പുതുപ്പള്ളിയിൽ ഭർത്താവിനെ ഭാര്യ വെട്ടിക്കൊന്നു; പെരുംകാവ് സ്വദേശി സിജിയെ കൊലപ്പെടുത്തിയത് ഭാര്യ റോസന്ന; കൊലയ്ക്ക് ശേഷം കുട്ടികളെയും കൊണ്ട് വീടുവിട്ടു; യുവതിക്ക് മാനസിക പ്രശ്‌നങ്ങളെന്ന് ബന്ധുക്കൾ
കോട്ടയം: പുതുപ്പള്ളിയെ നടുക്കി കൊലപാതകം. പുതുപ്പള്ളിയിൽ ഭർത്താവിനെ ഭാര്യ വെട്ടിക്കൊലപ്പെടുത്തി. പുതുപ്പള്ളി പെരുംകാവ് സ്വദേശി സിജിയെയാണ് ഭാര്യ റോസന്ന വെട്ടിക്കൊലപ്പെടുത്തിയത്. ഇന്ന് പുലർച്ചെയാണ് സംഭവം. വീട്ടമ്മയായ റോസന്നയ്ക്ക് മാനസിക പ്രശ്നങ്ങളുണ്ടെന്ന് ബന്ധുക്കളും അയൽക്കാരും പറയുന്നു. കൊലപാതകം നടത്തിയ ശേഷം ഇവർ കുട്ടിയേയും കൊണ്ട് വീടുവിട്ടുപോയി.
പുലർച്ചെ നടന്ന സംഭവം ഏറെ വൈകിയാണ് നാട്ടുകാർ അറിയുന്നത്. രാവിലെ വീട് പൂട്ടിക്കിടക്കുന്നത് കണ്ട അയൽവാസികൾ സംശയം തോന്നിയാണ് അകത്ത് പ്രവേശിച്ച് പരിശോധിച്ചത്. തുടർന്നാണ് രക്തത്തിൽ കുളിച്ച് കിടക്കുന്ന സിജിയെ കണ്ടത്. കോട്ടയം ഈസ്റ്റ് പൊലീസ് സ്ഥലത്തെത്തി ഇൻക്വസ്റ്റ് നടപടികൾ ഉൾപ്പെടെ പൂർത്തിയാക്കി. വീടുവിട്ടുപോയ റോസന്നയെ കണ്ടെത്താനുള്ള ശ്രമവും ആരംഭിച്ചിട്ടുണ്ട്.
മാനസിക പ്രശ്നങ്ങളുള്ള റോസന്നയ്ക്ക് ഒപ്പം കുട്ടിയുള്ളത് ആശങ്കയ്ക്കിടയാക്കിയിട്ടുണ്ട്. അതുകൊണ്ടുതന്നെ എത്രയുംവേഗം റോസന്നയെ കണ്ടെത്താനാണ് പൊലീസ് അന്വേഷണം നടത്തുന്നത്. മൃതദേഹം പോസ്റ്റ്മോർട്ടം നടപടികൾക്കായി ആശുപത്രിയിലേക്ക് മാറ്റും.
