മമ്മൂട്ടിയെ നായകനാക്കി ഖാലിദ് റഹ്മാൻ സംവിധാനം ചെയ്യുന്ന ചിത്രം ഉണ്ടയിൽ ബോളിവുഡിലെ സൂപ്പർതാരങ്ങളും അണിനിരക്കുമെന്ന് സൂചന.മൂന്ന് മികച്ച ബോളിവുഡ് താരങ്ങളാണ് ചിത്രത്തിൽ അഭിനയിക്കുന്നതെന്നാണ് ഇപ്പോൾ പുറത്ത് വരുന്ന റിപ്പോർട്ടുകൾ സൂചിപ്പിക്കുന്നത്.പിപ്പീലി ലൈവ്, ന്യൂട്ടൻ എന്നീ ചിത്രങ്ങളിലൂടെ ശ്രദ്ധേയനായ ഓംകാർ ദാസ് മണിക്പുരി, മാസാനിലൂടെ ശ്രദ്ധേയനായ ഭഗ്വാൻ തിവാരി, ട്യൂബ് ലൈറ്റ് എന്നീ ചിത്രത്തിൽ മികച്ച പ്രകടനം കാഴ്ച വെച്ച ചീൻ ഹോ ലിയാവോ എന്നിവരാണ് ചിത്രത്തിൽ മമ്മൂട്ടിയോടൊപ്പം അഭിനയിക്കുക.

സിനിമയിൽ സംഘട്ടന രംഗങ്ങളൊരുക്കുന്നത് ആമിറിന്റെ ദംഗലിനും രൺവീർ സിങിന്റെ ബാജിറാവു മസ്താനിക്കും ആക്ഷനൊരുക്കിയ ശ്യാം കൗശലാണ്. ഈ രണ്ടു ചിത്രങ്ങൾക്ക് പുറമേ പത്മാവതി, സഞ്ജു, ധൂം 3 , ഗുണ്ടേ, കൃഷ് 3 , രാവൺ തുടങ്ങിയ ഒട്ടേറെ ചിത്രങ്ങളിലൂടെ തന്റെ കഴിവ് തെളിയിച്ച ആളാണ് ശ്യാം. ഉത്തരേന്ത്യയിൽ ആണ് ഉണ്ട ഷൂട്ട് ചെയ്യുന്നത്.

മലയാളത്തിൽ നിന്നുള്ള ഒട്ടേറെ താരങ്ങളും ഈ ചിത്രത്തിന്റെ താര നിരയിൽ ഉണ്ടാകും.പ്രധാനകഥാപാത്രങ്ങളെ അവതരിപ്പിക്കാൻ ഷൈൻ ടോം ചാക്കോ, ജേക്കബ് ഗ്രിഗറി, അർജുൻ അശോകൻ, അലൻസിയർ, ദിലീഷ് പോത്തൻ , ലുക്ക്മാൻ, സുധി കോപ്പ എന്നിവരാണ് മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. മൂവി മിൽ ന്റെ ബാനറിൽ കൃഷ്ണൻ സേതുകുമാർ ആണ് ഈ ചിത്രം നിർമ്മിക്കുന്നത്.

അനുരാഗ കരിക്കിൻ വെള്ളം എന്ന വിജയചിത്രത്തിന് ശേഷം ഖാലിദ് റഹ്മാൻ സംവിധാനം ചെയ്യുന്ന ചിത്രമാണ് ഉണ്ട്. മമ്മൂട്ടിയാണ് ചിത്രത്തിലെ നായകൻ. പൊലീസ് ഓഫീസറുടെ വേഷത്തിലാണ് മമ്മൂട്ടി ചിത്രത്തിലെത്തുന്നത്. മമ്മൂട്ടി ഇതിന് മുൻപ് ചെയ്യാത്ത ഒരു കഥാപാത്രത്തെയാണ് ചിത്രത്തിൽ അവതരിപ്പിക്കുന്നതെന്ന് നിർമ്മാതാക്കളിൽ ഒരാളായ കൃഷ്ണൻ സേതുകുമാർ പറഞ്ഞിരുന്നു.

ചിത്രത്തിന്റെ അണിയറ പ്രവർത്തകർ വളരെ ശ്രദ്ധേയമാണ്. ചിത്രത്തിന്റെ തിരക്കഥ ഒരുക്കിയിരിക്കുന്നത് ഹർഷദാണ്. ജിഗർതണ്ട, സൂര്യ 37 എന്നീ ചിത്രങ്ങളുടെ ഛായാഗ്രാഹകൻ ഗാവെമികാണ് ക്യാമറ കൈകാര്യം ചെയ്യുന്നത്. ചിത്രത്തിന്റെ സംഗീതം പ്രശാന്ത് പിള്ളയാണ്.ജെമിനി സ്റ്റുഡിയോസും മൂവി മില്ലിൽസും ചേർന്നാണ് ചിത്രം നിർമ്മിക്കുന്നത്.