പാക്കിസ്ഥാനെ ഗോൾമഴയിൽ മുക്കി; ഗ്രൂപ്പ് ചാമ്പ്യന്മാരായി ഇന്ത്യ ഏഷ്യൻ ചാമ്പ്യൻസ് ട്രോഫി ഹോക്കി സെമി ഫൈനലിൽ; ജയം, എതിരില്ലാത്ത നാല് ഗോളുകൾക്ക്; തോൽവിയോടെ പാക്കിസ്ഥാൻ പുറത്ത്

ചെന്നൈ: ഏഷ്യൻ ചാമ്പ്യൻസ് ട്രോഫി ഹോക്കിയിൽ പാക്കിസ്ഥാനെ ഗോൾമഴയിൽ മുക്കി ഗ്രൂപ്പ് ചാമ്പ്യന്മാരായി ഇന്ത്യ സെമിയിൽ. ചെന്നൈയിൽ നടന്ന പോരാട്ടത്തിൽ എതിരില്ലാത്ത നാല് ഗോളുകൾക്കാണ്(4 - 0) അയൽക്കാരെ ഇന്ത്യ വീഴ്‌ത്തിയത്. തോൽവിയോടെ പാക്കിസ്ഥാൻ സെമി കാണാതെ പുറത്തായി.

മേയർ രാധാകൃഷ്ണ സ്റ്റേഡിയത്തിൽ മത്സരം തുടങ്ങി ആദ്യപകുതിയിൽ തന്നെ ഇന്ത്യ രണ്ട് ഗോളിന് ലീഡെടുത്തിരുന്നു. ആദ്യ ക്വാർട്ടറിന്റെ 15-ാം മിനുറ്റിൽ പെനാൽറ്റി കോർണറിൽ നിന്ന് ക്യാപ്റ്റൻ ഹർമൻപ്രീത് സിങ് ഇന്ത്യക്ക് ആദ്യ ഗോൾ നൽകി.

രണ്ടാം ക്വാർട്ടറിൽ 24-ാം മിനുറ്റിൽ ഹർമൻ രണ്ടാം തവണയും വലകുലുക്കി. ഈ ഗോളും പെനാൽറ്റി കോർണറിൽ നിന്നായിരുന്നു. മൂന്നാം ക്വാർട്ടറിൽ 36-ാം മിനുറ്റിൽ ജുഗ്രാജ് സിങ് ഗോൾനില 3-0 ആക്കി. പെനാൽറ്റി കോർണറിലൂടെയാണ് ഇത്തവണയും വല ചലിച്ചത്. നാലാം ക്വാർട്ടറിൽ 55-ാം മിനുറ്റിൽ ആകാശ്ദീപ് സിംഗിലൂടെ ഇന്ത്യ 4-0ന്റെ സമ്പൂർണ മേധാവിത്വം പാക്കിസ്ഥാനെതിരെ നേടുകയായിരുന്നു.

പാക്കിസ്ഥാനെതിരായ ജയത്തോടെ അഞ്ച് കളികളിൽ നാല് ജയം സ്വന്തമാക്കിയാണ് ഇന്ത്യ 13 പോയിന്റോടെ ഗ്രൂപ്പ് ചാമ്പ്യന്മാരായി സെമിയിലെത്തിയത്. അതേസമയം ചൈനക്കെതിരെ മാത്രമാണ് ടൂർണമെന്റിൽ പാക്കിസ്ഥാന് ജയിക്കാനായത്. പാക്കിസ്ഥാൻ അഞ്ചാം സ്ഥാനക്കാരായാണ് ഗ്രൂപ്പിൽ ഫിനിഷ് ചെയ്തത്.