സിസ്റ്റർ ലൂസി കളപ്പുരക്ക് മഠത്തിൽ തുടരാമെന്ന് കോടതി; കോടതിയുടെ ഉത്തരവ് സിസ്റ്ററിന്റെ പരാതിയിൽ അന്തിമ വിധിയുണ്ടാകുന്നത് വരെ മഠത്തിൽ തുടരാൻ; നീതിയുടെ വിജയമാണ് ഉണ്ടായതെന്നും സിസ്റ്റർ ലൂസി

മാനന്തവാടി: സിസ്റ്റർ ലൂസി കളപ്പുരക്ക് മഠത്തിൽ തുടരാമെന്ന് കോടതി. മാനന്തവാടി മുൻസിഫ് കോടതിയുടേതാണ് ഉത്തരവ്. സഭയിൽ നിന്ന് പുറത്താക്കിയതിനെതിരായി സിസ്റ്റർ ലൂസി നൽകിയ ഹരജിയിൽ അന്തിമവിധി വരുന്നത് വരെ മഠത്തിൽ തുടരാമെന്ന് കോടതി വ്യക്തമാക്കി. വിധിയിൽ സന്തോഷമുണ്ടെന്നും നീതിയുടെ വിജയമാണ് ഉണ്ടായതെന്നും സിസ്റ്റർ ലൂസി പ്രതികരിച്ചു.

നേരത്തെ ഇതുമായി ബന്ധപ്പെട്ട് ഹൈക്കോടതി ഉത്തരവും പുറത്ത് വന്നിരുന്നു. സിസ്റ്റർ ലൂസി കളപ്പുരയെ വയനാട് കാരയ്ക്കാമലയിലെ മഠത്തിൽ നിന്നും ഇറക്കിവിടാൻ ഉത്തരവിറക്കാനാവാല്ലെന്നായിരുന്നു ഹൈക്കോടതി നിലപാട്. എന്നാൽ മഠത്തിൽ താമസിക്കുമ്പോൾ ലൂസി കളപ്പുരക്ക് സുരക്ഷയൊരുക്കാൻ നിർദേശിക്കാനാവില്ലെന്നും കോടതി വ്യക്തമാക്കിയിരുന്നു.

മഠത്തിൽ താമസിക്കുന്നതിന് പൊലീ സുരക്ഷ ആവശ്യപ്പെട്ടുള്ള സിസ്റ്റർ ലൂസിയുടെ ഹരജി തീർപ്പാക്കിയുള്ള ഉത്തരവിലാണ് കോടതി നിലപാട് വ്യക്തമാക്കിയത്. കാരയ്ക്കാമലയിലെ മഠത്തിന് പുറത്ത് എവിടെ താമസിച്ചാലും സുരക്ഷ നൽകാമെന്നും കോടതി ഉത്തരവിൽ പറഞ്ഞിരുന്നു.