ടൊവിനോ തോമസ് പ്രധാനവേഷത്തിലെത്തിയ ഫെലിനി ചിത്രം തീവണ്ടി തീയേറ്ററുകളിൽ വിജയകരമായി മുന്നേറിക്കൊണ്ടിരിക്കുകയാണ്. ചെയിൻ സ്മോക്കറുടെ കഥ പറയുന്ന ഈ ചിത്രം കണ്ട് സിഗരറ്റ് വലി അവസാനിപ്പിച്ചുവെന്നാണ് നിരവധി ആരാധകർ അവകാശപ്പെടുന്നത്. ധാരാളം പേർ ടൊവീനോയ്ക്ക് നന്ദി അറിയിച്ച് സന്ദേശങ്ങൾ അയച്ചു. ആരാധകരുടെ അഭിപ്രായങ്ങൾ തന്റെ ഇൻസ്റ്റാഗ്രാം പേജിലൂടെ താരം പങ്കുവെച്ചു. എല്ലാവർക്കും നന്ദി അറിയിക്കുകയും ചെയ്തു.

നവാഗതനായ ഫെലിനി സംവിധാനം ചെയ്യുന്ന ചിത്രത്തിൽ പുതുമുഖ നടി സംയുക്ത മേനോനാണ് നായികയാവുന്നത്. ചിത്രത്തിൽ തൊഴിൽരഹിതനായ ബിനീഷ് എന്ന കഥാപാത്രത്തെയാണ് ടൊവിനോ അവതരിപ്പിക്കുന്നത്. ചിത്രത്തിൽ ടൊവിനോയുടെ കാമുകിയുടെ റോളിലാണ് നടി എത്തുന്നത്.

ടൊവിനോയ്ക്കു പുറമെ സുരാജ് വെഞ്ഞാറമൂടും ചിത്രത്തിൽ ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. സൈജു കുറുപ്പ്, സുരഭി ലക്ഷ്മി, സുധീഷ് തുടങ്ങിയവരാണ് ചിത്രത്തിൽ മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. കോഴിക്കോട് ജില്ലയിലെ പയ്യോളിയിലാണ് ചിത്രത്തിന്റെ പ്രധാനഭാഗങ്ങൾ ചിത്രീകരിച്ചത്.

ആക്ഷേപ ഹാസ്യരീതിയിൽ ഒരുങ്ങുന്ന ചിത്രത്തിന് തിരക്കഥ രചിച്ചിരിക്കുന്നത് ദുൽഖറിന്റെ സെക്കൻഡ് ഷോയ്ക്കായി രചന നിർവ്വഹിച്ച വിനി വിശ്വലാലാണ്.