സണ്ണിവെയ്ൽ(ടെക്സസ്): സണ്ണി വെയ്ൽ സിറ്റി മേയർ സ്ഥാനത്തേക്ക് സജി ജോർജ് എതിരില്ലാതെ വീണ്ടും തിരഞ്ഞെടുക്കപ്പെട്ടു.നാമ നിർദേശ പത്രിക സമർപ്പിക്കുന്നതിനുള്ള അവസാന ദിവസം കഴിഞ്ഞപ്പോൾ മേയർ സ്ഥാനത്തേക്ക് സജി ജോർജ് ഉൾപ്പെടെ രണ്ടു പേര് മാത്രമാണ് പത്രിക സമര്പിച്ചതെങ്കിലും ഒരാളുടെ പത്രിക സൂക്ഷ്മ പരിശോധനക്കുശേഷം തള്ളിപ്പോയി .നാമനിർദേശപത്രിക പിൻ വലിക്കുന്നതിനുള്ള അവസാന തിയതി ഫെബ്രുവരി 24 നായിരുന്നു. ഇതോടെയാണ് സജി എതിരില്ലാതെ തിരഞ്ഞെടുക്കപ്പെട്ടിരിക്കുന്നത് .മെയ് മാസം ആദ്യമാണ് തിരെഞ്ഞെടുപ്പ് .
15 വർഷം സണ്ണിവെയ്ൽ സിറ്റി കൗൺസിലർ, പ്രൊ ടെം മേയർ എന്നീ നിലകളിൽ തിളക്കമാർന്ന പ്രകടനം കാഴ്ചവച്ച സജി തുടർച്ചയായി ഏഴം വർഷമാണ് സിറ്റി മേയറായി തിരഞ്ഞെടുക്കപ്പെടുന്നത്.
അമേരിക്കയുടെ ചരിത്രത്തിൽ സിറ്റി മേയറായി തിരഞ്ഞെടുക്കപ്പെട്ട മൂന്നാമത്തെ മലയാളിയാണ് സജി ജോർജ്. ഇതിനു മുൻപു ന്യൂജഴ്സി ടീനെക്ക്, ന്യു ജേഴ്സി മേയറായി ജോൺ അബ്രഹാം വിജയിച്ചിരുന്നു. 2015-ൽ കൊല്ലം സ്വദേശിനി അറ്റോർണി വിനി എലിസബത്ത് സാമുവൽ വഷിങ്ടൺ സ്റ്റേറ്റിലെ മൊണ്ട്സാനോ നഗരത്തിൽ മേയറായി തെരെഞ്ഞെടുക്കപ്പെട്ടിരുന്നു.
സണ്ണിവെയ്ൽ സിറ്റി കൗൺസിൽ പ്ലേയ്സ് 3 ലേക്ക് ഇന്ത്യൻ അമേരിക്കൻ മലയാളി മനു ഡാനിയും മത്സരിക്കുന്നു. നാമനിർദേശ പത്രിക സമർപ്പിച്ചവരിൽ ഒരാൾ പിന്മാറിയതോടെ മനു ഡാനിയും സാറ ബ്രാഡ്ഫോർഡും തമ്മിലുള്ള മത്സരത്തിന് കളമൊരുങ്ങിയിരിക്കുകയാണ്.മെയ് മാസം ആദ്യവാരമാണ് തിരെഞ്ഞെടുപ്പ് .
