തിരുവനന്തപുരം: ദീപാ നിശാന്തിന്റെ കവിതാ മോഷണ വിവാദത്തിൽ ഉൾപ്പെട്ട ശ്രീചിത്രനെ പരിഹസിച്ച് വി ടി ബൽറാം എംഎൽഎ. മുമ്പ് തന്നെ പരിഹസിച്ച് ശ്രീചിത്രൻ ഇട്ട പോസ്റ്റിന് മറുപടി എന്ന നിലയിലാണ് ബൽറാം ട്രോളുമായി രംഗത്തെത്തിയത്. മുമ്പ് ശ്രീചിത്രൻ ബൽറാമിനെ വിമർശിച്ചു കൊണ്ട് പോസ്റ്റിട്ടത് ഇരുവരും ഒരു വേദിയിൽ പങ്കെടുത്തപ്പോഴുള്ള അനുഭവം വെച്ചുകൊണ്ടായിരുന്നു.

ഇതുമായി ബന്ധപ്പെട്ട് ശ്രീചിത്രന്റെ പരിഹാസം ഇങ്ങനെയായിരുന്നു: മുൻപൊരിക്കൽ, വി.ടി.ബൽറാമിന്റെ മണ്ഡലമായ തൃത്താലയിൽ ഞാനൊരു നെഹ്‌റു അനുസ്മരണ പ്രഭാഷണത്തിനു പോയി. സെക്കുലറിസം, ഭരണഘടന, സയന്റിഫിക് ടെമ്പർ, ഇന്ത്യൻ ജനാധിപത്യം എന്നിവയെക്കുറിച്ച് കുട്ടികൾക്ക് ക്ലാസെടുത്തു. ബൽറാമിന്റെ സാന്നിദ്ധ്യത്തിൽ ഒരു കുട്ടിക്ക് 'ഇന്ത്യയെ കണ്ടെത്തൽ' നൽകി ആ പുസ്തകത്തിന്റെ വിതരണം ഉദ്ഘാടനം ചെയ്തുവെന്നും എന്നാൽ ആ പുസ്തകം ഏറ്റവും അനിവാര്യനായിരുന്ന ആൾ തൊട്ടടുത്തുണ്ടായിട്ടും ബുക്ക് ആ കുട്ടിക്ക് മാറിക്കൊടുത്തുപോയെന്നും ഇപ്പോൾ എത്രയും വേഗം ആ ബുക്ക് അദ്ദേഹത്തിന് നൽകണമെന്നുണ്ട്.

ശ്രീചിത്രന്റെ ആരോപണത്തിന് മറുപടിയുമായി ബൽറാമിന്റെ പുതിയ പോസ്റ്റ്. നെഹ്രുവിന്റെ 'ഇന്ത്യയെ കണ്ടെത്തൽ' എന്ന ആ പുസ്തകം എത്രയും പെട്ടെന്ന് എനിക്ക് തന്നെ തന്നോളൂ. എന്റെ കയ്യിൽ അതിന്റെ കോപ്പി ഇല്ലാത്തതുകൊണ്ടല്ല, നിങ്ങളുടെ ഷെൽഫിൽ അതിരുന്നാൽ അതിലെ ഓരോ പേജും നിങ്ങൾ അടിച്ചുമാറ്റി സ്വന്തം പേരിലും മറ്റ് വല്ലവരുടെ പേരിലുമൊക്കെ പലയിടത്തും പ്രസിദ്ധീകരിച്ചു കളയും എന്ന പേടി കൊണ്ടാണെന്നും ബൽറാം പറയുന്നു.

ശ്രീചിത്രനാണ് ദീപ നിശാന്തിന് കലേഷിന്റെ കവിത പകർത്തിയെഴുതിയതെന്ന് ആരോപണമുള്ള പശ്ചാത്തലത്തിലാണ് ബൽറാമിന്റെ പോസ്റ്റ്. ദീപാ നിശാന്തിന് കവിത നൽകിയത് ശ്രീചിത്രൻ ആയിരുന്നെവെന്നായിരുന്നു പുറത്തുവന്ന വാർത്തകൾ. ഈ വാർത്ത പുറത്തുവന്നതിന് പിന്നാലെ മാപ്പു പറഞ്ഞ് വിവാദത്തിൽ നിന്നും ദീപ തടിയൂരിയിരുന്നു. ഇതിനിടെയാണ് ശ്രീചിത്രനെതിരെ ബൽറാം ഫേസ്‌ബുക്കിൽ കുറിച്ചത്.

ബൽറാമിന്റെ പോസ്റ്റ് വായിക്കാം:

പ്രിയപ്പെട്ട ശ്രീചിത്രൻ,

നെഹ്രുവിന്റെ 'ഇന്ത്യയെ കണ്ടെത്തൽ' എന്ന ആ പുസ്തകം എത്രയും പെട്ടെന്ന് എനിക്ക് തന്നെ തന്നോളൂ. എന്റെ കയ്യിൽ അതിന്റെ കോപ്പി ഇല്ലാത്തതുകൊണ്ടല്ല, നിങ്ങളുടെ ഷെൽഫിൽ അതിരുന്നാൽ അതിലെ ഓരോ പേജും നിങ്ങൾ അടിച്ചുമാറ്റി സ്വന്തം പേരിലും മറ്റ് വല്ലവരുടെ പേരിലുമൊക്കെ പലയിടത്തും പ്രസിദ്ധീകരിച്ചു കളയും എന്ന പേടി കൊണ്ടാണ്.