'മെസ്സി ഫുട്ബോൾ ചരിത്രത്തിലെ ഏറ്റവും മികച്ച കളിക്കാരൻ, ഫ്രാൻസിൽ അർഹമായ ബഹുമാനം ലഭിച്ചില്ല'; മെസി പി എസ് ജി വിട്ടതിൽ തുറന്നടിച്ച് ക്ലബ്ബിലെ സഹതാരം കിലിയൻ എംബാപ്പെ; പിഎസ്ജി വിട്ടേക്കുമെന്ന റിപ്പോർട്ട് തള്ളി ഫ്രഞ്ച് താരം

പാരീസ്: അർജന്റീനൻ ഫുട്ബോൾ ഇതിഹാസം ലയണൽ മെസ്സി പി എസ് ജി വിട്ടതിൽ പരസ്യ പ്രതികരണവുമായി ക്ലബ്ബിലെ സഹതാരം കിലിയൻ എംബാപ്പെ. മെസ്സി മികച്ച താരങ്ങളിൽ ഒരാളാണെന്നും ഫ്രാൻസിൽ അദ്ദേഹത്തിന് അർഹിച്ച ബഹുമാനം ലഭിച്ചില്ലെന്നും എംബാപ്പെ തുറന്നു പറഞ്ഞു. ഒരു ഇറ്റാലിയൻ കായിക വാർത്താ മാധ്യമത്തിന് നൽകിയ അഭിമുഖത്തിലാണ് 24-കാരനായ ഫ്രഞ്ച് സ്റ്റാർ ഫോർവാർഡിന്റെ തുറന്ന് പറച്ചിൽ.

'ഫുട്‌ബോൾ ചരിത്രത്തിലെ എക്കാലത്തെയും മികച്ച താരങ്ങളിൽ ഒരാളാണ് മെസി. മെസിയെ പോലൊരു താരം ക്ലബ് വിടുന്നത് ഒരിക്കലും സന്തോഷം നൽകുന്ന വാർത്തയല്ല. മെസി പിഎസ്ജി വിട്ടപ്പോൾ ഏറെപ്പേർ ആശ്വാസം കൊണ്ടത് എന്തുകൊണ്ട് എന്ന് എനിക്ക് മനസിലാവുന്നില്ല. അർഹമായ ബഹുമാനം മെസിക്ക് ഫ്രാൻസിൽ ലഭിച്ചില്ല' എന്നുമാണ് എംബാപ്പെയുടെ വാക്കുകൾ. രണ്ട് വർഷത്തെ പിഎസ്ജി ജീവിതം അവസാനിപ്പിച്ച് മെസി അമേരിക്കയിലെ മേജർ ലീഗ് സോക്കർ ക്ലബായ ഇന്റർ മിയാമിയിലേക്ക് ചേക്കേറിയതിന് പിന്നാലെയാണ് എംബാപ്പെയുടെ പ്രതികരണം.

'നമ്മൾ സംസാരിക്കുന്നത് മെസ്സിയെ കുറിച്ചാണ്. അദ്ദേഹത്തിന് ബഹുമാനം കിട്ടേണ്ടതുണ്ട്. എന്നാൽ ഫ്രാൻസിൽ നിന്ന് അദ്ദേഹത്തിന് അർഹമായ ബഹുമാനം ലഭിച്ചില്ല. ഇത് മോശം കാര്യമാണ്. പക്ഷേ അങ്ങനെയാണ് സംഭവിച്ചത്' എംബാപ്പെ പറഞ്ഞു.

ഈ മാസം പിഎസ്ജിയുമായുള്ള കരാർ അവസാനിക്കുന്നതോടെ ക്ലബ്ബ് വിടുമെന്ന് മെസ്സി നേരത്തെ പ്രഖ്യാപിച്ചിരുന്നു. അമേരിക്കൻ ക്ലബ്ബായ ഇന്റർ മിയാമിയാണ് അദ്ദേഹത്തിന്റെ പുതിയ തട്ടകം. മെസ്സിക്ക് പിന്നാലെ എംബാപ്പെയും പി എസ് ജി വിട്ടേക്കുമെന്ന റിപ്പോർട്ടുകൾ പുറത്തുവന്നുരന്നു. പി എസ് ജിയിൽ കരാർ പുതുക്കാൻ എംബാപ്പെ തയ്യാറായിരുന്നില്ല. ഈ സാഹചര്യത്തിൽ അദ്ദേഹത്തെ വിൽക്കാനാണ് പി എസ് ജി തയ്യാറെടുക്കുന്നതെന്നും വിവരം പുറത്തുവന്നിരുന്നു. മറ്റൊരു സൂപ്പർ താരം നെയ്മറും ക്ലബ്ബിന്റെ പുറത്തേക്കുള്ള വാതിൽപ്പടിയിലാണ്.

എന്നാൽ വരുന്ന സീസണിൽ സ്പാനിഷ് ക്ലബ് റയൽ മാഡ്രിഡിലേക്ക് ചേക്കേറുമെന്ന വാർത്തകൾ കിലിയൻ എംബാപ്പെ തള്ളി. വാർത്തകൾ അസത്യമെന്ന് താരം ട്വീറ്റ് ചെയ്തു. കരീം ബെൻസേമ ക്ലബ് വിട്ട ഒഴിവിൽ എംബാപ്പെ റയലിലെത്തുമെന്നും ക്ലബ് പ്രസിഡന്റ് ഫ്‌ളോറന്റീനോ പെരേസുമായി ചർച്ച നടത്തിയെന്നും ഒരു ഫ്രഞ്ച് മാധ്യമം റിപ്പോർട്ട് ചെയ്തിരുന്നു. എന്നാൽ ഇത് നിഷേധിച്ച് എംബപ്പെ തന്നെ രംഗത്തെത്തിയിരിക്കുകയാണ്.

'വാർത്ത അസത്യമാണ്. പിഎസ്ജിയിൽ ഒരു സീസൺ കൂടി തുടരുമെന്ന് താൻ നേരത്തെ തന്നെ പറഞ്ഞിരുന്നു. ക്ലബിൽ താൻ സന്തോഷവാനാണ്'- ഇതായിരുന്നു വാർത്തയ്ക്ക് ട്വിറ്ററിലൂടെയുള്ള എംബപ്പെയുടെ മറുപടി. ഇതോടെ താരത്തിന്റെ ട്രാൻസ്ഫർ അഭ്യൂഹങ്ങൾക്ക് വിരാമമാവുകയാണ്.

മുൻ ഇംഗ്ലീഷ് താരം ഡേവിഡ് ബെക്കാമിന് ഉടമസ്ഥാവകാശമുള്ള ക്ലബ് കൂടിയാണ് മെസി ചേക്കേറിയിരിക്കുന്ന ഇന്റർ മിയാമി. ലിയോണൽ മെസിയുടെ വരവോടെ അമേരിക്കൻ ഫുട്ബോളിന്റെ മുഖച്ഛായമാറുമെന്ന പ്രതീക്ഷയിലാണ് മേജർ ലീഗ് സോക്കർ അധികൃതർ. ലീഗിൽ നിലവിൽ പതിനഞ്ചാം സ്ഥാനത്താണ് ഇന്റർ മിയാമി. മെസിയുടെ വരവ് കാണികളുടെ എണ്ണത്തിലും ടിക്കറ്റ് നിരക്കിലും വലിയ മാറ്റമുണ്ടാക്കും.

മെസിയുടെ അരങ്ങേറ്റ മത്സരത്തിനുള്ള ടിക്കറ്റിന്റെ റീസെയ്ൽ വൻ തുകയ്ക്ക് തുടരുകയാണ്. മെസിയെ സ്വന്തമാക്കാൻ മുൻ ക്ലബ് ബാഴ്സലോണയ്ക്ക് പുറമെ ഇംഗ്ലീഷ് ക്ലബുകളായ ചെൽസിയും ന്യൂകാസിൽ യുണൈറ്റഡും സൗദി ക്ലബ് അൽ ഹിലാലും രംഗത്തുണ്ടായിരുന്നു. മെസിക്ക് ഫുട്‌ബോൾ ട്രാൻസ്ഫർ മാർക്കറ്റിലെ എക്കാലത്തെയും ഉയർന്ന തുകയാണ് അൽ ഹിലാൽ മുന്നോട്ടുവച്ചിരുന്നത്.