'കുഞ്ഞു വാമിക ഞങ്ങളുടെ ജീവിതത്തെ മറ്റൊരു തലത്തിലേക്ക് എത്തിച്ചു'; 'കണ്ണീർ, ചിരി, സങ്കടം, ആനന്ദം എന്നിവയെല്ലാം മിനിറ്റുകൾക്കുള്ളിൽ അനുഭവിക്കാൻ സാധിക്കുന്നു'; കുഞ്ഞിനെ ഓമനിക്കുന്ന ചിത്രത്തിനൊപ്പം പേരിട്ട കാര്യവും ഇൻസ്റ്റഗ്രാമിലൂടെ പങ്കുവച്ച് വിരാട് കോലിയും അനുഷ്‌കയും
ന്യൂഡൽഹി: കുഞ്ഞിനെ ഓമനിക്കുന്ന ചിത്രത്തിനൊപ്പം വാമിക എന്ന് പേരിട്ട കാര്യവും ആരാധകരുമായി ഇൻസ്റ്റഗ്രാമിലൂടെ പങ്കുവച്ച് അനുഷ്‌ക ശർമ. ഈ വർഷം ജനുവരി 11 നാണ് ഇന്ത്യൻ ക്രിക്കറ്റ് ടീം ക്യാപ്റ്റൻ വിരാട് കോലിക്കും ഭാര്യ അനുഷ്‌ക ശർമയ്ക്കും പെൺകുഞ്ഞ് പിറന്നത്. സമൂഹമാധ്യങ്ങൾ വഴി കോലി സന്തോഷ വാർത്ത പുറത്തുവിട്ടപ്പോൾ ആരാധകരും സഹതാരങ്ങളും ആശംസകളോടെ വരവേറ്റു. ഇപ്പോഴിതാ കുഞ്ഞിനു പേരിട്ട കാര്യവും കോലിയും ഭാര്യയും സമൂഹമാധ്യമങ്ങളിലൂടെ ആരാധകരെ അറിയിച്ചിരിക്കുകയാണ്.
മകളുടെ ചിത്രവും പുറത്തുവിട്ടിട്ടുണ്ട്. പക്ഷേ കുഞ്ഞിന്റെ മുഖം കാണാൻ സാധിക്കുന്നില്ല. കോലിയും അനുഷ്‌കയും കുഞ്ഞിനെ ഓമനിക്കുന്ന ചിത്രമാണ് അനുഷ്‌ക ശർമ ഇൻസ്റ്റഗ്രാമിൽ പങ്കുവച്ചിരിക്കുന്നത്. ഹൃദ്യമായൊരു കുറിപ്പും ഇതിനോടൊപ്പമുണ്ട്.
'സ്നേഹവും കടപ്പാടും ജീവിത രീതിയാക്കിയാണ് ഞങ്ങൾ ഇതുവരെ ജീവിച്ചത്. പക്ഷേ 'വമിക' അതിനെ മറ്റൊരു തലത്തിലേക്ക് ഉയർത്തിയിരിക്കുകയാണ്. കണ്ണുനീർ, ചിരി, സങ്കടം.. അങ്ങനെ കുറച്ച് സമയത്തിനുള്ള ഒരുപാട് വികാരങ്ങൾ ചിലപ്പോൾ മനസിലൂടെ കടന്നുപോകും. ഉറക്കം മാത്രം ബുദ്ധിമുട്ടാണ്. എന്നിരുന്നാലും ഞങ്ങളുടെ ഹൃദയങ്ങൾ നിറഞ്ഞിരിക്കുന്നു. നിങ്ങളുടെ ആശംസകൾക്കും പ്രാർത്ഥനകൾക്കും നൽകുന്ന ഊർജ്ജത്തിനും നന്ദി'- എന്ന അടിക്കുറിപ്പോടെയാണ് താരം ചിത്രം പങ്കുവച്ചിരിക്കുന്നത്.
കുഞ്ഞുണ്ടാകുന്നതിനാൽ ഓസ്‌ട്രേലിയൻ പര്യടനം ഉപേക്ഷിച്ചാണു വിരാട് കോലി ഭാര്യയുടെ അടുത്തെത്തിയത്. ഇംഗ്ലണ്ടിനെതിരായ ടെസ്റ്റ് പരമ്പരയിൽ കോലി ടീമിനൊപ്പം ചേരും. ഫെബ്രുവരി അഞ്ചിന് ചെന്നൈയിലാണ് ടെസ്റ്റിലെ ആദ്യ മത്സരം. ഇരു ടീമുകളിലെയും താരങ്ങൾ ഹോട്ടലിൽ ക്വാറന്റീനിലാണ്. ഫെബ്രുവരി രണ്ടിന് കോവിഡ് പരിശോധനകൾക്കു ശേഷമാണു പരിശീലനത്തിനായി താരങ്ങൾ ഇറങ്ങുക.
