വാഷിങ്ടൻ ഡിസി: അമേരിക്കയിൽ ശൈത്യകാലം ആരംഭിച്ചതോടെ കോവിഡ് വ്യാപനം വർധിച്ച സാഹചര്യത്തിൽ വീടുകളിൽ കോവിഡ് 19 ടെസ്റ്റ് നടത്തുന്നതിനുള്ള കിറ്റുകൾ ഡിസംബർ 19 മുതൽ വീണ്ടും പോസ്റ്റൽ സർവീസ് വഴി വിതരണം ആരംഭിക്കുന്നതിനുള്ള അടിയന്തിര നടപടികൾ സ്വീകരിച്ചതായി വൈറ്റ് ഹൗസിൽ നിന്ന് അറിയിച്ചു.
ഇതിനു മുൻപ് എത്ര കോവിഡ് 19 ടെസ്റ്റുകൾ ലഭിച്ചിട്ടുണ്ട് എന്നത് ഇപ്പോൾ നടത്തുന്ന വിതരണത്തിനു ബാധകമല്ലെന്നും അറിയിപ്പിൽ പറയുന്നു.നാലു ടെസ്റ്റുകൾ വീതമാണ് ഓരോ അഡ്രസിനും ലഭിക്കുക.ഈ വർഷാരംഭത്തിൽ അയച്ചു തുടങ്ങിയ സൗജന്യ കോവിഡ് ടെസ്റ്റുകൾ സെപ്റ്റംബർ മാസത്തോടെ നിർത്തി വച്ചിരുന്നു. കോൺഗ്രസ് ഇതിനാവശ്യമായ ഫണ്ട് പൂർണ്ണമായും അനുവദിക്കാതിരുന്നതാണ് കാരണമായി ചൂണ്ടികാണിക്കുന്നത്. ഏകദേശം 600 മില്യൺ ഹോം കോവിഡ് ടെസ്റ്റുകൾ ഇതിനകം തന്നെ വിതരണം ചെയ്തിരുന്നു.
കഴിഞ്ഞ ചില ആഴ്ചകളായി രാജ്യത്തിന്റെ വിവിധ ഭാഗങ്ങളിൽ കോവിഡ് കേസുകൾ വർധിച്ചുവരുന്നതും മറ്റൊരു കോവിഡ് തരംഗം ഉണ്ടാകുമോ എന്ന ഭയവുമാണ് പുതിയ കോവിഡ് ടെസ്റ്റുകൾ വിതരണം ചെയ്യാൻ ബൈഡൻ ഭരണകൂടത്തെ നിർബന്ധമാക്കിയിരിക്കുന്നത്.
ഡിസംബർ 14 വ്യാഴാഴ്ച മുതൽ covidtest.gov എന്ന വെബ്സൈറ്റിൽ അപേക്ഷ നൽകണമെന്നും, 19 മുതൽ പോസ്റ്റൽ സർവീസ് വഴി വീടുകളിൽ ലഭിക്കുമെന്നും അറിയിച്ചിട്ടുണ്ട്.
