വൈറ്റ് ഹൗസ് പ്രസ് സെക്രട്ടറിക്കെതിരെ അധിക്ഷേപം: നഴ്സിനെ ജോലിയില് നിന്ന് പിരിച്ചുവിട്ടു, ലൈസന്സ് റദ്ദാക്കാന് നീക്കം
ഫ്ലോറിഡ: വൈറ്റ് ഹൗസ് പ്രസ് സെക്രട്ടറി കരോലിന് ലീവിറ്റിനെതിരെ സോഷ്യല് മീഡിയയിലൂടെ അതിക്രൂരമായ പരാമര്ശം നടത്തിയ നഴ്സിനെ ജോലിയില് നിന്ന് പിരിച്ചുവിട്ടു. ലീവിറ്റിന്റെ പ്രസവവുമായി ബന്ധപ്പെട്ട് അങ്ങേയറ്റം അശ്ലീലവും ക്രൂരവുമായ രീതിയില് പരിക്കുകള് ആശംസിച്ചതിനാണ് നടപടി.
രണ്ടാമത്തെ കുഞ്ഞിനായുള്ള കാത്തിരിപ്പിലാണെന്ന് കരോലിന് ലീവിറ്റ് ഇന്സ്റ്റാഗ്രാമിലൂടെ അറിയിച്ചിരുന്നു. ഇതിന് പിന്നാലെയാണ് ഫ്ലോറിഡയിലെ ബാപ്റ്റിസ്റ്റ് ഹെല്ത്തില് ജോലി ചെയ്തിരുന്ന നഴ്സ്, പ്രസവസമയത്ത് ലീവിറ്റിന് ഗുരുതരമായ ശാരീരിക പരിക്കുകള് ഏല്ക്കട്ടെ എന്ന് ആശംസിച്ചുകൊണ്ട് വീഡിയോ പങ്കുവെച്ചത്.
വീഡിയോ വൈറലായതോടെ നഴ്സിനെ ആശുപത്രി അധികൃതര് ഉടനടി ജോലിയില് നിന്ന് പിരിച്ചുവിട്ടു. ഇത്തരം പെരുമാറ്റം തങ്ങളുടെ മൂല്യങ്ങള്ക്ക് വിരുദ്ധമാണെന്ന് ആശുപത്രി വ്യക്തമാക്കി.
ഫ്ലോറിഡ അറ്റോര്ണി ജനറലിന്റെ ഓഫീസ് വിഷയത്തില് ഇടപെട്ടു. നഴ്സിന്റെ പ്രൊഫഷണല് ലൈസന്സ് റദ്ദാക്കണമെന്ന് ഫ്ലോറിഡ ചീഫ് ഓഫ് സ്റ്റാഫ് ജെയിംസ് ഉത്മിയര് ആവശ്യപ്പെട്ടു. രോഗീ പരിചരണത്തില് ഏര്പ്പെടേണ്ട ഒരാളില് നിന്ന് ഇത്തരമൊരു മനോഭാവം ഉണ്ടാകുന്നത് അംഗീകരിക്കാനാവില്ലെന്ന് അധികൃതര് വ്യക്തമാക്കി.
നടപടികള്ക്ക് പിന്നാലെ നഴ്സ് വീണ്ടും സോഷ്യല് മീഡിയയില് രൂക്ഷമായ ഭാഷയില് പ്രതികരിച്ചതായും റിപ്പോര്ട്ടുകളുണ്ട്.
