ലണ്ടൻ: സെർബിയൻ സൂപ്പർതാരം നൊവാക് ജോക്കോവിച്ച് വിംബിൾഡൺ പുരുഷ സിംഗിൾസ് ഫൈനലിൽ. സെമിയിൽ ഇറ്റാലിയൻ താരം ജാന്നിക് സിന്നറിനെ പരാജയപ്പെടുത്തിയാണ് ജോക്കോയുടെ ഫൈനൽ പ്രവേശം. നേരിട്ടുള്ള സെറ്റുകൾക്കാണ് താരത്തിന്റെ വിജയം. സ്‌കോർ: 3-6,4-6,6-7(4 -7).

കാർലോസ് അൽക്കാരസ്-ഡാനിയേൽ മെദ്വദേവ് എന്നിവർ തമ്മിലുള്ള രണ്ടാം സെമിയിലെ വിജയിയേയാണ് ജോക്കോ കലാശപ്പോരിൽ നേരിടുക. ഞായറാഴ്ചയാണ് ഫൈനൽ.എട്ടാം വിംബിൾഡൺ കിരീടവും കരിയറിലെ 24-ാം ഗ്രാൻഡ്സ്ലാം കിരീടവും നേടാൻ ജോക്കോവിച്ച് ഇനി ഒരു വിജയത്തിന്റെ ദൂരം മാത്രം.

ആദ്യ സെറ്റിൽ തന്നെ ജാന്നിക് സിന്നറിനെതിരേ തകർപ്പൻ പ്രകടനമാണ് ജോക്കോ കാഴ്ചവെച്ചത്. സിന്നറിന്റെ സർവ്വ് ഭേദിച്ച് മുന്നേറിയ സെർബിയൻ താരം 6-3 ന് സെറ്റ് സ്വന്തമാക്കി. രണ്ടാം സെറ്റിലും ജോക്കോവിച്ചിന്റെ മുന്നേറ്റം തന്നെയാണ് സെന്റർ കോർട്ടിൽ നിറഞ്ഞുനിന്നത്. 6-4 ന് രണ്ടാം സെറ്റ് ജോക്കോ നേടി.

എന്നാൽ മൂന്നാം സെറ്റിൽ ഇറ്റാലിയൻ താരം കടുത്ത വെല്ലുവിളി ഉയർത്തി. ജോക്കോയ്ക്കെതിരേ പോരാടിയ സിന്നർ സെറ്റ് 6-6 ലെത്തിച്ചു. ടൈബ്രേക്കറിലേക്ക് നീണ്ടതോടെ മൂന്നാം സെറ്റ് ആവേശകരമായി. ടൈ ബ്രേക്കറിലും തുടക്കത്തിൽ സിന്നറായിരുന്നു മുന്നിട്ടുനിന്നത്. എന്നാൽ ജോക്കോ പരിചയസമ്പത്തോടെ റാക്കറ്റേന്തിയതോടെ ഇറ്റാലിയൻ താരത്തിന് പിടിച്ചുനിൽക്കാനായില്ല. മൂന്നാം സെറ്റും മത്സരവും കലാശപ്പോരിലേക്കുള്ള ടിക്കറ്റും ജോക്കോ സ്വന്തമാക്കി.

24-ാം ഗ്രാൻഡ്സ്ലാം ലക്ഷ്യമിട്ടാണ് ജോക്കോ കലാശപ്പോരിനിറങ്ങുക. നേരത്തേ ഫ്രഞ്ച് ഓപ്പണിൽ മുത്തമിട്ടതോടെ ഏറ്റവും കൂടുതൽ ഗ്രാൻഡ്സ്ലാം നേടുന്ന പുരുഷതാരമായി ജോക്കോ മാറിയിരുന്നു. ഒരു ഗ്രാൻഡ്സ്ലാം കൂടി നേടാനായാൽ ടെന്നീസ് ചരിത്രത്തിൽ ഏറ്റവും കൂടുതൽ തവണ ഗ്ലാൻഡ്സ്ലാം നേടിയ മാർഗരറ്റ് കോർട്ടിന്റെ റെക്കോഡിനൊപ്പം ജോക്കോയ്ക്കെത്താനാകും.

സ്പോർട്സ് ഡെസ്ക്

    സ്പോർട്സ് ഡെസ്ക്