ഫിലഡൽഫിയ :- ഫോമാ ജോയിന്റ് സെക്രട്ടറിയും അമേരിക്കയിലെ സാമൂഹിക, സാംസ്‌കാരിക രംഗങ്ങളിലെ പ്രമുഖ വനിതാ സാന്നിധ്യവുമായ ഡോക്ടർ ജെയ്മോൾ ശ്രീധർ ലോക കേരള സഭയിൽ പങ്കെടുക്കുന്നു, ആദ്യമായാണ് അമേരിക്കയിൽ നിന്ന് ഒരു വനിത ഫോമാ എന്ന ബൃഹത്തായ സംഘടനയെ പ്രതിനിധീകരിച്ചു ലോക കേരള സഭയിൽ എത്തുന്നത്,

വരുന്ന ജൂൺ 13 മൂതൽ 15 വരെയാണ് ലോക കേരള സഭയുടെ സമ്മേളനം തിരുവനന്തപുരത്തു വച്ച് നടത്തപ്പെടുന്നത്,ലോകത്തിന്റെ വിവിധ രാജ്യങ്ങളിൽ നിന്നുള്ള തിരഞ്ഞെടുക്കപ്പെട്ടിട്ടുള്ള പ്രതിനിധികൾ ഈ പരിപാടികളിൽ പങ്കെടുക്കും, ജൂൺ 13 മുതൽ 15 വരെ തിരുവനന്തപുരത്ത് ചേരുന്ന നാലാം ലോക കേരള സഭയിൽ 103 രാജ്യങ്ങളിൽ നിന്നും 25 ഇന്ത്യൻ സംസ്ഥാനങ്ങളിൽ നിന്നും പ്രവാസി കേരളീയ പ്രതിനിധികൾ പങ്കെടുക്കും.

200-ഓളം പ്രത്യേക ക്ഷണിതാക്കളും ഇത്തവണ സഭയിൽ പങ്കെടുക്കുന്നുണ്ട്. മൂന്നാം ലോക കേരള സഭയിലെ നിർദ്ദേശപ്രകാരം രൂപീകരിച്ച ലോക കേരളം ഓൺലൈൻ പോർട്ടൽ, കേരള മൈഗ്രേഷൻ സർവ്വേ എന്നിവയുടെ പ്രകാശനം മുഖ്യമന്ത്രി പിണറായി വിജയൻ ജൂൺ 13 - ന് നിർവ്വഹിക്കും. കേരള നിയമസഭ സ്പീക്കർ എ എൻ എംസീർ ചടങ്ങിൽ അധ്യക്ഷത വഹിക്കും. മൈഗ്രേഷൻ സർവ്വേയുടെ ഭാഗമായുള്ള സെമിനാറും തുടർന്ന് ചേരും.

ലോക കേരള സഭയുടെ ന്യൂ യോർക്കിൽ നടന്ന സമ്മേളനത്തിലെ പ്രധാന സംഘാടകരിലൊരാളും രജിസ്‌ട്രേഷൻ കമ്മറ്റിയിലെ പ്രമുഖ സാന്നിധ്യവുമായിരുന്നു ഡോക്ടർ ജെയ്മോൾ ശ്രീധർ, കഴിഞ്ഞ വർഷം നടത്തപ്പെട്ട ഫോമാ സമ്മർ റ്റു കേരളയുടെ ഭാഗമായി അമേരിക്കയിലെ ഹൈ സ്‌കൂൾ, കോളേജ് കുട്ടികളുമായി തിരുവനന്തപുരത്തു സംഘടിപ്പിച്ച പരിപാടികളുടെ പ്രധാന സംഘാടകയായിരുന്നു ഡോക്ടർ ജെയ്മോൾ, അമേരിക്കയിൽ നിന്നുള്ള വിദ്യാർത്ഥികളുടെ സംഘവുമായി ക്ലിഫ് ഹൗസിൽ ഫോമാ നേതാക്കൾക്കൊപ്പം മുഖ്യമന്ത്രിയുമായുള്ള കൂടിക്കാഴ്ചയും സമ്മർ റ്റു കേരളയുടെ ഭാഗമായി ഫോമാ സംഘടിപ്പിച്ചിരുന്നു,

കേരളത്തിൽ നിന്ന് അമേരിക്കൻ സ്വപ്നങ്ങളുമായി കുടിയേറിയ മലയാളികളുടെ പ്രതിനിധിയായി, പ്രത്യേകിച്ച് ആരോഗ്യരംഗത്തു പ്രവർത്തിക്കുന്ന മലയാളിയുടെ പ്രതിനിധിയായിട്ട് ലോക കേരളസഭയിൽ പങ്കെടുക്കുന്നതിൽ അതിയായ സന്തോഷമുണ്ടെന്ന് ഡോക്ടർ ജെയ്മോൾ പ്രതികരിച്ചു, ജൂൺ 13ന് വൈകുന്നേരം നിശാഗന്ധി ഓഡിറ്റോറിയത്തിൽ നടക്കുന്ന പൊതുയോഗത്തോടെയാണ് ലോകകേരള സഭയുടെ നാലാം സമ്മേളനത്തിന് ഔദ്യോഗികമായി തുടക്കമാകുക.

എമിഗ്രേഷൻ കരട് ബിൽ 2021, വിദേശ റിക്രൂട്ട്മെന്റ് പ്രോഗ്രാമുകൾ, സുസ്ഥിര പുനരധിവാസം നൂതന ആശയങ്ങൾ, കുടിയേറ്റത്തിലെ ദുർബലകണ്ണികളും സുരക്ഷയും, നവ തൊഴിൽ അവസരങ്ങളും നൈപുണ്യ വികസനവും, കേരള വികസനം നവ മാതൃകകൾ, വിദേശ രാജ്യങ്ങളിലെ മാറുന്ന തൊഴിൽ- കുടിയേറ്റ നിയമങ്ങളും മലയാളി പ്രവാസവും, വിജ്ഞാന സമ്പദ്ഘടനയിലേക്കുള്ള പരിവർത്തനവും പ്രവാസികളും എന്നിങ്ങനെ എട്ട് വിഷയങ്ങളിൽ അവരണങ്ങൾ നടക്കും. ഇതിനോടൊപ്പം ഏഴു മേഖലാ അടിസ്ഥാനത്തിലുള്ള ചർച്ചകളും സംഘടിപ്പിക്കുന്നുണ്ട്.

അമേരിക്കൻ മലയാളികളുടെ കേരള ഗവൺമെന്റുമായുള്ള ബന്ധം മെച്ചപ്പെടുത്തുന്നതിനുള്ള പ്രവർത്തനങ്ങൾ തുടരുമെന്നും പാലാ മരങ്ങോട്ടു പള്ളി സ്വദേശിയായ ഡോക്ടർ ജെയ്മോൾ അറിയിച്ചു, പെൻസിൽവാനിയ ഫിലാഡൽഫിയ കേന്ദ്രമാക്കി പ്രവർത്തിക്കുന്ന പ്രമുഖ മലയാളി സംഘടനയായ കലയുടെ മുൻ പ്രസിഡന്റു കൂടിയാണ് ജെയ്മോൾ ശ്രീധർ, ഭർത്താവ് ഐ ടി കൺസൽട്ടന്റ് സുജിത് ശ്രീധർ, രണ്ടു കുട്ടികൾ, സിദ്ധാർഥ് ശ്രീധർ, ശ്രേയസ് ശ്രീധർ.