കാർത്തിക് സുബ്ബരാജ്-രജനി ചിത്രം പേട്ടയിലെ ആദ്യഗാനം പുറത്തെത്തിയത് ഇന്നലെയായിരുന്നു. ഒരു ദിവസത്തിനുള്ളിൽ 50 ലക്ഷത്തോളം വ്യൂസാണ് 'മരണ മാസ്' എന്ന ഗാനത്തിന്റെ ലിറിക് വീഡിയോ നേടിയെടുത്തിരിക്കുന്നത്. ഇപ്പോഴിതാ താരനിബിഢമായ ചിത്രത്തിൽ വിജയ് സേതുപതി അവതരിപ്പിക്കുന്ന കഥാപാത്രത്തിന്റെ ഫസ്റ്റ് ലുക്ക് പുറത്തുവിട്ടിരിക്കുകയാണ് നിർമ്മാതാക്കളായ സൺ പിക്ചേഴ്സ്.

ജിത്തു എന്നാണ് പേട്ടയിലെ വിജയ് സേതുപതി കഥാപാത്രത്തിന്റെ പേര്. മുഖത്ത് പരിക്കുകളുള്ള കഥാപാത്രം തോക്കേന്തി നെഗറ്റീവ് ടച്ചോടെ നിൽക്കുന്നത്. ഒരു ഷാളും പുതച്ചിട്ടുണ്ട്. സൂക്ഷിച്ചുനോക്കിയാൽ പിന്നിൽ രജനി കഥാപാത്രത്തിന്റെ നിഴൽരൂപവും ദൃശ്യമാണ് പോസ്റ്ററിൽ.

സൺ പിക്ചേഴ്സിന്റെ ബാനറിൽ കലാനിധി മാരൻ നിർമ്മിക്കുന്ന പേട്ട ഒരു ആക്ഷൻ ചിത്രമാണ്. വിജയ് സേതുപതിയെക്കൂടാതെ ബോബി സിംഹ, ശശികുമാർ, സിമ്രാൻ, തൃഷ, നവാസുദ്ദീൻ സിദ്ദിഖി, മണികണ്ഠൻ ആചാരി എന്നിവരൊക്കെ രജനിക്കൊപ്പം അണിനിരക്കും. അടുത്ത പൊങ്കലിന് ചിത്രം തീയേറ്ററുകളിലെത്തും.

ഇരട്ട പ്രതിച്ഛായയുള്ള കഥാപാത്രമാണ് ചിത്രത്തിൽ രജനിയുടേതെന്നാണ് റിപ്പോർട്ടുകൾ. പകൽ ഒരു ഹോസ്റ്റൽ വാർഡനും രാത്രി അധോലോക നേതാവുമാണ് രജനിയുടെ കഥാപാത്രമെന്നും കേൾക്കുന്നു. എന്നാൽ സംവിധായകനോ മറ്റ് അണിയറക്കാരോ ഈ റിപ്പോർട്ടുകളെക്കുറിച്ച് പ്രതികരിച്ചിട്ടില്ല.