പ്രതികരണം മയപ്പെടുത്തിയിട്ടും കാര്യമുണ്ടായില്ല; സോഷ്യൽ മീഡിയയിൽ കാലുറക്കാതെ ട്രംപ്; കൊട്ടിഘോഷിച്ച് തുടങ്ങിയ ബ്ലോഗും പൂട്ടി; ബ്ലോഗിനെതിരെ നടപടി വെറും ഒരു മാസത്തിനുള്ളിൽ

വാഷിങ്ങ്ടൺ: സമൂഹമാധ്യമങ്ങളിൽ മുൻ യുഎസ് പ്രസിഡന്റ് ഡോണൾഡ് ട്രംപിന്റെ ശനിദശ തുടരുന്നു. ട്വിറ്റർ, ഫേസ്‌ബുക്ക് അടക്കമുള്ള സമൂഹമാധ്യമങ്ങളിൽ നിന്നും വരെ തിരിച്ചടികിട്ടിയ ട്രംപിന് ഇപ്പോൾ ബ്ലോഗ് ആണ് നഷ്ടപ്പെട്ടിരിക്കുന്നത്. തുടങ്ങി ഒരു മാസത്തിനുള്ളിൽ തന്നെ ബ്ലോഗ് മാറ്റി. അദ്ദേഹത്തിന്റെ വെബ്സൈറ്റിൽ നിന്നും ഇതു നീക്കംചെയ്തിട്ടുണ്ട്. ജനുവരി ആറിന് നടന്ന ക്യാപിറ്റൽ കലാപത്തെത്തുടർന്ന് ട്വിറ്റർ, ഫേസ്‌ബുക്ക് ഉൾപ്പെടെയുള്ള സോഷ്യൽ മീഡിയ പ്ലാറ്റ്ഫോമുകളിൽ നിന്ന് ട്രംപിനെ വിലക്കിയിരുന്നു. ട്രംപിനെ നിരോധിച്ച സോഷ്യൽ മീഡിയ പ്ലാറ്റ്ഫോമുകൾ അദ്ദേഹത്തിന്റെ ഓൺലൈൻ പ്രവർത്തനം കൂടുതൽ അക്രമത്തിന് കാരണമാകുമെന്ന് ആശങ്കപ്പെട്ടിരുന്നു.

ട്രംപിന്റെ മുതിർന്ന സഹായി ജേസൺ മില്ലർ തന്റെ നിലവിലെ ബ്ലോഗ് ഷട്ട്ഡൗൺ ചെയ്യുന്നത് ഒരു പുതിയ സോഷ്യൽ മീഡിയ പ്ലാറ്റ്ഫോമിൽ ചേരുന്നതിന് മുന്നോടിയാണെന്നാണ് അഭിപ്രായപ്പെട്ടത്. ട്രംപിന് ജനുവരിയിൽ നിരോധനത്തിന് മുമ്പായി ട്വിറ്റർ, ഫേസ്‌ബുക്ക്, സ്നാപ്ചാറ്റ്, യൂട്യൂബ് എന്നിവയിൽ ദശലക്ഷക്കണക്കിന് അനുയായികളുണ്ടായിരുന്നു. അദ്ദേഹത്തിന്റെ മുൻ അനുയായികളുമായി താരതമ്യപ്പെടുത്തുമ്പോൾ അദ്ദേഹത്തിന്റെ ബ്ലോഗിലെ പ്രതികരണത്തിനു കാര്യമായ ചൂട് കുറവായിരുന്നു. എങ്കിലും യുഎസ് പ്രസിഡന്റിന്റെ ഔദ്യോഗിക വർത്തമാനങ്ങൾ എന്ന നിലയ്ക്ക് അതിനു കാര്യമായ പ്രസക്തിയുണ്ടായിരുന്നു താനും.

ഔദ്യോഗിക പദവിയിൽ നിന്നുള്ള ഏറ്റവും പുതിയ പ്രസ്താവനകളും ഹൈലൈറ്റുകളും കണ്ടെത്താനുള്ള ഒരു വിഭവമാകും ബ്ലോഗ് എന്ന് ഇതിന്റെ ലോഞ്ച് സമയത്ത് മില്ലർ കുറിച്ചിരുന്നു, പക്ഷേ അത് ഒരു പുതിയ സോഷ്യൽ മീഡിയ പ്ലാറ്റ്ഫോം ആയിരുന്നില്ല. ട്രംപിന്റെ വെബ്സൈറ്റിന്റെ ഉപവിഭാഗമായിരുന്നു ഈ പ്ലാറ്റ്ഫോം, ട്രംപിന്റെ ഒരു വീഡിയോയും ഡെമോക്രാറ്റുകളെക്കുറിച്ചുള്ള അദ്ദേഹത്തിന്റെ ചില അഭിപ്രായങ്ങളും ഇതിലുണ്ടായിരുന്നു. നിശബ്ദതയുടെയും നുണകളുടെയും കാലഘട്ടത്തിൽ, സ്വാതന്ത്ര്യത്തിന്റെ ഒരു ദീപം ഉയർന്നുവരുന്നു. സ്വതന്ത്രമായും സുരക്ഷിതമായും സംസാരിക്കാനുള്ള ഒരിടം എന്നായിരുന്നു ആ വീഡിയോയിൽ ട്രംപ് പറഞ്ഞത്.

കഴിഞ്ഞ വർഷം, യുഎസിലെ പ്രസിഡന്റ് തിരഞ്ഞെടുപ്പിന് മുമ്പ്, തിരഞ്ഞെടുപ്പ് ബാലറ്റ് സമ്പ്രദായത്തിൽ പിഴവുണ്ടെന്ന് ട്രംപിന്റെ ഒന്നിലധികം ട്വീറ്റുകളെ തുടർന്നു ജനുവരി 8 ന് ട്വിറ്റർ സ്ഥിരമായി അദ്ദേഹത്തിന്റെ അക്കൗണ്ട് സസ്പെൻഡ് ചെയ്തു. അക്കാലത്ത് അദ്ദേഹത്തിന് 88 ദശലക്ഷത്തിലധികം ഫോളോവേഴ്സാണ് ട്വിറ്ററിൽ ഉണ്ടായിരുന്നത്. ദശലക്ഷക്കണക്കിന് അനുയായികളുണ്ടായിരുന്ന സ്നാപ്ചാറ്റ്, യൂട്യൂബ്, ട്വിച് എന്നിവയും അദ്ദേഹത്തിന്റെ അക്കൗണ്ട് നിരോധിക്കുകയോ അനിശ്ചിതമായി താൽക്കാലികമായി നിർത്തിവയ്ക്കുകയോ ചെയ്തു. ജനുവരി ആറിന് ശേഷമുള്ള കലാപത്തിന് ശേഷമുള്ള അധിക അക്രമ സാധ്യതകൾ ചൂണ്ടിക്കാട്ടി ഫേസ്‌ബുക്കും ഇൻസ്റ്റാഗ്രാമും ട്രംപിനെ രണ്ട് പ്ലാറ്റ്ഫോമുകളിൽ നിന്നും അനിശ്ചിതമായി സസ്പെൻഡ് ചെയ്തു.