മനാമ :ഇന്ത്യയിലെ എഴുത്തുകാർക്കും സാംസ്‌കാരിക നേതാക്കൾക്കും പത്രപ്രവർത്തകർക്കും നേരെ നടക്കുന്ന അക്രമങ്ങൾക്കെതിരെ ഐ വൈ സി സി ബഹ്റൈൻ ദേശീയ കമ്മറ്റിയുടെ നേതൃത്വത്തിൽ സംഘടിപ്പിച്ച 'തൂലിക പ്രതിഷേധം 'ശ്രദ്ധേയമായി. ആശയങ്ങളെയും അഭിപ്രായങ്ങളെയും ഇല്ലായ്മ ചെയ്യുന്ന രീതി യാണ് ഇന്ന് ഇന്ത്യയിൽ നടക്കുന്നത്. ഗാന്ധിജിയെ കൊന്ന അതെ തോക്ക് തന്നെയാണ് ഗൗരിയുടെ നേരെ ചലിച്ചത്. നമുക്ക് നേരെയും ഈ തോക്ക് ചലിക്കുന്ന കാലം വിദൂരമല്ല. പ്രവാസ ലോകത്തെ മറ്റ് യുവജന സംഘടനകളെയും പങ്കെടുപ്പിച്ച് കൊണ്ട് കൂട്ടായ്മകൾ സംഘടിപ്പിക്കുവാൻ ഐ വൈ സി സി മുന്നോട്ട് വരണമെന്ന് പ്രതിഷേധ സദസ്സ് ഉത്ഘാടനം ചെയ്തുകൊണ്ട് പ്രമുഖ മാധ്യമ പ്രവർത്തകൻ സിറാജ് പള്ളിക്കര അഭിപ്രായപ്പെട്ടു.

ഇതുപോലുള്ള പ്രതിഷേധ പരിപാടികൾ പ്രവാസലോകത്ത് സംഘടിപ്പിക്കുന്നത് പ്രശംസനീയമാണ് അദ്ദേഹം അഭിപ്രായപ്പെട്ടു. ഐ വൈ സി സി ദേശീയ പ്രസിഡന്റ് ബേസിൽ നെല്ലിമറ്റം അധ്യക്ഷത വഹിച്ച യോഗത്തിനു ജനറൽ സെക്രട്ടറി ഫാസിൽ വട്ടോളി സ്വാഗതവും ട്രഷറർ ഹരി ഭാസ്‌കർ നന്ദിയും അറിയിച്ചു