മിൽപിറ്റസ് (കാലിഫോർണിയ): വെസ്റ്റ് കോസ്റ്റ് കോൺസൽ ജനറലായി ചുമതലയേൽക്കുന്നതിന് സലലിഫോർണിയായിൽ എത്തിച്ചേർന്ന അംബാസിഡർ സഞ്ജയ് പാണ്ഡെക്ക് ഇന്തോ അമേരിക്കൻ അസോസിയേഷൻ ഡിസംബർ 15 നു ഊഷ്മള സ്വീകരണം നൽകി.

സാൻഫ്രാൻസിസ്‌ക്കൊ ബെ ഏരിയ സിലിക്കൺവാലി ഫാൽക്കൺ എക്സ് ഇവന്റ് സെന്ററിൽ ചേർന്ന സ്വീകരണ സമ്മേളനത്തിൽ മുപ്പതോളം അസോസിയേഷനുകളെ പ്രതിനിധീകരിച്ചു 150 പ്രതിനിധികൾ പങ്കെടുത്തു.

ദേശീയ ഗാനാലാപനത്തോടെ സമ്മേളന പരിപാടികൾ ആരംഭിച്ചു. സഞ്ജയ് പാണ്ഡെ, ഭാര്യ മിനാട്ടി എന്നിവർ ചേർന്ന് നിലവിളക്ക് കൊളുത്തി ഉദ്ഘാടനം നിർവഹിച്ചു. തുടർന്നു സംഘടനാ നേതാക്കൾ പുതിയതായി ചുമതലയേറ്റ കോൺസുൽ ജനറലിനെ ഹാരവും, ഷാളും അണിയിച്ചു.

സംഘടനാ നേതാക്കളുമായി വേദി പങ്കിടുന്നതിനും ആശയ സംവാദം നടത്തുന്നതിനും ലഭിച്ച അവസരത്തിനായി പാണ്ഡെ പ്രത്യേകം നന്ദി പറഞ്ഞു. ഇന്ത്യൻ സമ്പദ്ഘടനയേയും, അമേരിക്കൻ വികസനത്തേയും പ്രോത്സാഹിപ്പിക്കുന്നതിൽ ഇന്ത്യൻ വംശജർ നടത്തുന്ന പ്രവർത്തനങ്ങൾ പ്രശംസനീയമാണെന്ന് പാണ്ഡെ അഭിപ്രായപ്പെട്ടു. ഇന്ത്യൻ സംസ്‌കാരവും, പാരമ്പര്യവും കാത്തു സൂക്ഷിക്കുന്നതിൽ ജാഗ്രത പുലർത്തണമെന്ന് അദ്ദേഹം നിർദേശിച്ചു. ഇത്രയും സംഘടനകൾ ഒരുമിച്ചു ഒരു വേദിയിൽ വന്നതു തന്നെ നിങ്ങളിലുള്ള ഐക്യം പ്രകടിപ്പിക്കുന്നതാണെന്നും അദ്ദേഹം അഭിപ്രായപ്പെട്ടു. ഏഷ്യാനെറ്റ് ഉൾപ്പെടെയുള്ള വിവിധ ഇന്ത്യൻ ദൃശ്യ- അച്ചടി മാധ്യമങ്ങൾ സ്വീകരണ സമ്മേളനത്തിന് എത്തിചേർന്നിരുന്നു.