ന്യൂയോർക്ക്: ഇന്ത്യാ പ്രസ്‌ക്ലബ്ബ് ഓഫ് നോർത്ത് അമേരിക്കയുടെ (ഐ.പി.സി.എൻ.എ.) ന്യൂയോർക്ക്/ന്യൂജേഴ്സി ചാപ്റ്റർ പുതിയ ഭാരവാഹികളെ തിരഞ്ഞെടുത്തു. പ്രസിഡന്റായി തിരഞ്ഞെടുക്കപ്പെട്ട ഷോളി കുമ്പിളുവേലി നിലവിൽ സെക്രട്ടറിയായി സേവനം ചെയ്തുവരികയായിരുന്നു. മറ്റ് ഭാരവാഹികളായി, ജോജോ കൊട്ടാരക്കര (സെക്രട്ടറി), ബിനു തോമസ് (ട്രഷറർ), മൊയ്തീൻ പുത്തൻചിറ (വൈസ് പ്രസിഡന്റ്), ജേക്കബ്ബ് മാനുവേൽ (ജോ.സെക്രട്ടറി) എന്നിവരേയും തെരഞ്ഞെടുത്തു.

ഡിസംബർ 17-ാം തീയതി ഞായറാഴ്ച ഓറഞ്ച്ബർഗിലെ സിത്താർ പാലസ് റസ്റ്റോറന്റിൽ കൂടിയ യോഗത്തിൽ നിലവിലെ പ്രസിഡന്റ് സണ്ണി പൗലോസ് അദ്ധ്യക്ഷത വഹിച്ചു. ഇന്ത്യാ പ്രസ് ക്ലബ്ബ് നാഷണൽ പ്രസിഡന്റ് സുനിൽ ട്രൈസ്റ്റാർ യോഗം ഉദ്ഘാടനം ചെയ്തു. മുൻ പ്രസിഡന്റുമാരായ ജോർജ് ജോസഫ്, മധു കൊട്ടാരക്കര തുടങ്ങിയവർ പുതിയ ഭാരവാഹികളെ അനുമോദിച്ചുകൊണ്ട് സംസാരിച്ചു.

പ്രസിഡന്റായി തെരഞ്ഞെടുക്കപ്പെട്ട ഷോളി കുമ്പിളുവേലി ഇ-മലയാളിയുടെ അസോസിയേറ്റ് എഡിറ്ററും, മാതൃഭൂമി ന്യൂസിന്റെ അമേരിക്കയിലെ പ്രതിനിധിയുമാണ്. വിവിധ പ്രസിദ്ധീകരണങ്ങളിൽ ആനുകാലിക വിഷയങ്ങളിൽ ലേഖനങ്ങൾ എഴുതുന്ന ഷോളി കുമ്പിളുവേലി മികച്ച സംഘാടകനുമാണ്.

സെക്രട്ടറിയായി തെരഞ്ഞെടുക്കപ്പെട്ട ജോജോ കൊട്ടാരക്കര 24 ന്യൂസ് ചാനലിന്റെ ഓപ്പറേഷൻസ് മാനേജരാണ്. സീ 24 സ്‌കൈ, 24 അമേരിക്കൻ അവാർഡ്സ്, ഡ്രീം പ്രൊജക്ട്സ് തുടങ്ങി 24 ചാനലിന്റെ സുപ്രധാന പദ്ധതികളിൽ മുഖ്യ പങ്ക് വഹിച്ചിട്ടുണ്ട്. കൂടാതെ, ഇവന്റ് ഗ്രാം, മഴവിൽ എഫ്.എം എന്നിവയുടെ മാനേജിങ് ഡയറക്ടറുമാണ്.

ജൂലിയ ഡിജിറ്റൽ ക്രിയേഷൻസ് എന്ന സ്ഥാപനത്തിന്റെ മാനേജിങ് ഡയറക്ടറാണ് ട്രഷറർ ആയി തിരഞ്ഞെടുക്കപ്പെട്ട ബിനു തോമസ്. 2009 മുതൽ കൈരളി ടി.വി. യു.എസ്.എ.യുടെ വീഡിയോ ജേർണലിസ്റ്റായി പ്രവർത്തിച്ചു വന്നിരുന്ന ബിനു, നിലവിൽ ഫ്ളവേഴ്സ് ടി.വി.യുടെ ന്യൂയോർക്ക് റീജണൽ ഹെഡായി പ്രവർത്തിച്ചു വരുന്നു. മീഡിയ ടെക്നിക്കൽ എക്സലൻസ് അവാർഡ് ജേതാവ് കൂടിയാണ് ബിനു തോമസ്.

വൈസ് പ്രസിഡന്റായി തെരഞ്ഞെടുക്കപ്പെട്ട മൊയ്തീൻ പുത്തൻചിറ മലയാളം ഡെയ്ലി ന്യൂസിന്റെ പബ്ലിഷറും മാനേജിങ് എഡിറ്ററുമാണ്. അമേരിക്കയിലെ മുഖ്യധാരാ മലയാളി മാധ്യമ പ്രവർത്തകനായ മൊയ്തീൻ പുത്തൻചിറക്ക് ഇ-മലയാളിയും, കൈരളി ടിവിയും സംയുക്തമായി ഏർപ്പെടുത്തിയ ബെസ്റ്റ് റൈറ്റർ ആൻഡ് ജേർണലിസ്റ്റ് അവാർഡ്, മലയാളി അസ്സോസിയേഷൻ ഓഫ് അമേരിക്ക/മുട്ടത്തുവർക്കി ശതവാഷിക കമ്മിറ്റി ഏർപ്പെടുത്തിയ ബെസ്റ്റ് ജേർണലിസ്റ്റ് ഗ്ലോബൽ ലിറ്റററി അവാർഡ്, വെസ്റ്റ്‌ചെസ്റ്റർ മലയാളി അസ്സോസിയേഷന്റെ ഫ്രീലാൻസ് ആൻഡ് കമ്മ്യൂണിറ്റി സർവ്വീസ് അവാർഡ്, ഇന്ത്യാനെറ്റ് യുഎസ്എയുടെ മീഡിയ അവാർഡ് തുടങ്ങി നിരവധി പുരസ്‌ക്കാരങ്ങൾ ലഭിച്ചിട്ടുണ്ട്.

ജോയിന്റ് സെക്രട്ടറിയായി തെരഞ്ഞെടുക്കപ്പെട്ട ജേക്കബ് മാനുവേൽ വിവിധ ചാനലുകൾക്ക് വേണ്ടി ക്യാമറമാനായി പ്രവർത്തിച്ചു വരുന്നു.

ചാപ്റ്ററിന്റെ പ്രവർത്തനോദ്ഘാടനം ഫെബ്രുവരി ആദ്യവാരം വിപുലമായ പരിപാടികളോടെ നടത്തുവാനും യോഗം തീരുമാനിച്ചു.