സെലിബ്രിറ്റികളെ കാണാനായി ആരാധകർ തിക്കും തിരക്കും ഉണ്ടാക്കാറുള്ളത് പതിവാണ്. എന്നാൽ ഇവ നിയന്ത്രിക്കാൻ സുരക്ഷാജീവനക്കാരെ തയ്യാറാക്കി നിർത്താറുണ്ട്. എന്നാൽ ആരാധകരുടെ തള്ളിക്കയറ്റം നിയന്ത്രിക്കാൻ സുരക്ഷാ ജീവനക്കാർക്ക് കഴിയാതെ വന്നാൽ എന്ത് ചെയ്യും. സൂര്യയ്ക്കാണ് അത്തരമൊരു സംഭവം നേരിടേണ്ടി വന്നത്. ആരാധകരുടെ ബഹളം കാരണം മതിൽ ചാടി രക്ഷപ്പെടുന്ന സൂര്യയുടെ വീഡിയോയാണ് വൈറലാകുന്നത്.

പുതിയ ചിത്രമായ 'താനേ സേർന്ത കൂട്ടത്തിന്റെ' പ്രൊമോഷന് വേണ്ടി ആന്ധ്രാപ്രദേശിലെ റാഹമുട്രിയിൽ എത്തിയപ്പോഴാണ് ആരാധകർ സൂര്യയെ വളഞ്ഞത്. ഗ്യാങ് എന്ന പേരിലാണ് ആന്ധ്രയിൽ സിനിമ റിലീസ് ചെയ്തത്. ഈ സിനിമ പ്രദർശിപ്പിക്കുന്ന തിയേറ്ററിലാണ് സൂര്യ എത്തിയത്. വലിയ ആരാധക കൂട്ടം ഇവിടെ എത്തിയിരുന്നു.

സൂര്യയ്‌ക്കൊപ്പം സുരക്ഷാ ജീവനക്കാർ ഉണ്ടായിരുന്നുവെങ്കിലും വലിയ തിരക്ക് കാരണം താരത്തിന് സംരക്ഷണം ഒരുക്കാനായില്ല. വേദിയിൽ എത്തിയ സൂര്യ ആരാധകരെ അഭിവാദ്യം ചെയ്തു. എന്നാൽ ഈ സമയത്തും വേദിയിലേക്ക് ആരാധകർ തള്ളിക്കയറാൻ ശ്രമിച്ചിരുന്നു. ആരാധകരെ നിയന്ത്രിക്കാൻ സുരക്ഷാ ജീവനക്കാരോട് സൂര്യ ആവശ്യപ്പെട്ടെങ്കിലും ഫലം ഉണ്ടായില്ല.

പരിപാടിക്ക് ശേഷം സൂര്യ തിയേറ്ററിന് പുറത്തേക്ക് ഇറങ്ങാൻ ശ്രമിക്കുമ്പോഴേക്കും ആരാധകർ തമ്പടിച്ചിരുന്നു. താരത്തിനെ ഒന്ന് തൊടാൻ വേണ്ടിയായിരുന്നു ഇത്. അവരുടെ ഇടയിൽപ്പെട്ട സൂര്യയ്ക്ക് പുറത്തേക്ക് കടക്കാൻ വേറെ വഴിയൊന്നുമുണ്ടായിരുന്നില്ല. ഒടുവിൽ തിയേറ്ററിന്റെ ഗേറ്റ് ചാടികടക്കേണ്ടി വന്നു. എന്നാൽ സൂര്യയ്ക്കൊപ്പം ആരാധകരും ചാടി. താരത്തെ തൊടാനും ഫോട്ടോയെടുക്കാനും വീണ്ടും ശ്രമിച്ചു. ഏറെ പാടുപ്പെട്ടാണ് സുരക്ഷാജീവനക്കാർ സൂര്യയെ കാറിൽ കയറ്റിയത്.