മന്ത്രി ശശീന്ദ്രന്റെതായി മംഗളം ചാനൽ പുറത്തുവിട്ട ശബ്ദ ശകലവുമായ് ബന്ധപ്പെട്ട വാർത്തയെ ഒരു ശരാശരി മായാളി എന്ന രീതിയിൽ ഇങ്ങനെ വിലയിരുത്താം.

ലൈറ്റായിട്ട് മധുരം കൂട്ടി ഒരു ചായ: സദാചാരത്തിന്റെ അപ്പോസ്തലന്മാരുടെ നാട്ടിൽ അർദ്ധരാത്രി ഉദിച്ച സൂര്യൻ

അതായത് കേരളീയന്റെ മഹത്തായ സംസ്‌കാരം എന്ന ഓമനപ്പേരുമിട്ട് ലൈംഗികത ഒരു മഹാസംഭവമായി കൊണ്ട് നടക്കുന്ന ശരാശരി മലയാളിയുടെ ഇക്കിളി ബോധം കച്ചവട ബുദ്ധിയിൽ പ്രവർത്തിച്ചപ്പോൾ ഉരുത്തിരിഞ്ഞതാണ് സദാചാരത്തിന്റെ മേലങ്കിയണിഞ്ഞ ഈ വാർത്ത. കടുത്ത കിടമത്സരം നടക്കുന്ന വാർത്താ ചാനൽ രംഗത്ത് പതിറ്റാണ്ടുകളുടെ പാരമ്പര്യമുണ്ടെങ്കിലും ചുവടുകൾവെച്ച് തുടങ്ങുന്ന മംഗളം ചാനലിന് മലയാളികളെ മുഴുവൻ അൽപനേരം മംഗളത്തിന്റെ ഫ്രീക്വൻസിയിലേക്ക് ആകർഷിക്കാൻ ഇതിലും നല്ലൊരു മാർഗ്ഗം കണ്ടെത്താനില്ലല്ലോ ? സോഷ്യൽ മീഡിയയിൽ ധൃതംഗ പുളകിതരായ് രമിക്കുന്ന പോരാളികൾക്ക് സദാചാര ആത്മരതിക്ക് മറ്റെന്തുവേണം. എന്തായാലും മംഗളം വാർത്തയുടെ ചീഫ് എഡിറ്റർ മലയാളികളുടെ സാമൂഹ്യപാഠവും ബയോളജിയും, ഫിസിയോളജിയും എന്നുവേണ്ട സൈക്കോളജിയും ഞരമ്പോളജിയും മാത്തമാറ്റിക്‌സുമറിയുന്ന ഒരു മികച്ച ബിസിനസ് മാർക്കേറ്റർ ആണെന്നത് പറയാതെ വയ്യ. ഞാനും നിങ്ങളുമടങ്ങുന്ന നാം നമ്മെ തന്നെ ഒരുതരം സരോജ്കുമാർ സ്‌റ്റൈലിൽ വിളിക്കുന്ന പ്രബുദ്ധർ എന്ന വാക്കിനു യഥാർത്ഥത്തിൽ ഞരമ്പർ എന്നാണ് പര്യായം എന്നത് മംഗളം വാർത്ത സൃഷ്ട്ടിച്ച ഓളങ്ങളിൽ നിന്നും പകൽ പോലെ വ്യക്തമാണ്. അത്തരം ഒരു കപട സദാചാര മാനസികാവസ്ഥ മുതലെടുത്താണ് ദൈവത്തിന്റെ സ്വന്തം നാട്ടിൽ ജനാധിപത്യത്തിന്റെ നാലാം തൂണിൽ ഇക്കിളി മാർക്കെറ്റിംഗിന്റെ പുത്തൻ ആണികൾ അടിച്ചു കേറ്റുന്നത്.

നല്ല പൊരിഞ്ഞ വലുപ്പം കൂടിയ ഒരു ബോണ്ട : ഫണം വിടർത്തിയാടുന്ന ലോക മാന്യ ലിംഗങ്ങൾ

ഇന്നലെവരെ ആസനത്തിൽ വാലും ചുരുട്ടിവെച്ച് , ഒബി വാനുമെടുത്തു, സരിതക്കും ശാലു മേനോനും,ലക്ഷ്മി നായർക്കും പുറകെ ബ്രായുടെ ഹുക്കും, വയറിന്റെ ക്ലിപ്പും ഒപ്പിയടുത്ത് ഡിജിറ്റൽ മികവോടെ നേരോടെ നിരന്തരം സിഡിയും കാത്തു വേഴാമ്പലുകളെ പോലെ മഞ്ഞണിഞ്ഞ മാമലകളാൽ മനം മയക്കുന്ന മലയോരത്തെ മണ്ണിനോട് മല്ലടിക്കുന്ന മലയാള മക്കൾക്ക് ചൂടോടെ തത്സമയം കാണിച്ചുതരാൻ മാധ്യമ ധർമ്മത്തിന്റെ ഉത്തുംഗ പരാഗ ഉൾപ്പുളക ശീതഗമന പുളകിത ത്വരയാൽ തേരാ പാരാ ഓടിനടന്ന ലോക മാന്യ തിലകന്മാരായ ചില മാധ്യമ പ്രവർത്തകരും, സാമൂഹ്യപ്രവർത്തകരും, പൊതു പ്രവർത്തകരും, ഇനി അഥവാ ബിരിയാണി കൊടുക്കുന്നുണ്ടോ എന്ന് പൊലീസ് ജീപ്പിനോടൊപ്പം കോയമ്പത്തൂരിലേക്ക് ടാക്‌സീ വിളിച്ചു പോയ അഭിനവ സദാചാരനന്മാരും ഇപ്പൊ ഇതാ ഈ വാർത്ത നൽകിയതിന് മംഗളത്തെ ശിവസേന സ്‌റ്റൈലിൽ തല്ലിക്കൊല്ലുന്നു. ഇത് വാർത്തയല്ല കൊടും കുറ്റമാണെന്ന് ചിലർ.. നെറികെട്ട മാധ്യമ പ്രവർത്തനമെന്ന് മറ്റുചിലർ, ക്രൈമും മുത്തുചിപ്പിയും ഇതിലും ഭേദമെന്നു മറ്റു ചിലർ അങ്ങനെ പോകുന്നു പൊങ്കാല കാലങ്ങളിലെ പലതരം ചോറും പായസങ്ങളും..

സത്യത്തിൽ ഇത്തരക്കാർ നടത്തുന്നത് നല്ല ഒന്നാന്തരം ഇരട്ടത്താപ്പല്ലേ? കിളിപ്പ് വീണ്ടു വീണ്ടും കേട്ട് എന്നിട്ടും അരിശം തീരാതെ ഹെഡ് സീറ്റും വെച്ച് കേട്ട് ഹൃദയവും കിഡ്‌നിയും കൊണ്ട് ആത്മരതിയും നടത്തി.. മുടിയൊക്കെ ചീകി സ്‌റ്റൈലിൽ ഫേസ്‌ബുക്കിലും ചാനലുകളിലും വന്നിരുന്നു പറയുന്നു ഛീ വൃത്തികെട്ട വാർത്ത എന്നും ഇങ്ങനെയൊക്കെ ഒരു മാധ്യമത്തിന് അധഃപതിക്കാൻ പറ്റുമോ എന്നുമൊക്കെ. ഇത്തരക്കാർ അവനവനിൽ ചെയ്തികളിലേക്ക് ചെറുതായൊന്നു എത്തിനോക്കുന്ന നന്നായിരിക്കും എന്നതാണെന്റെ അഭിപ്രായം. എല്ലാവരും കിടക്കുന്ന സമയം നോക്കി സദാചാരന്മാരെ ഇക്കിളിപ്പെടുത്താൻ ലക്ഷങ്ങൾ മുടക്കി കോപ്പി റൈറ്റ് മേടിച്ച് ഇരുട്ടിന്റെ മറവിൽ മലയാളികൾക്ക് കിന്നാരത്തുമ്പിയും, ആലിലത്തോണിയും ഡ്രൈവിങ് സ്‌കൂളും പോലെയുള്ള സ്ഖലനോപാദികൾ സമൂഹ നന്മയ്ക്കായി രണ്ടരമണിക്കൂർ സംഭാവന ചെയ്യുന്ന നിർഭയം നിരന്തരം ചാനലുകളാണ് മംഗളം ചാനലിനെതിരെ ആത്മ രോഷത്താൽ പുളകിതരാകുന്നത് എന്ന് കാണുമ്പോൾ കട്ട സഹതാപമല്ലാതെ മറ്റൊന്നും തോന്നുന്നില്ല.

തനിക്ക് കിട്ടാത്തത് അവന് കിട്ടുന്നുണ്ടോ എന്ന വർണ്യത്തിൽ ആശങ്ക ഉൽപ്രേക്ഷ അലങ്കൃതി സന്ദേഹം അതാണ് ലിംഗഭേദമന്യേ നാമനുഭവിക്കുന ലൈംഗിക അരാചകത്വത്തിന്റെ അടിസ്ഥാനം. സ്ത്രീയും പുരുഷനും, വക്കീലന്മാരും ഡോക്ടർമാരും, പച്ചക്കറി കടക്കാരനും, ഇറച്ചി വെട്ടുകാരനും, മാധ്യമങ്ങളും സമൂഹ മാധ്യമങ്ങളുമൊക്കെ ഒക്കെ ഈ ആധിയിൽ തുല്യ പങ്ക് വഹിക്കുന്നു. ബലാൽസംഗ ഇരയുടെ പേരും വിലാസവും നക്ഷത്രവും വിളിച്ചുപറയാൻ അവസരമൊരുക്കുകയും, ഇരയുടെ ലൈംഗികതയിൽ ചാലിച്ച സൗന്ദര്യം ക്‌ളോസപ്പിൽ ഒപ്പിയെടുത്തു.. ഓരോ അരമണിക്കൂറിലും സ്പെഷ്യൽ സ്റ്റോറി ആക്കുന്ന ചാനലുകൾ ഒരു ശബ്ദ ശകലം അതും ഒരു ആരോപണത്തിന്റെ അടിസ്ഥാനത്തിൽ വാർത്തയാക്കിയപ്പോൾ മറ്റു മാധ്യമ ധർമ്മാക്കാർക്ക് സടകുടഞ്ഞെണീറ്റ ധാർമ്മിക സദാചാര ബോധം ഇരട്ടത്താപ്പിന്റെതാണ് എന്നതാണ് യാഥാർഥ്യം.

ബാബുവേട്ടാ എന്റെ പറ്റ് എത്രയായി: പാശ്ചാത്യ സംസ്‌ക്കാരവും, സൊ കോൾഡ് ആർഷഭാരത സംസ്‌ക്കാരവും തമ്മിൽ നിലനിൽപ്പിനായി പോരാടുമ്പോൾ...

ചിലർ വാഴ വെട്ടുന്നു, മറ്റു ചിലർ കഴുക്കോൽ ഊരുന്നു. അതായത്., മനുഷ്യ സഹചമായ ലൈഗീക ചോദനയെ മണിച്ചിത്ര താഴിട്ട് പൂട്ടി വച്ച് സദാചാരം പ്രസംഗിക്കുന്ന വിഡ്ഡിത്വത്തിന് മാധ്യമങ്ങൾ എന്നല്ല ലോകത്തെ ഒരു സംസ്‌കാരവും, ഒരു ഇൻസ്റ്റിറ്റിയുഷനും, മതവും ഒന്നും സത്യത്തിൽ കൂട്ടുനിൽക്കുന്നില്ല. പകരം ലൈംഗികതയെ ആസ്വാദ്യവും നിയന്ത്രണ വിധേയമാക്കുകയാണ് ചെയ്തിട്ടുള്ളത്. ഉഭയ കക്ഷി സമ്മത പ്രകാരം സെക്സിൽ ഏർപ്പെടുന്നതിനു യാതൊരു നിയമപരമായ വിലക്കും ഇല്ലാത്ത രാജ്യമാണ് നമ്മുടേത്.

ഒരു ആണും പെണ്ണും ഹോട്ടലിൽ മുറിയെടുത്ത് താമസിച്ചാൽ അവർ ഭാര്യ ഭർത്താക്കന്മാർ അല്ലെങ്കിൽ 'ഇമ്മോറൽ ട്രാഫ്ഫിക്ക്' ആരോപിച്ച് കേസെടുക്കുകയും വൈദ്യപരിശോധനക്ക് വിധേയമാക്കുകയും ചെയ്യുന്ന അപ്രഖ്യാപിത നിയമം ഉള്ള നാടാണിത്. ഈ നിയമലംഘനമാണ് ആണ് ആദ്യം മാറേണ്ടത്. പ്രായപൂർത്തിയായ സ്ത്രീയും പുരുഷനും ഒന്നിച്ച് താമസിച്ചാൽ, ഇനി അവർ ശാരീരിക ബന്ധം പുലർത്തി എന്ന് തന്നെ ഇരിക്കട്ടെ, അല്ലെങ്കിൽ ഫോൺ സെക്‌സ്, ഓൺലൈൻ സെക്‌സ് അങ്ങനെ തന്റെ ഇഷ്ടാനിഷ്ടങ്ങൾക്കനുസരിച്ച് മറ്റൊരു പൗരനും ശല്യമോ ന്യൂയിസൻസോ ആകാതെ നടത്തുന്ന ഏതൊരു ലൈംഗിത പ്രവൃത്തിയിലും നിയമപരമായോ ധാർമികമായോ യാതൊരു തെറ്റുമില്ല എന്നത് മാത്രമല്ല അത്തരം ഒരു സ്വകാര്യതയെ മാനിക്കാത്തവർ ചെയ്യുന്നത് ക്രിമിനൽ കുറ്റവുമാണ്. ഇതിൽ മാധ്യമങ്ങൾക്കും സ്റ്റേറ്റിനും എന്താണ് കാര്യം. ഒരു പ്രായപൂർത്തിയായ ഒരു സ്ത്രീയ്ക്ക് പരാതിയില്ലെങ്കിൽ അവളുടെ കന്യാചർമ്മത്തിന് കാവൽ നില്ക്കാൻ ഭരണ ഘടനയുടെ ഏത് വകുപ്പാണ് മാധ്യമങ്ങളെയും, പൊതുജനങ്ങളെയും അധികാരപ്പെടുത്തിയത്? പരസ്പര ഇഷ്ട പ്രകാരം സമ്മതത്തോടുകൂടെ പ്രായപൂർത്തിയായ ആണിനും പെണ്ണിനും രാജ്യത്തെ ഏതു ഹോട്ടലിലോ, ലോഡ്ജുകളിലോ, റിസോർട്ടിന്റെ ഒരുമിച്ചു താമസയ്ക്കുന്നതിനോ ലൈംഗിക ബന്ധത്തിൽ ഏർപ്പെടുന്നതിനോ ഈ രാജ്യത്തെ ഒരു നിയമവും തടസമല്ല എന്നതാണ് യാഥാർഥ്യം. പണമോ പാരിതോഷികങ്ങളോ അല്ലെങ്കിൽ മറ്റെന്തെങ്കിലുമോ നൽകി നടത്തുന്ന വാണിജ്യപരമായ ലൈംഗിക ബന്ധം മാത്രമാണ് The Immoral Traffic (Prevention) Act, 1956 പ്രകാരം രാജ്യത്തു കുറ്റകരമായിട്ടുള്ളത്. എന്നാൽ ഈ വസ്തുതകൾ മറച്ചു വച്ചതാണ് നമ്മുടെ നാട്ടിലെ നിയമ പാലകരും, ഹോട്ടൽ ലോഡ്ജ് ഉടമകളും സദാചാര പൊലീസിങ്ങിന്റെ കടക്കൽ വളം വച്ചുകൊടുക്കുന്നതു എന്ന യാഥാർഥ്യം നാം മനസിലാക്കേണ്ടതുണ്ട്. ഇവ ചോദ്യം ചെയ്യാനുള്ള ആർജ്ജവം നാമെന്നു കാണിക്കുന്നു ആണ് മാത്രമേ ഈ കപട സദാചാരത്തിന്റെ ചങ്ങലയിൽ നിന്നും നമ്മുക്ക് സ്വാതന്ത്ര്യം ലഭിക്കുകയുള്ളൂ.

ഇവിടെ ഒരു മന്ത്രിക്കെതിരായാണ് മംഗളം വാർത്ത പുറത്തുകൊണ്ടുവന്നിട്ടുള്ളത്. അവർ സംപ്രേഷണം ചെയ്ത ശബ്ദശകലത്തിൽ മന്ത്രിയുടേതെന്നു പറയാവുന്ന ശബ്ദം മാത്രമേ ഉള്ളൂ. അതിൽ ഉൾപ്പെട്ട സ്ത്രീ പരാതിയുമായി വന്ന ഒരു വീട്ടമ്മയാണെന്നു പറയുന്നു. ആ സ്ത്രീ ഇത്തരം ഒരു സംഭവത്തെ സംബന്ധിച്ച് എവിടെയെങ്കിലും പരാതി നൽകിയിട്ടുണ്ടോ ? ഇല്ലെങ്കിൽ ആ സ്ത്രീയുടേതും അവരുമായി സംസാരിച്ച മന്ത്രിയുടേതുമായ സ്വകാര്യാ സംഭാഷണങ്ങൾ അവരുടെ അറിവില്ലാതെ ആര് റെക്കോർഡ് ചെയ്തു, ആരാണത് മംഗളം മാധ്യമത്തിന് നൽകിയത് ? അങ്ങനൊരു ശബ്ദം ലഭിച്ചെങ്കിലും തീർത്തും സ്വകാര്യമായ അത് സംപ്രേഷണം ചെയ്യാൻ ആ മാധ്യമത്തിന് ആരാണ് അധികാരം നൽകിയത് ? മേൽ സൂചിപ്പിച്ച ചോദ്യങ്ങൾക്കെല്ലാമുള്ള ഉത്തരം കണ്ടെത്തേണ്ടിയിരിക്കുന്നു. ഇതിൽ ഉൾപ്പെട്ട സ്ത്രീ വ്യവസ്ഥാപിത മാർഗ്ഗങ്ങളിലൂടെ പരാതിപ്പെടാൻ തയ്യാറാകാതെ എന്തുകൊണ്ട് മാധ്യമങ്ങൾക്ക് ഈ ശബ്ദ ശകലം കൈമാറി എന്നതും പരിശോധിക്കപ്പെടണം? ഹണി ട്രാപ്പുപോലെ പണത്തിനും പാരിതോഷികങ്ങൾക്കുമായ് സ്ത്രീകൾ ഉന്നതരായ പുരുഷന്മാരെ ട്രാപ്പിലാക്കുന്നതിനെതിരെയും മനസാക്ഷി ഉണരണം എന്നൊരു എളിയ അഭിപ്രായവും എനിക്കുണ്ട് എന്ന് പറഞ്ഞു വയ്ക്കട്ടെ . സംഭവത്തിൽ ഉൾപ്പെട്ട സ്ത്രീ മന്ത്രി സംസാരിക്കുമ്പോൾ മറ്റെന്തെങ്കിലും പ്രേരണയോ, കായ്കബലമോ ചെലുത്താതെ ആ പ്രവൃത്തിയെ അല്ലെങ്കിൽ ലൈംഗിക സംഭാഷണത്തെ പ്രോത്സാഹിപ്പിച്ചെങ്കിൽ ഇത്തരം ഒരു ആരോപണം തന്നെ നിയമപരമായോ അല്ലതെയോ നിലനിൽക്കില്ല. മാത്രവുമല്ല താനുമായി മറ്റൊരു പാരിതോഷികത്തിന്റെയും പേരിലല്ലാതെ ലൈംഗികമായി ബന്ധം സ്ഥാപിക്കാൻ ഒരു സ്ത്രീ തയ്യാറായാൽ അതിൽ ലൈംഗികത കാണുന്നതിനോ, ലൈംഗിക പ്രവൃത്തികളിൽ ഏർപ്പെടുന്നതിനോ മന്ത്രിക്കെന്നല്ല.. രാഷ്ട്രപതിക്കും, പ്രധാനമന്ത്രിക്കും സുപ്രീംകോടത്തായ് ചീഫ് ജസ്റ്റിസ് മുതൽ പിച്ചക്കാരാണ് വരെ അവകാശമുണ്ട താനും.

പറഞ്ഞുവന്നത് എടുപിടീന്ന് ഈ വിഷയത്തിൽ ഒരു നിലപാടെടുക്കാതെ സംഭവത്തെ കുറിച്ച് ഞാൻ മുകളിൽ സൂചിപ്പിച്ച സംശയ ദുരീകരണം നടത്തിയിട്ട് മാത്രമേ ഒരു ധാർമ്മിക നിലപാടെടുക്കാൻ പാടുള്ളൂ. അതുവരെ ഒരു മന്ത്രിയായതുകൊണ്ടു ശശീന്ദ്രന് ഒരു മനുഷ്യാവകാശവും നിഷേധിക്കാൻ പാടുള്ളതല്ല. അദ്ദേഹത്തെ ക്രൂശിക്കാനും പാടില്ല.

ശരാശരി പതിനഞ്ച് വയസ്സാകുന്നതോടെ സ്ത്രീക്കും പുരുഷനും അനുഭവപ്പെടുന്ന സ്വാഭാവിക ശാരീരിക ചോദനയാണ് ലൈംഗികത. ഇരുപത്തഞ്ചിനും മുപ്പത്തിനും ഇടക്ക് ശരാശരി വിവാഹ പ്രായം ഉള്ള അഭ്യസ്തവിദ്യരായ സ്ത്രീ പുരുഷന്മാർ ഈ ഒരു ശാരീരിക ആവശ്യത്തെ പത്തും പതിനഞ്ചും കൊല്ലം പിടിച്ച് വെക്കേണ്ടതുണ്ടോ? അങ്ങനെ പിടിച്ച് വെക്കാൻ കഴിയുമോ ? ഇത്തരം ഒരു ചോദ്യത്തെ അഭിമുഖീകരിക്കാൻ പോലും മലയാളിക്ക് പേടിയാണ്. ലൈംഗികത എന്ന 'പാപം' ഒളിച്ചും പാർത്തും നല്ല പ്രായത്തിൽ ആസ്വദിക്കാത്ത എത്ര സദാചാര വാദികൾ നമ്മുടെ നാട്ടിൽ ഉണ്ട്? ഈ പാപത്തെ പാപമല്ലാതാക്കാൻ വല്ല വഴിയുമുണ്ടോ? ലൈംഗിക 'തിമിരം' ബാധിച്ചവർക്കാണ് ഫ്ലാറ്റിലേക്ക് കേറിപ്പോകുന്ന ഓരോ ആണും പെണ്ണിനെ തേടി വരുന്നവൻ ആണെന്ന് തോന്നുന്നത്.

സെലിബ്രറ്റികളും മറ്റും തങ്ങൾ ചെയ്തിട്ടുള്ള ഫോൺ സെക്സും, ലൈംഗിക കഥകളും അഭിമുഖങ്ങളിൽ മസാലയിൽ ചാലിച്ച് പറയുമ്പോൾ അത് എന്റർടെയിന്മെന്റ് വാർത്തയെന്ന തലക്കെട്ടിൽ വെണ്ടക്കയും ബ്രെയ്ക്കിങ്ങും ആക്കുന്ന മാധ്യമങ്ങൾ രാഷ്ട്രീയ പകപോക്കലിനും, റേറ്റിങ്ങിനുമായ് അത്തരം സ്വകാര്യ വിഷയങ്ങളെ വാർത്തയാക്കി തെറ്റായ സന്ദേശം സമൂഹത്തിനു നൽകുന്നത് ഈ ഇരുപത്തി ഒന്നാം നൂറ്റിൻഡിൽ എത്രകണ്ട് ഭൂഷണമാണെന്നു സ്വയം പരിശോധിക്കേണ്ടിയിരിക്കുന്നു. മംഗളം ചാനലിനും ഈ വിഷയത്തിൽ കുറ്റകരമായ അനാസ്ഥ സംഭവിച്ചിട്ടുണ്ടോ എന്ന് പരിശോധിക്കണം.

എങ്കിൽ ശരി ബാബുവേട്ടാ, രണ്ടു ബോണ്ട പൊതിഞ്ഞെടുത്തോ.. ആ പിന്നെ ഒരു കാര്യം ഇന്നത്തെ പറ്റ് നാളെ തരാം പഴയ പറ്റ് പിന്നെ എടുക്കാം : കാര്യങ്ങളിങ്ങനെയൊക്കെ ആയി, വർഗ്ഗീയ വിഷം തുപ്പുന്ന കൂട്ടിക്കൊടുപ്പു സംഘടനകളായിരുന്നു ഇതുവരെ കപട സദാചാരത്തിന്റെ വക്താക്കളും പോരാളികളുമുണ് ആയിരുന്നതെങ്കിൽ ഇപ്പോൾ ആ ദൗത്യം ബ്രെയ്ക്കിങ് എന്ന പേരിൽ മാധ്യമങ്ങളും സർക്കാർ ചെലവിൽ പിങ്ക് പൊലീസും ഏറ്റെടുത്തിരിക്കുകയാണ്. ഇത് എതിർക്കപ്പെടേണ്ടതാണ് മറ്റൊന്നിനുമല്ല നാലാളുടെ മുൻപിൽ തലയുയർത്തി നമ്മുടെ നാടിന്റെ പേര് പറയാൻ പോലും നമുക്കാവില്ല ഈ മോറൽ പൊലീസ് രാജെയും സർക്കാർ രാജെയും തുടർന്നാൽ.