മയാമി: ലീഗ്സ് കപ്പിൽ ചാർലോട്ടിനെ ഗോൾമഴയിൽ മുക്കി ഇന്റർ മയാമി സെമിയിൽ. എതിരില്ലാത്ത നാല് ഗോളുകൾക്കാണ് ഇന്റർ മയാമിയുടെ ജയം. ലയണൽ മെസി തുടർച്ചയായ അഞ്ചാം മത്സരത്തിലും ഗോൾ കണ്ടെത്തി. ജോസഫ് മാർട്ടിനെസ്, റോബർട്ട് ടെയ്ലർ എന്നിവരുടെ വകയായിരുന്നു മറ്റു രണ്ട് ഗോളുകൾ. അഡിൽസൺ മലാൻഡയുടെ സെൽഫ് ഗോളും മയാമിയുടെ ഗോൾപട്ടികയിൽ ഇടംപിടിച്ചു.

ചാർലോട്ടിനെതിരെ സർവാധിപത്യമായിരുന്നു മയാമിക്ക്. 12 മിനിറ്റിൽ പെനാൽറ്റിയിലൂടെ മാർട്ടിനെസ് മയാമിയെ മുന്നിലെത്തിച്ചു. മെസി എടുക്കേണ്ട പെനാൽറ്റി മാർട്ടിനെസിനെ ഏൽപ്പിക്കുകയായിരുന്നു. മാർട്ടിനെസ് പിഴവൊന്നും കൂടാതെ ലക്ഷ്യം കാണുകയും ചെയ്തു. 32-ാം മിനിറ്റിൽ ടെയ്ലർ ഒരിക്കൽ കൂടി മിയാമിക്ക് ലീഡ് സമ്മാനിച്ചു. ഡി ആൻന്ദ്രേ യെഡിന്റെ അസിസ്റ്റിലായിരുന്നു ടെയ്ലറുടെ ഗോൾ.

78-ാം മിനിറ്റിൽ മലാൻഡയുടെ സെൽഫ് ഗോളിലൂടെ ഇന്റർ മയാമി ലീഡ് മൂന്നാക്കി ഉയർത്തി. മത്സരം അവസാനിക്കാൻ നാല് മിനിറ്റ് മാത്രം ബാക്കി നിൽക്കെ മെസിയും ഗോൾ പട്ടികയിൽ ഇടം നേടി. ലിയോണാർഡോ കംപാനയുടെ സഹായത്തിലാണ് ഗോൾ.

ലോക ഫുട്‌ബോൾ ചരിത്രത്തിൽ ഏറ്റവും കൂടുതൽ ഫ്രീകിക്ക് ഗോളുകൾ നേടിയ താരങ്ങുടെ പട്ടികയിൽ ഡിയേഗോ മറഡോണയെ പിന്തള്ളാൻ മെസിക്കായിരുന്നു. ലീഗ്‌സ് കപ്പിന്റെ ക്വാർട്ടർ ഫൈനലിൽ എഫ്‌സി ഡല്ലാസിനെതിരെ ഇന്റർ മയാമിക്ക് വേണ്ടി ഫ്രീകിക്ക് ഗോൾ നേടിയതോടെയാണ് മെസി ഇതിഹാസത്തെ പിന്നിട്ടത്. നിലവിൽ മെസിക്ക് 63 ഫ്രീകിക്ക് ഗോളുകളാണുള്ളത്, ഇന്റർ മയാമിയിൽ ഇതിനോടകം രണ്ട് ഫ്രീക്ക് ഗോളുകൾ മെസി നേടി.

മറഡോണ (62), സീക്കോ (62), റൊണാൾഡ് കോമാൻ (60), റൊഗേരിയോ സെനി (60) എന്നിവരെല്ലാം മെസിക്ക് പിന്നിലായി. മൂന്ന് ഫ്രീകിക്ക് ഗോളുകൾ കൂടി നേടിയാൽ ഇന്റർ മയാമി സഹഉടമ കൂടിയായ ഡേവിഡ് ബെക്കാമിനെ (65) മറികടക്കാൻ മെസിക്ക് സാധിക്കും. റൊണാൾഡീഞ്ഞോ (66), ലെഗ്രോടാഗ്ലി (66) എന്നിവരും മെസിക്ക് മുന്നിൽ മൂന്നും നാലും സ്ഥാനത്താണ്.

സ്പോർട്സ് ഡെസ്ക്

    സ്പോർട്സ് ഡെസ്ക്