മോഹൻലാലും ലാൽജോസും ആദ്യമായി ഒന്നിക്കുന്ന ചിത്രം വെളിപാടിന്റെ പുസ്തകത്തിന്റെ ടീസർ പുറത്തിറങ്ങി. മോഹൻലാൽ തന്റെ ഔദ്യോഗിക ഫേസ്‌ബുക്ക് പേജിലൂടെയാണ് ടീസർ പുറത്തുവിട്ടത്. പ്രൊഫസർ മൈക്കിൾ ഇടിക്കുളയെന്ന കഥാപാത്രമാണ് ചിത്രത്തിൽ മോഹൻലാൽ അവതരിപ്പിക്കുന്നത്.

താടിയും കണ്ണടയുമൊക്കെ വച്ച് കുർത്തയണിഞ്ഞ് സഞ്ചിയും തൂക്കി സൈക്കിൾ ചവിട്ടി വരുന്ന മോഹൻലാൽ ആണ് ടീസറിലുമുള്ളത്. നടൻ രണ്ട് വ്യത്യസ്ത ഗെറ്റപ്പിൽ പ്രത്യപ്പെടുന്ന ചിത്രമാണിത്. ടീസറിലും രണ്ട് ഗെറ്റപ്പുകളും കാണാം.

ആന്റണി പെരുമ്പാവൂരാണ് വെളിപാടിന്റെ പുസ്തകം നിർമ്മിക്കുന്നത്. ബെന്നി പി. നായരമ്പലമാണ് രചന. അങ്കമാലി ഡയറീസിലൂടെ സിനിമയിലെത്തിയ അന്നാ രേഷ്മ രാജനാണ് നായിക. ഷാൻ റഹ്മാൻ സംഗീതവും വിഷ്ണു ശർമ ഛായാഗ്രഹണവും നിർവഹിക്കുന്നു. രഞ്ജൻ എബ്രഹാമാണ് എഡിറ്റിങ്. മാക്‌സ്‌ലാബ് സിനിമാസ് ആൻഡ് എന്റർടെയ്ന്മെന്റാണു ചിത്രം വിതരണം ചെയ്യുന്നത്.