ഹാങ്ചൗ: പത്തൊമ്പതാമത് ഏഷ്യൻ ഗെയിംസിൽ ഇന്ത്യയുടെ മെഡൽ വേട്ടയ്ക്ക് വെള്ളിയോടെ തുടക്കം. തുഴച്ചിൽ, ഷൂട്ടിങ് മത്സരവിഭാഗങ്ങളിൽ നിന്ന് ഇന്ത്യ വെള്ളിയും വെങ്കലവും സ്വന്തമാക്കി. ഇന്ത്യൻ വനിതാ ക്രിക്കറ്റ് ടീം മെഡലുറപ്പിച്ചുകൊണ്ട് ഫൈനലിൽ പ്രവേശിച്ചു.

ഷൂട്ടിങ്ങിന് സമാനമായി തുഴച്ചിലിലും വെള്ളി മെഡലാണ് ഇന്ത്യൻ ടീം നേടിയത്. തുഴച്ചിലിൽ അർജുൻ ലാൽ-അരവിന്ദ് സഖ്യത്തിനാണ് വെള്ളി. ലൈറ്റ് വെയ്റ്റ് ഡബിൾ സ്‌കൾസിൽ ചൈനയ്ക്കാണു സ്വർണം.

ഷൂട്ടിങിൽ ഇന്ത്യൻ വനിതാ ടീമാണു വെള്ളി നേടിയത്. പത്തുമീറ്റർ എയർ റൈഫിളിലാണ് നേട്ടം. മെഹുലി ഘോഷ്, ആഷി ചൗക്സി, റമിത ടീമിനാണ് മെഡൽ. എയർ റൈഫിളിൽ സ്വർണം നേടിയത് ചൈനയാണ്. പത്തുമീറ്റർ എയർ റൈഫിളിൽ തന്നെ മെഹുലിയും റമിതയും ഫൈനലിൽ പ്രവേശിച്ചതും ഇന്ത്യയ്ക്ക് പ്രതീക്ഷയായി.

മെഡൽ ഉറപ്പിച്ച് ഇന്ത്യൻ വനിതാ ക്രിക്കറ്റ് ടീം ഫൈനലിൽ പ്രവേശിച്ചു. ട്വിന്റി 20 ക്രിക്കറ്റിൽ ബംഗ്ലാദേശിനെ എട്ടു വിക്കറ്റിന് തോൽപ്പിച്ചാണ് ഇന്ത്യയുടെ നേട്ടം. ബംഗ്ലാദേശിനെ 51 റൺസിന് ചുരുട്ടിക്കെട്ടിയ ഇന്ത്യ 8.2 ഓവറിൽ രണ്ടു വിക്കറ്റ് നഷ്ടത്തിൽ ലക്ഷ്യം കണ്ടു. 17.5 ഓവറിലാണ് ഇന്ത്യ ബംഗ്ലാദേശിനെ പുറത്താക്കിയത്. 70 പന്തുകൾ ബാക്കി നിൽക്കെയായിരുന്നു ഇന്ത്യയുടെ എട്ടു വിക്കറ്റ് വിജയം. ഫൈനലിൽ ഇന്ന് നടക്കുന്ന പാക്കിസ്ഥാൻ ശ്രീലങ്ക മത്സരത്തിലെ വിജയികളെ ഇന്ത്യ നേരിടും.

തിങ്കളാഴ്ച ഇന്ത്യൻ സമയം രാവിലെ 11.30നാണ് ഫൈനൽ പോരാട്ടം. ടോസ് നേടിയ ബംഗ്ലാദേശ് ഇന്ത്യയ്‌ക്കെതിരെ ബാറ്റിങ് തിരഞ്ഞെടുക്കുകയായിരുന്നു. എന്നാൽ ഇന്ത്യൻ ബോളർമാർക്കു മുന്നിൽ പിടിച്ചു നിൽക്കാനായില്ല. 17 പന്തിൽ 12 റൺസെടുത്ത ക്യാപ്റ്റൻ നിഗർ സുൽത്താനയാണ് ബംഗ്ലാദേശിന്റെ ടോപ് സ്‌കോറർ. ടീമിൽ രണ്ടക്കം കടന്ന ഏകബാറ്ററും നിഗർ സുൽത്താനയാണ്. ബംഗ്ലാദേശ് ടീം ഇന്നിങ്‌സിൽ ആകെ നേടിയത് നാലു ഫോറുകൾ മാത്രമാണ്.

ഇന്ത്യയ്ക്കായി പൂജ വസ്ത്രകാർ നാലു വിക്കറ്റുകൾ വീഴ്‌ത്തി. ടിറ്റസ് സാധു, അമൻജ്യോത് കൗർ, രാജേശ്വരി ഗെയ്ക്വാദ്, ദേവിക വൈദ്യ എന്നിവർ ഓരോ വിക്കറ്റു വീതം വീഴ്‌ത്തി. മറുപടി ബാറ്റിങ്ങിൽ ക്യാപ്റ്റൻ സ്മൃതി മന്ഥനയെ തുടക്കത്തിൽതന്നെ ഇന്ത്യയ്ക്കു നഷ്ടമായി. 12 പന്തിൽ ഏഴ് റൺസാണ് ഇന്ത്യൻ ക്യാപ്റ്റൻ നേടിയത്. ഓപ്പണർ ഷെഫാലി വർമയും (21 പന്തിൽ 17), ജെമീമ റോഡ്രിഗസും (15 പന്തിൽ 20) ചേർന്നതോടെ ഇന്ത്യ അനായാസം വിജയത്തിലേക്കു കുതിച്ചു. മലയാളി താരം മിന്നു മണി ഇന്ത്യൻ ടീമിനായി കളിക്കാൻ ഇറങ്ങിയില്ല.

സ്പോർട്സ് ഡെസ്ക്

    സ്പോർട്സ് ഡെസ്ക്