മേരിലാൻഡ്: ലാപ്ലാറ്റാ റസിഡൻഷ്യൽ ഹോമിൽ വെള്ളിയാഴ്ച (നവംബർ 4) രാത്രി അഞ്ചുപേരെ കൊല്ലപ്പെട്ട നിലയിൽ കണ്ടെത്തി. ഇവർ താമസിച്ചിരുന്ന വീടിന്റെ ഉടമയാണ് അഞ്ചുപേരുടേയും മൃതദേഹം വീടിനു മുന്നിൽ കണ്ടെത്തിയതായി പൊലീസിനെ അറിയിച്ചത്.
സാറാ മാൻ (21), ഇവരുടെ സഹോദരൻ കെയ്മാൻ (18), മാതാവ് സോമാലി മാൻ (40), യവോൻ വാട്സൺ (23) എന്നിവരെയാണ് സാറായുടെ മുൻ കാമുകൻ ആൻഡ്ര സാലിസ് (28) വീട്ടിൽ അതിക്രമിച്ച് കയറി വെടിവച്ച് കൊലപ്പെടുത്തിയത്. തുടർന്ന് കാമുകൻ ആൻഡ്രയും വെടിയുതിർത്ത് ജീവനൊടുക്കുകയായിരുന്നുവെന്ന് ചാൾസ് കൗണ്ടി ഷെരീഫ് ഓഫീസ് അറിയിച്ചു. മരിച്ചവരുടെ ശരീരത്തിൽ നിരവധി പരിക്കുകളും ഉണ്ടായിരുന്നതായും ഓഫീസ് അറിയിച്ചു.
ഈ വീട്ടിലുണ്ടായിരുന്ന രണ്ട് കുട്ടികളെ ആദ്യം കണ്ടെത്താനായില്ലെങ്കിലും പിന്നീട് ഇവരെ വിവിധ സ്ഥലങ്ങളിൽ സുരക്ഷിതരായി കണ്ടെത്തി.
കൊലപാതകത്തിലേക്ക് കാമുകനെ എത്തിക്കാനുണ്ടായ കാരണം എന്തെല്ലാമാണെന്ന് കണ്ടെത്തുന്നതിനായി കുടുംബാംഗങ്ങളേയും സുഹൃത്തുക്കളേയും പൊലീസ് ചോദ്യംചെയ്തുവരുന്നു. ബാൾട്ടിമോർ ചീഫ് മെഡിക്കൽ എക്സാമിനർ ഓഫീസും ഓട്ടോപ്സി നടത്തി മരണകാരണം കണ്ടെത്തുമെന്നും ഷെരീഫ് ഓഫീസ് അറിയിച്ചു.
