കെ പി എ സി ലളിതയ്ക്ക് സഹായം അനുവദിച്ചത് സർക്കാറിന് അവസ്ഥ ബോധ്യപ്പെട്ടതുകൊണ്ട്; സംശയമുണ്ടെങ്കിൽ മാധ്യമങ്ങൾ അന്വേഷിച്ച് കണ്ടെത്തണം; സഹായ വിവാദത്തിൽ സർക്കാറിനെ പിന്തുണച്ച് സുരേഷ് ഗോപി; സർക്കാറിന്റെ മുന്നിൽ അപേക്ഷ എത്തിയതിനാലാവാം തുക അനുവദിക്കുന്നതെന്നും എം പി

എറണാകുളം: കെ പി എ സി ലളിതയ്ക്ക് സഹായം അനുവദിച്ചതിൽ തുടരുന്ന വിമർശനത്തിൽ സർക്കാറിനെ പരോക്ഷമായി പിന്തുണച്ച് സുരേഷ് ഗോപി എം പി.സഹായം ലഭിക്കേണ്ട വിഭാഗത്തിൽ പെട്ടവരാണ് കെ പി എ സി ലളിത എന്ന് ബോധ്യമുള്ളതുകൊണ്ടാണ് സർക്കാർ സഹായം അനുവദിച്ചതെന്നും സംശയമുള്ളവർക്ക് അന്വേഷിച്ച് കണ്ടെത്താമെന്നും സുരേഷ് ഗോപി പറഞ്ഞു.

സർക്കാരിന്റെ മുന്നിൽ അപേക്ഷ എത്തിയതിനാലാകാം സാമ്പത്തിക സഹായം നൽകുന്നതെന്നും ഇതൊക്കെ സർക്കാരിന്റെ അവകാശങ്ങളിൽപ്പെട്ട കാര്യങ്ങളാണെന്നും താൻ അഭിപ്രായം പറയുന്നത് ശരിയല്ലെന്നും സുരേഷ് ഗോപി വ്യക്തമാക്കി. സർക്കാരിന്റെ സത്യസന്ധതയിൽ നിങ്ങൾക്ക് സംശയം തോന്നുന്നുണ്ടെങ്കിൽ സത്യാവസ്ഥ അന്വേഷിച്ചു കണ്ടെത്തുകയാണ് വേണ്ടതെന്നും അല്ലാതെ അതിനെ കുറിച്ച് പുലഭ്യം പറഞ്ഞു നടക്കുന്നത് തെറ്റാണെന്നും മാധ്യമങ്ങളോട് സുരേഷ് ഗോപി പറഞ്ഞു.

ചലച്ചിത്രതാരം കെ പി എ സി ലളിതയ്ക്ക് സർക്കാർ ചികിത്സ സഹായം പ്രഖ്യാപിച്ചിരുന്നു. എന്നാൽ ഇതിനെ വിമർശിച്ചു കൊണ്ട് നിരവധി പേർ രംഗത്ത് വരികയും, പാവപ്പെട്ടവർക്ക് ആനുകൂല്യങ്ങൾ നിഷേധിക്കപ്പെടുമ്പോഴും സിനിമാ നടിക്ക് ലക്ഷങ്ങൾ സർക്കാർ നൽകുന്നതിനെ ചോദ്യം ചെയ്യുകയും ചെയ്തു.ഇ സാഹചര്യത്തിലാണ് വിഷയത്തിൽ പ്രതികരണവുമായി സുരേഷ് ഗോപി രംഗത്ത് വന്നത്.

കേന്ദ്രസർക്കാരിന്റെ ഫണ്ടിൽ നിന്ന് കലാകാരന്മാർക്ക് ചികിത്സാ സഹായം നൽകാറുണ്ട്. തന്റെ വകയായി മാത്രം 36 പേർക്ക് വർഷം തോറും സഹായം നൽകുന്നുണ്ട്. കഴിഞ്ഞ ഫെബ്രുവരിയിലെ കണക്ക് അനുസരിച്ച് ഇതിനോടകം രണ്ട് കോടി 50 ലക്ഷം രൂപയുടെ സാമ്പത്തിക സഹായം നൽകി കഴിഞ്ഞുവെന്നും സുരേഷ് ഗോപി വിശദീകരിച്ചു.

ഗുരുതരമായ കരൾ രോഗം പിടിപെട്ട് സ്വകാര്യ ആശുപത്രിയിൽ ചികിത്സയിൽ കഴിയുന്ന എന്നാൽ ചിലർ കരുതുന്നത് പോലെ കെ പി എ സി ലളിതയ്ക്ക് വലിയ സമ്പാദ്യമില്ലെന്നും അഭിനയത്തിലൂടെ ലഭിക്കുന്നത് തുച്ഛമായ പണം മാത്രമായിരുന്നെന്നും മന്ത്രി വി അബ്ദുറഹിമാൻ വ്യക്തമാക്കിയിരുന്നു. നടിയുടെ ഭാഗത്ത് നിന്നും സഹായിക്കണമെന്ന് അപേക്ഷ ലഭിച്ചതിനാലാണ് സർക്കാർ നടപടി കൈക്കൊണ്ടതെന്നും മന്ത്രി വ്യക്തമാക്കിയിരുന്നു.