വിവാഹ മോചനം വേണമെന്ന് ആവശ്യപ്പെട്ടിരുന്നുവെന്ന് കുറ്റസമ്മതം; അടിയും തെറിവിളിയും എല്ലാം ഉള്ളതു തന്നെന്നും മൊഴി; പീഡിപ്പിച്ചത് ഭാര്യ ആത്മഹത്യ ചെയ്യുമെന്ന് പ്രതീക്ഷിക്കാതെയെന്ന വിചിത്രമായ മറുപടി; നടൻ ഉണ്ണി രാജൻ പി ദേവിനെ ജയിലിലാക്കി നെടുമങ്ങാട് കോടതി; ശാന്തമ്മയ്‌ക്കെതിരേയും തെളിവുണ്ടെന്ന് പൊലീസ്
തിരുവനന്തപുരം: ഭാര്യയെ ശാരീരികമായും മാനസികമായും പീഡിപ്പിച്ചെന്ന് സമ്മതിച്ച് നടൻ ഉണ്ണി രാജൻ പി ദേവിന്റെ കുറ്റസമ്മതം. ഭാര്യയുടെ ആത്മഹത്യയുമായി ബന്ധപ്പെട്ട കേസിൽ ഉണ്ണി രാജൻ പി. ദേവിനെ കോടതിയിൽ ഹാജരാക്കി റിമാൻഡ് ചെയ്തു. 14 ദിവസത്തേക്കാണ് റിമാൻഡ് ചെയ്തത്. പ്രതിയെ ജയിലിലേക്ക് മാറ്റി.
മരിക്കുന്നതിന് തൊട്ടുമുമ്പ് പ്രിയങ്കയ്ക്ക് ഒരു ഫോൺകോൾ വന്നതായും ഇതിനു ശേഷമാണ് പ്രിയങ്ക മുറിയിൽ കയറി ജീവനൊടുക്കിയതെന്നും വീട്ടുകാർ നേരത്തെ പറഞ്ഞിരുന്നു. ഈ ഫോൺകോൾ ഉണ്ണിയുടെതാണെന്നും പൊലീസ് സ്ഥിരീകരിച്ചു. സ്വന്തം വീട്ടിലെത്തിയ പ്രിയങ്കയെ അന്ന് ഫോണിലൂടെയും ഉണ്ണി ശകാരിച്ചിരുന്നതായാണ് പൊലീസ് പറയുന്നത്. നിന്നെ എനിക്ക് ഇനി വേണ്ടെന്നും ഭാര്യയായി ഉൾക്കൊള്ളാനാകില്ലെന്നുമാണ് ഉണ്ണി പ്രിയങ്കയോട് പറഞ്ഞത്. ഇതിനു പിന്നാലെ പ്രിയങ്ക ജീവനൊടുക്കുകയായിരുന്നു എന്നായിരുന്നു സംശയം. എന്നാൽ ഭർത്താവിനെ പ്രിയങ്ക അങ്ങോട്ട് വിളിക്കുകയായിരുന്നു. അപ്പോൾ വിവാഹ മോചനം കൂടിയേ തീരൂവെന്ന് നിലപാട് ഉണ്ണി എടുത്തു. ഭീഷണിയും പെടുത്തി. ഇതോടെയാണ് ആത്മഹത്യ ചെയ്തത്.
കുറ്റമെല്ലാം സമ്മതിച്ച ഉണ്ണിയുടേത് വിചിത്രമായ കുറ്റസമ്മതമാണ്. ഭാര്യ ആത്മഹത്യ ചെയ്യുമെന്ന് അറിയാതെയാണ് ഇതെല്ലാം കാട്ടിക്കൂട്ടിയതെന്നാണ് ഉണ്ണി പറയുന്നത്. വെമ്പായം സ്വദേശിയും ഉണ്ണിയുടെ ഭാര്യയുമായ പ്രിയങ്ക(25) മെയ് 12-ാം തീയതിയാണ് വീട്ടിനുള്ളിൽ ജീവനൊടുക്കിയത്. ഭർത്താവായ ഉണ്ണിയുടെയും ഭർതൃവീട്ടുകാരുടെയും ശാരീരിക, മാനസിക പീഡനങ്ങളെ തുടർന്നാണ് പ്രിയങ്ക ജീവനൊടുക്കിയതെന്നായിരുന്നു കുടുംബത്തിന്റെ പരാതി. മരിക്കുന്നതിന് തലേദിവസം ഇതേ കാര്യങ്ങൾ ഉന്നയിച്ച് പ്രിയങ്കയും വട്ടപ്പാറ പൊലീസിൽ പരാതി നൽകിയിരുന്നു. തുടർന്നാണ് നെടുമങ്ങാട് ഡിവൈ.എസ്‌പി. ജെ.ഉമേഷിന്റെ നേതൃത്വത്തിലുള്ള പൊലീസ് സംഘം കഴിഞ്ഞദിവസം ഉണ്ണി രാജൻ പി.ദേവിനെ അങ്കമാലിയിൽനിന്ന് അറസ്റ്റ് ചെയ്തത്.
മെയ് പത്താം തീയതി അങ്കമാലിയിലെ വീട്ടിൽനിന്ന് നേരിട്ട പീഡനവും ഉപദ്രവവുമാണ് പ്രിയങ്കയെ ആത്മഹത്യയിലേക്ക് നയിച്ചതെന്നാണ് പൊലീസിന്റെ കണ്ടെത്തൽ. ഉണ്ണിയുടെ അമ്മയ്‌ക്കെതിരേയും പരാതിയുണ്ട്. അവരും കേസിൽ പ്രതിയാണ്. ശാന്തമ്മ കോവിഡ് പോസ്റ്റീവാണ്. അതിന് ശേഷം അവരേയും അറസ്റ്റു ചെയ്യും. നേരത്തെ കോവിഡ് പോസിറ്റീവായിരുന്ന ഉണ്ണിയെ കോവിഡ് പരിശോധനയ്ക്കു ശേഷമാണ് കഴിഞ്ഞ ദിവസം അറസ്റ്റു ചെയ്തത്. തുടർന്ന് ഇവർ വാടകയ്ക്കു താമസിച്ചിരുന്ന കാക്കനാട്ടെ ഫ്‌ളാറ്റിലെത്തിച്ച് തെളിവെടുപ്പു നടത്തി. ഈ ഫ്‌ളാറ്റ് വാടകയ്ക്ക് എടുക്കുന്നതിനു വേണ്ടിയാണ് കൂടുതൽ സ്ത്രീധനമാവശ്യപ്പെട്ട് ഉണ്ണിയും അമ്മയും ചേർന്ന് പ്രിയങ്കയെ പീഡിപ്പിച്ചിരുന്നതെന്ന് പരാതിയിൽ പറഞ്ഞിരുന്നു.
അങ്കമാലിയിൽ ഉണ്ണിയുടെ വീട്ടിലാണ് പ്രിയങ്കയും നേരത്തെ താമസിച്ചിരുന്നത്. ജീവനൊടുക്കുന്നതിന് രണ്ടു ദിവസം മുമ്പ് പ്രിയങ്കയെ ഉപദ്രവിച്ച ശേഷം ഉണ്ണി വീട്ടിൽനിന്ന് ഇറക്കിവിട്ടു. തുടർന്ന് പ്രിയങ്ക സഹോദരൻ വിഷ്ണുവിനെ വിളിച്ചുവരുത്തി സ്വന്തം വീട്ടിലേക്ക് വരികയായിരുന്നു. ഇതിനു പിന്നാലെയാണ് പൊലീസ് സ്റ്റേഷനിൽ പരാതി നൽകിയത്. വീട്ടിൽനിന്ന് പുറത്താക്കിയ ശേഷം ഉണ്ണി പ്രിയങ്കയെ അസഭ്യം പറയുന്ന വീഡിയോ ദൃശ്യങ്ങൾ ബന്ധുക്കൾ പുറത്തുവിട്ടിരുന്നു.
പ്രിയങ്ക സ്വന്തം മൊബൈൽ ഫോണിൽ റെക്കോഡ് ചെയ്ത ദൃശ്യങ്ങളായിരുന്നു ഇത്. കേട്ടാലറയ്ക്കുന്ന ഭാഷയിലാണ് ഉണ്ണി ഭാര്യയെ തെറി വിളിക്കുന്നത്. ഇതെല്ലാം കേട്ട് പ്രിയങ്ക കരയുകയായിരുന്നു. ഇതിനൊപ്പം ഉണ്ണിയുടെ ആക്രമണത്തിൽ പരിക്കേറ്റതിന്റെ പാടുകളും പ്രിയങ്ക ഫോണിൽ റെക്കോഡ് ചെയ്തിരുന്നു. ഇതും ബന്ധുക്കൾ പുറത്തുവിട്ടിരുന്നു. പ്രിയങ്കയുടെ ശരീരത്തിൽ മർദ്ദനമേറ്റ പാടുകളടക്കമുള്ള ഈ തെളിവുകൾ കുടുംബാംഗങ്ങൾ നേരത്തെ പൊലീസിനു കൈമാറിയിരുന്നു.
സാമ്പത്തികമായി പിന്നാക്കം നിൽക്കുന്ന കുടുംബമാണ് പ്രിയങ്കയുടേത്. അച്ഛന്റെ മരണശേഷം അമ്മ ജയ വീട്ടുജോലികൾ ചെയ്താണ് പ്രിയങ്കയെ പഠിപ്പിച്ചിരുന്നത്. സ്‌പോർട്ട്‌സിൽ സജീവമായിരുന്ന പ്രിയങ്കയ്ക്ക് അദ്ധ്യാപികയായി ജോലി കിട്ടിയാണ് അങ്കമാലിയിലെത്തിയത്. ഇവിടെവച്ചാണ് ഉണ്ണിയെ പരിചയപ്പെട്ടത്. തുടർന്ന് 2019 നവംബർ 21-ന് ഇരു വീട്ടുകാരുടെയും സമ്മതത്തോടെ വിവാഹം നടത്തുകയായിരുന്നു. വിവാഹസമയത്ത് 30 പവൻ സ്വർണം നൽകിയിരുന്നു. പിന്നീട് പല തവണ പണം ആവശ്യപ്പെട്ട് ഉണ്ണി പ്രിയങ്കയെ ഉപദ്രവിച്ചു. ഫ്‌ളാറ്റ് വാടകയ്‌ക്കെടുക്കാനും മറ്റും പ്രിയങ്കയുടെ കുടുംബം പല തവണയായി പണം നൽകുകയും ചെയ്തു. പക്ഷേ, പിന്നീടും ഉണ്ണി പണം ആവശ്യപ്പെട്ട് നിരന്തരം പീഡനം തുടർന്നതായാണ് പ്രിയങ്കയുടെ വീട്ടുകാരുടെ മൊഴി.
കോവിഡ് നെഗറ്റീവായാൽ ഉണ്ണിയുടെ അമ്മ അറസ്റ്റ് ചെയ്യുമെന്ന് നെടുമങ്ങാട് ഡിവൈ.എസ്‌പി. ജി.ഉമേഷ് പറഞ്ഞു. സ്ത്രീധനപീഡനവും ആത്മഹത്യാ പ്രേരണാക്കുറ്റവുമാണ് പ്രതികളുടെ പേരിൽ ചുമത്തിയിട്ടുള്ളത്.
