ആൽബനി (ന്യൂയോർക്ക്): കോവിഡ്-19 മഹാമാരിയുടെ ശമനത്തിനു ശേഷം അമേരിക്കൻ മലയാളികൾ ഓണാഘോഷങ്ങളുടെ തിരക്കിലേക്ക് ശ്രദ്ധ കേന്ദ്രീകരിച്ചതോടെ ആൽബനിയിലെ 'ക്യാപിറ്റൽ ഡിസ്ട്രിക്റ്റ് മലയാളി അസ്സോസിയേഷനും (സിഡിഎംഎ) അതിവിപുലമായി ഓണം ആഘോഷിച്ചു.
സെപ്റ്റംബർ 11 ഞായറാഴ്ചയായിരുന്നു ''പൊന്നോണം 2022'' ആഘോഷങ്ങൾ. ആൽബനി കൗണ്ടിയിലെ കോളനി കുക്ക് പാർക്ക് പവലിയനിലായിരുന്നു (Cook Park, Shambrook Pkwy, Colonie, NY 12205) ആഘോഷം. ഉച്ചയ്ക്ക് 12:00 മണിക്ക് ഓണ സദ്യയോടെ ആഘോഷത്തിന് തുടക്കമായി.
കോവിഡ് മഹാമാരിയെത്തുടർന്ന് മന്ദഗതിയിലായിരുന്ന ആഘോഷം അസ്സോസിയേഷൻ ഭാരവാഹികളുടേയും സന്നദ്ധസേവകരുടേയും സഹകരണവും പ്രയത്‌നവും കൊണ്ട് ഭംഗിയാക്കാൻ സാധിച്ചു. മഹാബലിയുടെ എഴുന്നള്ളത്ത്, തിരുവാതിര, പൂക്കളം, ഓണ സദ്യ, വടംവലി, കുട്ടികളുടെ നൃത്തം, മിമിക്രി, റാഫിൾ നറുക്കെടുപ്പ് തുടങ്ങി വിവിധങ്ങളായ കലാ പരിപാടികളും ഉണ്ടായിരുന്നു.
ജൂൺ 25-ന് പിക്‌നിക്കിനോടനുബന്ധിച്ച് നടത്തിയ കായിക മത്സരങ്ങളിൽ പങ്കെടുത്ത് വിജയിച്ചവർക്ക് ട്രോഫികൾ സമ്മാനിച്ചു.
ഇലയിൽ വിളമ്പിയ വിഭവസമൃദ്ധമായ ഓണസദ്യ പങ്കെടുത്ത എല്ലാവരും ആസ്വദിച്ചു. പ്രസിഡന്റ് സുനിൽ സക്കറിയയും മറ്റു കമ്മിറ്റി ഭാരവാഹികളും ആഘോഷം കുറ്റമറ്റതാക്കാൻ പ്രത്യേകം ശ്രദ്ധിച്ചിരുന്നു.
ഓണാഘോഷത്തോടനുബന്ധിച്ച് കൂടിയ പൊതുയോഗത്തിൽ അസ്സോസിയേഷന്റെ ഭേദഗതി വരുത്തിയ ബൈലോ പൊതുയോഗം അംഗീകരിച്ചു. യോഗത്തിൽ പുതിയ ഡയറക്ടർ ബോർഡ് അംഗങ്ങളേയും തിരഞ്ഞെടുത്തു.
പുതുതായി തെരഞ്ഞെടുക്കപ്പെട്ട ഡയറക്ടർ ബോർഡ് അംഗങ്ങൾ: രാധാകൃഷ്ണൻ നായർ, പീറ്റർ തോമസ്, ജയേഷ് തളിയക്കാട്ടിൽ, അഭിലാഷ് പുളിക്കത്തൊടി എന്നിവരെക്കൂടാതെ അസ്സോസിയേഷൻ പ്രസിഡന്റ് സുനിൽ സക്കറിയയും ഡയറക്ടർ ബോർഡിൽ അംഗമായി തുടരും.
അസ്സോസിയേഷനു വേണ്ടി സുതാര്യമായ ബൈലോ തയ്യാറാക്കാൻ സഹായിച്ച ബൈലോ റിവ്യൂ കമ്മിറ്റി അംഗങ്ങളായ ജോർജ് പി ഡേവിഡ്, പീറ്റർ തോമസ്, മൊയ്തീൻ പുത്തൻചിറ, അനൂപ് അലക്‌സ് എന്നിവർക്ക് പ്രസിഡന്റും ബൈലോ റിവ്യൂ കമ്മിറ്റിയിലെ അംഗവും കൂടിയായിരുന്ന സുനിൽ സക്കറിയ നന്ദി പറഞ്ഞു.
അസ്സോസിയേഷന്റെ വെബ്‌സൈറ്റ് പുനരുജ്ജീവിപ്പിക്കുകയും, ടെക്‌നോളജി യുഗത്തിനനുയോജ്യമായ രീതിയിൽ വെബ് സൈറ്റ് ക്രമീകരിച്ചതും നിരവധി പേർക്ക് അനായാസം അംഗത്വമെടുക്കാൻ സഹായകമായി എന്ന് സുനിൽ പറഞ്ഞു.
പുതുതായി അംഗത്വമെടുക്കൽ മാത്രമല്ല, അംഗത്വം പുതുക്കാനും അസ്സോസിയേഷന്റെ വിവിധ പരിപാടികളെക്കുറിച്ചുള്ള പ്രഖ്യാപനങ്ങളറിയാനും, അവയിൽ പങ്കെടുക്കാൻ ആഗ്രഹിക്കുന്നവർക്ക് രജിസ്റ്റർ ചെയ്യാനും വെബ്‌സൈറ്റിൽ സൗകര്യമൊരുക്കിയിട്ടുണ്ട്.
കൂടുതൽ വിവരങ്ങൾക്ക്: സുനിൽ സക്കറിയ 518 894 1564, അനൂപ് അലക്‌സ് 224 616 0411, secretary@cdmany.org
വെബ്: https://cdmany.org/
