എയ്ഡഡ് നിയമനങ്ങളിലെ സർക്കാർ നിയന്ത്രണം; ശമ്പള കമ്മീഷൻ ശുപാർശകളെ എതിർത്ത് സിറോ മലബാർ സഭ; ന്യൂനപക്ഷാവകാശങ്ങളെ ഹനിക്കുന്നതെന്ന് പ്രതികരണം

കൊച്ചി: സംസ്ഥാന സർക്കാരിന് പതിനൊന്നാം ശമ്പള കമ്മീഷൻ നൽകിയ ശുപാർശകളിൽ ന്യൂനപക്ഷാവകാശങ്ങളെ ഹനിക്കുന്നതും എയ്ഡഡ് സംവിധാനങ്ങളെ തകർക്കുന്നതുമായ നിദേശങ്ങൾ ഉൾപ്പെട്ടത് പ്രതിഷേധാർഹമെന്ന് സിറോ മലബാർ സഭ.

നിയമനത്തിൽ മാനേജുമെന്റുകൾക്കുള്ള അവകാശം നഷ്ടപ്പെടുത്തുന്ന ഏത് തീരുമാനത്തെയും ശക്തമായി എതിർക്കുമെന്നും സിറോ മലബാർ പബ്ലിക് അഫയേഴ്‌സ് കമ്മീഷൻ ചെയർമാൻ ആർച്ച് ബിഷപ് ആൻഡ്രൂസ് താഴത്ത് വ്യക്തമാക്കി.

എയ്ഡഡ് നിയമനങ്ങൾ പിഎസ് സിക്ക് വിടുന്നതോ പ്രത്യേക ബോർഡ് രൂപീകരിക്കുന്നതോ അംഗീകരിക്കാനാകില്ല. ഇന്ത്യൻ ഭരണഘടനയിൽത്തന്നെ ന്യൂനപക്ഷങ്ങൾക്ക് വിദ്യാഭ്യാസ അവകാശങ്ങൾ ഉറപ്പാക്കിയിട്ടുണ്ട്.

പതിനൊന്നാം ശമ്പള കമ്മീഷൻ ശുപാർശകളുടെ അടിസ്ഥാനത്തിൽ സർക്കാർ തുടർ നടപടികളുമായി മുന്നോട്ട് പോയാൽ സ്വീകരിക്കേണ്ട നടപടികൾ സംബന്ധിച്ച് ഓൺലൈനായി ബിഷപ്പുമാരും വൈദികരും അടങ്ങിയ സമിതി യോഗം ചേർന്നാണ് നിലപാട് അറിയിച്ചത്.