ദര്ശന് പിന്നാലെ പവിത്ര ഗൗഡയും അറസ്റ്റില്‍
ബെംഗളൂരു: കൊലപാതക കേസില്‍ കന്നഡ താരം ദര്ശന് അറസ്റ്റിലായതിന് പിന്നാലെ സുഹൃത്തും, നടിയുമായ പവിത്ര ഗൗഡയെ പൊലീസ് അറസ്റ്റ് ചെയ്തു. അന്നപൂര്‍ണശ്വരി നഗര്‍ പൊലീസ് സ്റ്റേഷനില്‍ പൊലീസ് നടിയെ ചോദ്യം ചെയ്യുകയാണ്.
തന്റെ സുഹൃത്തായ പവിത്ര ഗൗഡയ്ക്ക് അശ്ലീല സന്ദേശങ്ങള്‍ അയച്ചതിന്റെ പേരില്‍ രേണുക സ്വാമി എന്നയാളെ തന്റെ ഫാം ഹൗസില്‍ വിളിച്ച് വരുത്തി കൊലപ്പെടുത്തി, ഓടയില്‍ തള്ളി എന്നതാണ് ദര്ശന് എതിരായ കേസ്. കേസുമായി ബന്ധപ്പെട്ട് 10 പേര്‍ ഇതിനകം അറസ്റ്റിലായിട്ടുണ്ട്. ചിത്രദുര്‍ഗ സ്വദേശായിയായ രേണുക സ്വാമി ഒരു മെഡിക്കല്‍ സ്റ്റോറില്‍ ജോലി ചെയ്തിരുന്ന ആളാണ്. ജൂണ്‍ 9 നാണ് രേണുക സ്വാമിയുടെ മൃതദേഹം കണ്ടെത്തിയത്. കേസുമായി ബന്ധപ്പെട്ട ദര്‍ശനെ ഇന്ന് രാവിലെ 8.30 ന് വിജയനഗര്‍ എസിപി ചന്ദനാണ് അറസ്റ്റ് ചെയ്തത്. മൈസുരുവിലെ റാഡിസണ്‍ ബ്ലൂ ഹോട്ടലില്‍ സിനിമാ ഷൂട്ടിങ്ങിനായി താമസിക്കവേയാണ് അറസ്റ്റ്.
കൊല്ലപ്പെട്ട രേണുക സ്വാമി പവിത്ര ഗൗഡയ്ക്ക് അശ്ലീല സന്ദേശങ്ങള്‍ അയയ്ക്കുക മാത്രമല്ല, തന്നെ വിവാഹം കഴിക്കണമെന്ന് ആവശ്യപ്പെട്ട് നിരന്തരം ശല്യം ചെയ്തുവരികയായിരുന്നു എന്നും റിപ്പോര്‍ട്ടുകള്‍ ഉണ്ട്. പവിത്ര ഗൗഡയുടെ പ്രേരണയാല്‍ ആണോ ദര്ശന് കൊല നടത്തിയത് എന്നാണ് അന്വേഷിക്കുന്നത്.
ആരാണ് പവിത്ര ഗൗഡ?
കന്നഡ നടിയായ പവിത്ര ഗൗഡ ജനുവരിയില്‍ താനും ദര്‍ശനും ഒത്തുളള ചിത്രങ്ങള്‍ ഇന്‍സ്റ്റയില്‍ പോസ്റ്റ് ചെയ്തത് വാര്‍ത്തയായിരുന്നു. താനും ദര്‍ശനും ഒരു പതിറ്റാണ്ടായി സ്‌നേഹത്തിലാണെന്ന് സൂചിപ്പിക്കുന്നതായിരുന്നു ഇന്‍സ്റ്റ പോസ്റ്റ്. ഫോട്ടോ സോഷ്യല്‍ മീഡിയയില്‍ വലിയ ചര്‍ച്ചയായി. എന്നാല്‍, പവിത്ര ഗൗഡ ഇതാദ്യമായല്ല സോഷ്യല്‍ മീഡിയയില്‍ കോളിളക്കം ഉണ്ടാക്കുന്നത്.
2017 ല്‍, ദര്‍ശനും താനും ഒപ്പമുള്ള പ്രൊഫൈല്‍ ഫോട്ടോ ട്വിറ്ററിലും ഫേസ്ബുക്കിലും പവിത്ര ഗൗഡ ഇട്ടതും വിവാദമായിരുന്നു. ദര്‍ശന്റെ ആരാധകര്‍ പൊങ്കാലയിട്ടതോടെ ഫോട്ടോ ഡിലീറ്റ് ചെയ്യേണ്ടി വന്നു. 2024 നവംബറില്‍, തന്റെ മകള്‍ ഖുഷിയുടെ പിറന്നാള്‍ ആഘോഷത്തിന്റെ വീഡിയോ പവിത്ര ഷെയര്‍ ചെയ്തിരുന്നു. ദര്ശന് കേക്ക് മുറിക്കുന്നതും, അവര്‍ക്കൊപ്പം നൃത്തം ചെയ്യുന്നതും എല്ലാം വീഡിയോയില്‍ കാണാം.
ചത്രിഗാലു സര്‍ ചത്രിഗാലു, ബാത്താസ് തുടങ്ങിയ ചിത്രങ്ങളില്‍ പവിത്ര ഗൗഡ വേഷമിട്ടിട്ടുണ്ട്. 2015 മുതല്‍ തന്നെ ദര്‍ശനും പവിത്രയും ആയുള്ള ബന്ധം ഗോസിപ്പ് കോളങ്ങളില്‍ നിറഞ്ഞിരുന്നു. ദര്‍ശന്റെ സമീപകാല ഹിറ്റ് ചിത്രം കാടേരയെ വാഴ്ത്തിയും പവിത്ര ഗൗഡ പോസ്റ്റിട്ടിരുന്നു.
