ന വിവരം.

മാഞ്ചസ്റ്റർ യുണൈറ്റഡുമായി തെറ്റിപ്പിരഞ്ഞ റൊണാൾഡോയെ സ്വന്തമാക്കാൻ മറ്റ് യൂറോപ്യൻ ക്ലബുകൾ രംഗത്തെത്താതിരുന്നതാണ് അൽ നസറിന് കാര്യങ്ങൾ എളുപ്പമാക്കിയത്. ഇതോടെ സൗദി ലീഗിൽ അൽ നസറിന്റെ ചിരവൈരികളായ അൽ ഹിലാൽ അർജന്റൈൻ നായകൻ മെസിയെ സ്വന്തമാക്കാനുള്ള നീക്കങ്ങൾ ശക്തമാക്കി.

റൊണാൾഡോയ്ക്കായി ഒരു സീസണ് 200 മില്യൻ യൂറോയാണു അൽ നസർ മുടക്കിയത്. 200 മില്യൺ യൂറോ(1775 കോടി രൂപ) ആണ് അൽ നസർ റൊണാൾഡോക്ക് നൽകുന്ന വാർഷിക പ്രതിഫലം. രണ്ടരവർഷത്തേക്കാണ് റൊണാൾഡോയുമായി അൽ നസർ കരാറൊപ്പിട്ടിരിക്കുന്നത്.

മെസ്സി വരികയാണെങ്കിൽ സീസണ് 300 മില്യൻ യൂറോ (ഏകദേശം 2,640 കോടി രൂപ) വരെ കൊടുക്കാമെന്നാണു ക്ലബിന്റെ വാഗ്ദാനമെന്ന് രാജ്യാന്തര മാധ്യമങ്ങൾ റിപ്പോർട്ടു ചെയ്തു. പിഎസ്ജിയുമായുള്ള കരാർ അവസാനിക്കാനിരിക്കെ മെസ്സി ഇതുവരെ പുതിയ കരാറിൽ ഒപ്പിട്ടിട്ടില്ല. പി എസ് ജി താരമായ മെസിയുടെ നിലവിലെ കരാർ വരുന്ന ജൂണിൽ അവസാനിക്കും. കരാർ നീട്ടാനുള്ള പി എസ് ജിയുടെ ഓഫറിനോട് മെസി ഇതുവരെ പ്രതികരിച്ചിട്ടില്ല. ഇതും അൽ ഹിലാലിന് പ്രതീക്ഷ നൽകുന്നുണ്ട്.

അതേസമയം മെസ്സിയുടെ പഴയ ക്ലബ് ബാർസിലോനയും യുഎസിലെ ഇന്റർ മയാമിയും താരത്തെ സ്വന്തമാക്കാൻ ശ്രമം നടത്തുന്നുണ്ട്. സൗദി ഫുട്‌ബോൾ ലീഗ് പോയിന്റു പട്ടികയിൽ നിലവിൽ മൂന്നാം സ്ഥാനത്താണ് അൽ ഹിലാൽ ക്ലബ്, അൽ നസർ ഒന്നാമതും. സൗദി അറേബ്യ ടൂറിസത്തിന്റെ അംബാസഡർ കൂടിയാണു മെസ്സി. ലോകകപ്പ് നേട്ടത്തിനു ശേഷം കഴിഞ്ഞ ദിവസം പിഎസ്ജിയിലേക്കു തിരികെയെത്തിയ മെസ്സി ആങ്കേഴ്‌സിനെതിരായ മത്സരത്തിൽ ഗോൾ നേടിയിരുന്നു.

ഫുട്‌ബോൾ ചരിത്രത്തിലെ ഏറ്റവും ഉയർന്ന പ്രതിഫലം നൽകിയാണ് സൗദി അറേബ്യൻ ക്ലബ് അൽ നസർ ക്രിസ്റ്റ്യാനോ റൊണാൾഡോയ്ക്കായി നൽകിയതെങ്കിൽ അതും മറികടന്നാകും മെസ്സി സൗദി ക്ലബ്ബിൽ എത്തുക.

സ്പോർട്സ് ഡെസ്ക്

    സ്പോർട്സ് ഡെസ്ക്