പൊതുവിദ്യാഭ്യാസ വകുപ്പിൽ ഫയലുകൾ കെട്ടികിടക്കാൻ അനുവദിക്കില്ല ; ബോധപൂർവം ഫയലുകൾ വച്ചു താമസിപ്പിക്കുന്ന ഉദ്യോഗസ്ഥരെ പിന്തുണക്കില്ലെന്നും മന്ത്രി വി ശിവൻകുട്ടി

തിരുവനന്തപുരം: പൊതുവിദ്യാഭ്യാസ വകുപ്പിൽ ഫയലുകൾ കെട്ടികിടക്കാൻ അനുവദിക്കില്ലെന്ന് പൊതുവിദ്യാഭ്യാസ വകുപ്പ് മന്ത്രി വി. ശിവൻകുട്ടി .കൃത്യമായ ഇടവേളകളിൽ ഫയൽ അദാലത്തുകൾ നടത്തുമെന്നും ഇതിന്റെ രൂപരേഖ തയ്യാറാക്കിയിട്ടുണ്ടെന്നും മന്ത്രി പറഞ്ഞു. ബോധപൂർവം ഫയലുകൾ വച്ചു താമസിപ്പിക്കുന്ന ഉദ്യോഗസ്ഥർക്ക് വകുപ്പിന്റെ പിന്തുണ ലഭിക്കില്ലെന്നും മന്ത്രി കൂട്ടിച്ചേർത്തു. പൊതുവിദ്യാഭ്യാസ വകുപ്പിനു കീഴിലുള്ള 71 ഓഫീസുകൾ ഇ - ഓഫീസ് സംവിധാനത്തിലേക്ക് മാറുന്നതിന്റെ പ്രവർത്തനോദ്ഘാടനം നിർവഹിച്ചു സംസാരിക്കുകയായിരുന്നു മന്ത്രി.

സർക്കാർ സേവനം പൗരന്റെ അവകാശമാണ്. തപാലുകളും ഫയലുകളും സുതാര്യമായും വേഗത്തിലും നടപ്പാക്കാൻ ഇ - ഓഫീസ് സൗകര്യത്തിലൂടെ സാധിക്കും. എയ്ഡഡ് മേഖലയെ ബുദ്ധിമുട്ടിക്കുന്ന നയങ്ങൾ വകുപ്പിനില്ലെന്നും എല്ലാവരോടും നീതിപുലർത്തുന്ന സമീപനമാണ് സർക്കാരിന്റേതെന്നും മന്ത്രി പറഞ്ഞു. വിജിലൻസ് വിഭാഗത്തിന്റെ ഒരു കണ്ണ് എല്ലാ വിദ്യാഭ്യാസ സ്ഥാപനങ്ങളിലുമുണ്ടാകുമെന്നും മന്ത്രി പറഞ്ഞു.

ആറ്റിങ്ങൽ പ്രീ പ്രൈമറി സ്‌കൂൾ സന്ദർശിച്ച മന്ത്രി പുതിയ കെട്ടിടം നിർമ്മിക്കുന്നതിന് 56.6 ലക്ഷം രൂപ അനുവദിച്ചതായി അറിയിച്ചു. സ്വാതന്ത്ര്യസമര ചരിത്രമുള്ള ആറ്റിങ്ങലിൽ പൊതുവിദ്യാഭ്യാസ വകുപ്പിന്റെ ചരിത്രപ്രധാന നിമിഷത്തിന് തുടക്കം കുറിക്കാൻ കഴിഞ്ഞതിൽ സന്തോഷമുണ്ടെന്നും മന്ത്രി കൂട്ടിച്ചേർത്തു. ആറ്റിങ്ങൽ ഡി. ഇ. ഒ ഓഫീസിൽ നടന്ന ചടങ്ങിൽ ഒ.എസ്. അംബിക എംഎ‍ൽഎ അധ്യക്ഷത വഹിച്ചു. ആറ്റിങ്ങൽ നഗരസഭ ചെയർപേഴ്‌സൺ എസ്. കുമാരി, പൊതുവിദ്യാഭ്യാസ ഡയറക്ടർ ജീവൻബാബു കെ, ജില്ലാ വിദ്യാഭ്യാസ ഓഫീസർ ബിന്ദു ജി. ഐ, വാർഡ് കൗൺസിലർമാർ, വിദ്യാഭ്യാസ വകുപ്പ് ഉദ്യോഗസ്ഥർ, രാഷ്ട്രീയ-സാംസ്‌കാരിക രംഗത്തെ പ്രവർത്തകർ തുടങ്ങിയവരും പങ്കെടുത്തു.