മിന്നും പ്രകടനം തുണയായി; ഫിഫ റാങ്കിംഗിൽ ആദ്യ നൂറിൽ തിരിച്ചെത്തി ഇന്ത്യ; ഒന്നാം സ്ഥാനം നിലനിർത്തി അർജന്റീന; ലോകകപ്പ് റണ്ണറപ്പുകളായ ഫ്രാൻസ് രണ്ടാമത്; ബ്രസീൽ മൂന്നാമത്

സൂറിച്ച്: സുനിൽ ഛേത്രിയുടേയും സംഘത്തിന്റെയും മിന്നും പ്രകടനത്തിലൂടെ ഫിഫ റാങ്കിംഗിൽ വീണ്ടും ആദ്യ നൂറിൽ തിരിച്ചെത്തി ഇന്ത്യൻ ഫുട്‌ബോൾ ടീം. പുതിയ റാങ്കിംഗിൽ ഒരു സ്ഥാനം ഉയർന്ന് നൂറാം സ്ഥാനത്താണ് ഇന്ത്യൻ ടീം. 2018 മാർച്ചിൽ 99-ാം സ്ഥാനത്തെത്തിയ ശേഷം ഇന്ത്യയുടെ ഏറ്റവും മികച്ച റാങ്കിംഗാണിത്. അതേ വർഷം ഓഗസ്റ്റിൽ 96ാം സ്ഥാനത്ത് എത്തിയതാണ് കഴിഞ്ഞ അഞ്ച് വർഷത്തിനിടെ ഇന്ത്യയുടെ ഏറ്റവും മികച്ച റാങ്കിങ്.

ഇന്റർ കോണ്ടിനെന്റൽ കപ്പിലെ കിരീട നേട്ടവും സാഫ് കപ്പിലെ മികച്ച പ്രകടനവുമാണ് ഇന്ത്യയെ ആദ്യ നൂറിൽ തിരിച്ചെത്താൻ സഹായിച്ചത്. ഭുവനേശ്വറിൽ നടന്ന ഇന്റർ കോണ്ടിനെന്റൽ കപ്പിൽ റാങ്കിംഗിൽ മുന്നിലുള്ള ലെബനനെനും കിർഗിസ്ഥാനെയും കീഴടക്കിയായിരുന്നു ഇന്ത്യ കിരീടം നേടിയത്. കഴിഞ്ഞ വർഷം ഇതേക്കാലയളവിൽ ഇന്ത്യ 104-ാം സ്ഥാനത്തായിരുന്നു.

കഴിഞ്ഞ വർഷം സെപ്റ്റംബറിൽ ത്രിരാഷ്ട്ര ടൂർണമെന്റിൽ വിയറ്റ്‌നാമിനോട് എതിരില്ലാത്ത മൂന്ന് ഗോളിന് തോറ്റശേഷം പിന്നീട് കളിച്ച ഒമ്പത് മത്സരങ്ങളിൽ ഏഴ് ജയവും രണ്ട് സമനിലയുമായി അപരാജിത കുതിപ്പാണ് ഇന്ത്യ നടത്തിയത്. ഇന്ത്യയിൽ കഴിഞ്ഞ നാലു വർഷമായി പരാജയമറിഞ്ഞിട്ടില്ലെന്ന റെക്കോർഡ് നിലനിർത്താൻ ക്യാപ്റ്റൻ സുനിൽ ഛേത്രിക്കും സംഘത്തിനുമായി.

ലോകകപ്പ് യോഗ്യതാ പോരാട്ടത്തിൽ നാലു വർഷം മുമ്പ് ഒമാനോടാണ് ഇന്ത്യ നാട്ടിൽ അവസാനമായി തോറ്റത്(2 - 1). 2018 ഓഗസ്റ്റിൽ 96-ാം സ്ഥാനത്ത് എത്തിയതാണ് കഴിഞ്ഞ അഞ്ച് വർഷത്തിനിടെ ഇന്ത്യയുടെ ഏറ്റവും മികച്ച റാങ്കിങ്.

അതേസമയം ഫിഫ റാങ്കിംഗിൽ ലോക ചാമ്പ്യന്മാരായ അർജന്റീന ഒന്നാം സ്ഥാനം നിലനിർത്തിയപ്പോൾ ലോകകപ്പ് റണ്ണറപ്പുകളായ ഫ്രാൻസ് രണ്ടാം സ്ഥാനത്തുണ്ട്. ബ്രസീൽ മൂന്നാം സ്ഥാനത്തേക്ക് വീണു. ഏറെക്കാലത്തിന് ശേഷമാണ് കാനറികൾ മൂന്നാം സ്ഥാനത്തേക്ക് വീഴുന്നത്. ഫിഫ ലോകകപ്പിലെ പ്രകടനത്തിന് പിന്നാലെ ടീമിന്റെ ഒന്നാം സ്ഥാനം നഷ്ടമായിരുന്നു. ഇംഗ്ലണ്ട് നാലാം സ്ഥാനത്തും ബെൽജിയം അഞ്ചാം സ്ഥാനത്തുമാണ്. ക്രൊയേഷ്യ, നെതർലൻഡ്സ്, ഇറ്റലി, പോർച്ചുഗൽ, സ്പെയിൻ ടീമുകളാണ് ആദ്യ പത്തിലുള്ളത്. രണ്ട് സ്ഥാനം മെച്ചപ്പെടുത്തിയ അമേരിക്ക 13ൽ നിന്ന് 11ൽ എത്തിയതാണ് വലിയ മാറ്റം.