കിങ് സൽമാൻ കപ്പ് കലാശപ്പോരാട്ടം ഇന്ന്; അൽഹിലാൽ, അൽനസ്ർ ടീമുകൾ നേർക്കുനേർ

ത്വാഇഫ്: അറേബ്യൻ ക്ലബ് ഫുട്ബാളിലെ അതികായന്മാരായ അൽഹിലാലും അൽനസ്‌റും കിങ് സൽമാൻ കപ്പ് ഫൈനലിൽ ഏറ്റുമുട്ടും. ത്വാഇഫിൽ വൈകീട്ട് ആറിന് ആരംഭിക്കുന്ന കിങ് സൽമാൻ കപ്പിനുള്ള അറബ് ചാമ്പ്യൻഷിപ്പിന്റെ ഫൈനലിൽ സൗദി പ്രമുഖരായ അൽഹിലാൽ, അൽനസ്ർ ടീമുകൾ ഏറ്റുമുട്ടും. സൽമാൻ രാജാവിനും കിരീടാവകാശിക്കും വേണ്ടി മക്ക ഡെപ്യൂട്ടി അമീർ ബദ്ർ ബിൻ സുൽത്താൻ മുഖ്യാതിഥിയായി പങ്കെടുക്കും.

കായിക മന്ത്രി അമീർ അബ്ദുൽ അസീസ് ബിൻ തുർക്കി, ബദ്ർ ബിൻ സുൽത്താനോട് നന്ദി രേഖപ്പെടുത്തി. അറബ് ഫുട്ബാൾ ചാമ്പ്യൻഷിപ്പിന്റെ ഈ മത്സരത്തിന് സൽമാൻ രാജാവും കിരീടാവകാശിയും നൽകിവരുന്ന പിന്തുണയും താൽപര്യവും കായിക മന്ത്രി എടുത്തുപറഞ്ഞു. ഫൈനൽ മത്സരത്തിൽ എത്തിയതിന് അൽഹിലാൽ, അൽനസ്ർ ടീമുകളെ കായിക മന്ത്രി അഭിനന്ദിച്ചു.