അങ്കമാലി ഡയറീസിലെ നായക കഥാപാത്രമായ വിൻസെന്റ് പെപ്പെയായി തകർത്ത് അഭിനയിച്ച ആന്റണി വർഗീസിന്റെ അടുത്ത ചിത്രം സ്വാതന്ത്ര്യം അർദ്ധരാത്രിയിലിന്റെ ഫസ്റ്റ്ലുക്ക് പോസ്റ്റർ നടൻ പൃഥ്വിരാജ് പുറത്തുവിട്ടു. ആക്ഷൻ ത്രില്ലർ ഗണത്തിൽപ്പെടുന്ന ചിത്രത്തിൽ കോട്ടയംകാരനായാണ് ആന്റണി എത്തുക.

ലിജോ ജോസ് പല്ലിശ്ശേരിയുടെ അസ്സോസ്സിയേറ്റ് ആയിരുന്ന ടിനു പാപ്പച്ചനാണ് ചിത്രം സംവിധാനം ചെയ്യുന്നത്. അങ്കമാലി ഡയറീസിന്റെ ചീഫ് അസോസിയേറ്റായിരുന്നു ടിനു പാപ്പച്ചൻ. ദിലീപ് കുര്യൻ തിരക്കഥ ഒരുക്കുന്നു. ബി ഉണ്ണികൃഷ്ണൻ ആദ്യമായി നിർമ്മിച്ച് അവതരിപ്പിക്കുന്ന ചിത്രം കൂടിയാണിത്. നിർമ്മാണത്തിൽ ബി.സി ജോഷിയും പങ്കാളിയാണ്. ലിജോ ജോസ് പല്ലിശ്ശേരിയും ചെമ്പൻ വിനോദ് ജോസും ചിത്രത്തിന്റെ സഹനിർമ്മാതാക്കളാണ്.അങ്കമാലി ഡയറീസിലെ വില്ലൻ കഥാപാത്രമായ യു ക്ലാംപ് രാജനെ അവതരിപ്പിച്ച ടിറ്റൊ വിൽസൺ ഒരു പ്രധാനവേഷത്തിൽ എത്തുന്നുണ്ട്.

ഫിനാൻസ് കമ്പനി മാനേജരായ കോട്ടയംകാരൻ യുവാവിനെയാണ് ആന്റണി അവതരിപ്പിക്കുന്നത്. ഒരു രാത്രിയിലെ സംഭവം അവന്റെ ജീവിതം മാറ്റി മറിക്കുന്നതും ആ പ്രശ്‌നം പരിഹരിക്കാൻ നടത്തുന്ന ശ്രമങ്ങളുമാണ് ചിത്രത്തിന്റെ ഇതി വൃത്തം. കോട്ടയം, മംഗലാപുരം, ഓസ്‌ട്രേലിയ എന്നിവിടങ്ങളാണ് പ്രധാനലൊക്കേഷൻ.