ന്യൂയോർക്ക് : ജോൺ.എഫ്.കെന്നഡി ഇന്റർനാഷണൽ വിമാനത്താവളത്തിൽ നിന്നും പ്രതിദിനം മുംബൈ - ന്യൂയോർക്ക് നോൺ സ്റ്റോപ് സർവീസുകൾ ആരംഭിക്കുന്നു. 2023 ഫെബ്രുവരി 14 മുതൽ സർവീസുകൾക്ക് തുടക്കം കുറിക്കും. നവംബർ 23 ബുധനാഴ്ചയാണ് എയർ ഇന്ത്യ ഇത് സംബന്ധിച്ച അറിയിപ്പ് നൽകിയിരിക്കുന്നത്.
മുംബൈ ന്യൂയോർക്ക് സർവീസിന് പുറമെ മറ്റു യൂറോപ്യൻ ഡെസ്റ്റിനേഷനുകളിലേക്കും പുതിയ എയർ ഇന്ത്യ സർവീസുകൾ ആരംഭിക്കുമെന്നും അധികൃതർ അറിയിച്ചിട്ടുണ്ട്. ഫെബ്രുവരി 14 മുതൽ ആഴ്ചയിൽ എയർ ഇന്ത്യ നോൺസ്റ്റോപ്പ് സർവീസുകളുടെ എണ്ണം 47 ആയി ഉയർത്തും.
എയർ ഇന്ത്യയുടെ സേവനം വ്യാപിപ്പിക്കുന്നതിനും പുതിയ എയർക്രാഫ്റ്റുകൾ ലഭ്യമാക്കുന്നതിനും ആണ് ഇങ്ങനെ ഒരു തീരുമാനം സ്വീകരിച്ചതെന്നും എയർ ഇന്ത്യ അധികൃതർ പറഞ്ഞു. ന്യുയോർക്ക് മുംബൈ പ്രതിദിന സർവീസുകൾക്ക് പുറമേ ആഴ്ചയിൽ ന്യൂയോർക്ക് ലിബർട്ടി എയർപോർട്ടിൽ നിന്നും നാല് സർവീസുകൾ ഉണ്ടായിരിക്കും. ന്യൂയോർക്കിൽ നിന്ന് ഇന്ത്യയിലേക്ക് യാത്രക്കാരുടെ തിരക്ക് വർധിക്കുന്ന സാഹചര്യത്തിൽ യർ ഇന്ത്യ ഇങ്ങനെ ഒരു തീരുമാനമെടുത്തതിൽ യാത്രക്കാർ സംതൃപ്തരാണ്.
