ലോസ്ആഞ്ചലസ് : സതേൺ കാലിഫോർണിയയിലെ ലോസ്ആഞ്ചലസ്, ഓറഞ്ച്, സാൻഡിയാഗോ, റിവർസൈഡ്, സാൻബെർണാഡിനോ എന്നീ കൗണ്ടികളിലായി വ്യാപിച്ചുകിടക്കുന്ന സീറോ മലബാർ കാത്തലിക് വിശ്വാസികൾക്കായുള്ള പുതിയ ദേവാലയത്തിന്റെ വെഞ്ചരിപ്പും കൂദാശാ കർമ്മവും പ്രഥമ വിശുദ്ധ കുർബാനയും ഒക്ടോബർ ഒന്നിന് നടത്തപ്പെട്ടു.

ഷിക്കാഗോ സെന്റ് തോമസ് സീറോ മലബാർ രൂപതാധ്യക്ഷൻ മാർ ജോയി ആലപ്പാട്ട് ആയിരുന്നു മുഖ്യ കാർമികൻ. ഭക്തിസാന്ദ്രവും വർണ്ണാഭവുമായ തിരുകർമ്മങ്ങളിൽ ഷിക്കാഗോ രൂപതയുടെ പ്രഥമ അധ്യക്ഷനായിരുന്ന മാർ ജേക്കബ് അങ്ങാടിയത്ത്, ചാൻസിലർ റവ.ഡോ. ജോർജ് ദാനവേലിൽ, പ്രൊക്യുറേറ്റർ റവ.ഫാ. കുര്യൻ നെടുവേലിച്ചാലുങ്കൽ, വികാരി റവ.ഫാ. ജേക്കബ് ക്രിസ്റ്റി പറമ്പുകാട്ടിൽ, മുൻ വികാരി റവ.ഫാ. മാത്യൂസ് മുഞ്ഞനാട്ട്, റവ.ഡോ. പോൾ പൂവത്തുങ്കൽ എന്നിവർ സഹകാർമികരായിരുന്നു.

അലങ്കരിച്ച ദൈവാലയ കവാടത്തിൽ വച്ച് സഭാദ്ധ്യക്ഷന്മാരെ വികാരി ക്രിസ്റ്റിയച്ചൻ മെഴുകുതിരികൾ നൽകി സ്വീകരിച്ചു. ബഹുമാനപ്പെട്ട വൈദീകരെ ട്രസ്റ്റിമാരായ ജിമ്മി ജോസഫ്, ബിജു ജോർജ്, സോണി സെബാസ്റ്റ്യൻ എന്നിവർ പൂച്ചെണ്ടുകൾ നൽകി സ്വീകരിച്ച് ദൈവാലയത്തിലേക്ക് ആനയിച്ചു. വികാരി ജേക്കബ് ക്രിസ്റ്റി മുഖ്യാതിഥികളേയും വിശ്വാസികളേയും സ്വാഗതം ചെയ്തു. തുടർന്ന് കൂദാശാകർമ്മങ്ങൾക്ക് തുടക്കമായി. രൂപതാ ചാൻസിലർ റവ.ഡോ. ജോർജ് ദാനവേലിൽ ചടങ്ങിന്റെ ഓരോ ഭാഗങ്ങളും വിശ്വാസികൾക്കായി വിവരിച്ചുകൊടുത്തു.
വി. കുർബാന മധ്യേയുള്ള തന്റെ സന്ദേശത്തിൽ നമ്മളാകുന്ന കല്ലുകൾ ചേർത്തുവെച്ച് യേശു പണിയുന്ന സഭയാണ് ദൈവാലയം. സഭാ സമൂഹത്തിന്റെ മൂലക്കല്ല് യേശുവാണ്. നാം ഓരോരുത്തരും ദൈവത്തിന്റെ ആലയമാണെന്നും മാർ ജോയി ആലപ്പാട്ട് പിതാവ് ഓർമ്മിപ്പിച്ചു.

സ്നേഹവിരുന്നിനുശേഷമുള്ള പൊതുസമ്മേളനത്തിൽ ആലപ്പാട്ട് പിതാവ് അധ്യക്ഷത വഹിച്ചു. അഭിവന്ദ്യ പിതാക്കന്മരും, ബഹുമാനപ്പെട്ട വൈദീകരും, ട്രസ്റ്റിമാരും ചേർന്ന് ദീപം തെളിയിച്ചു.
ക്രിസ്റ്റിയച്ചന്റെ നേതൃത്വത്തിൽ പുതിയ ദൈവാലയ സ്വപ്നം സാക്ഷാത്കരിച്ച വിശ്വാസ സമൂഹത്തെ അഭിവന്ദ്യ പിതാക്കന്മാർ അഭിനന്ദിച്ചു.

ഇടവകയിൽ സേവനം അനുഷ്ഠിച്ച മുൻ വികാരിമാരായ റവ.ഡോ. ജേക്കബ് കട്ടയ്ക്കൽ, റവ.ഡോ. അഗസ്റ്റിൻ പാലയ്ക്കാപ്പറമ്പിൽ, വെരി റവ.ഫാ. ഇമ്മാനുവേൽ മടുക്കക്കുഴി, വെരി. റവ.ഫാ. ജയിംസ് നിരപ്പേൽ, വെരി.റവ.ഫാ. മാത്യൂസ് മുഞ്ഞനാട്ട് എന്നീ വൈദീകരുടെ സ്തുത്യർഹമായ വേസനങ്ങൾ അഭിവന്ദ്യ പിതാക്കന്മാർ വേദിയിൽ അനുസ്മരിച്ചു.

2001 മുതൽ ഇടവകയിൽ സേവനം ചെയ്ത ട്രസ്റ്റിമാർ, മതബോധന സ്‌കൂൾ പ്രഥമ അദ്ധ്യാപകർ, സാക്റിസ്റ്റ്യൻ മുതലായവരെ പൊന്നാട അണിയിച്ച് പ്ലാക്കുകൾ നൽകി ആദരിച്ചു.
തുടർന്ന് മതബോധന സ്‌കൂൾ കുട്ടികളുടേയും ഇടവകാംഗങ്ങളുടേയും കലാവിരുന്ന് അരങ്ങേറി.

സെന്റ് അൽഫോൻസാ സീറോ മലബാർ കാത്തലിക് പള്ളി വികാരി റവ.ഡോ. സെബാസ്റ്റ്യൻ വലിയപറമ്പിൽ, സെന്റ് പയസ് ടെൻത് സീറോ മലബാർ ക്നാനായ പള്ളി വികാരി റവ.ഫാ.ബിനോയ് നാരമംഗലത്ത് എന്നിവർ ആശംസാ സന്ദേശം നൽകി.
അനുമോദന സമ്മേളനത്തിൽ വികാരി ക്രിസ്റ്റിയച്ചൻ സ്വാഗതവും ട്രസ്റ്റി സോണി ബാസ്റ്റ്യൻ നന്ദിയും പറഞ്ഞു.

വിവരങ്ങൾക്ക് കടപ്പാട് - ജോർജുകുട്ടി പുല്ലാപ്പള്ളിൽ