തിരുവനന്തപുരം: കടുത്ത പോരാണ് അരുവിക്കരയിൽ നടക്കുന്നത്. മുമ്പെങ്ങുമില്ലാത്ത വിധം ചലച്ചിത്ര താരങ്ങളുടെ സാന്നിധ്യവും ഈ തെരഞ്ഞെടുപ്പിനെ ശ്രദ്ധാകേന്ദ്രമാക്കുന്നുണ്ട്. അതിനിടയിലിതാ ഒരു കൗതുകക്കാഴ്ച.

രണ്ടു പാർട്ടികൾക്കായി പ്രചാരണത്തിനിറങ്ങിയ മലയാള സിനിമയിലെ താരങ്ങൾ നേർക്കുനേർ എത്തിയ കാഴ്ചയാണ് അരുവിക്കര മണ്ഡലത്തിലെ ജനങ്ങൾ ഇന്നു കണ്ടത്.

എൽഡിഎഫ് സ്ഥാനാർത്ഥി എം വിജയകുമാറിന്റെ വിജയത്തിനായി റോഡ് ഷോ നടത്തുന്നതിനിടെ നടൻ ഇന്നസെന്റാണ് ബിജെപിക്കുവേണ്ടി പ്രചാരണത്തിന് ഇറങ്ങിയ സുരേഷ് ഗോപിയെ കണ്ടുമുട്ടിയത്.

ഇരുവശങ്ങളിലും കാത്തുനിന്ന ജനസഞ്ചയത്തെ അഭിവാദ്യം ചെയ്തു തുറന്ന വാഹനത്തിൽ വരുമ്പോഴാണ് എതിരെ സുരേഷ് ഗോപിയുടെ കാർ വന്നത്. ഇരുതാരങ്ങളും ഉടൻതന്നെ വാഹനങ്ങൾ നിർത്തി പരസ്പരം അഭിവാദ്യം ചെയ്തു. തുറന്ന വാഹനത്തിൽ നിന്ന് കാറിലിരുന്ന സുരേഷ് ഗോപിയോട് ഇന്നസെന്റ് സംസാരിക്കുകയും ചെയ്തു.

സിനിമാവിശേഷങ്ങളാണോ അതോ ചൂടേറിയ രാഷ്ട്രീയ വിശേഷങ്ങളാണോ കണ്ടുമുട്ടിയ നിമിഷങ്ങളിൽ ഈ ചലച്ചിത്ര താരങ്ങൾ പങ്കുവച്ചതെന്ന ചർച്ചയിലായിരുന്നു അനർഘനിമിഷത്തിന് സാക്ഷികളായ നാട്ടുകാർ. രണ്ടു ദിവസമായി ഇരുതാരങ്ങളും അരുവിക്കര മണ്ഡപത്തിൽ സജീവമാണ്.