വിമ്പിൾഡൺ: ജോക്കോവിച്ച് മൂന്നാം റൗണ്ടിൽ; അഞ്ച് സെറ്റ് ത്രില്ലർ അതിജീവിച്ച് കിർഗിയോസ്; ഫെഡറർ രണ്ടാം റൗണ്ടിൽ; പരിക്കിനെത്തുടർന്ന് സെറിന വിംബിൾഡണിൽ നിന്ന് പിന്മാറി
വിമ്പിൾഡൺ: ജോക്കോവിച്ച് മൂന്നാം റൗണ്ടിൽ; അഞ്ച് സെറ്റ് ത്രില്ലർ അതിജീവിച്ച് കിർഗിയോസ്; ഫെഡറർ രണ്ടാം റൗണ്ടിൽ; പരിക്കിനെത്തുടർന്ന് സെറിന വിംബിൾഡണിൽ നിന്ന് പിന്മാറി
ലണ്ടൻ: ലോക ഒന്നാം നമ്പർ താരവും നിലവിലെ ജേതാവുമായി നൊവാക് ജോക്കോവിച്ച് വിമ്പിൾഡമ് ടെന്നീസ് പുരുഷ വിഭാഗം സിംഗിൾസ് മൂന്നാം റൗണ്ടിലെത്തി. ദക്ഷിണാഫ്രിക്കയുടെ കെവിൻ ആൻഡേഴ്‌സണെ നേരിട്ടുള്ള സെറ്റുകളിൽ മറികടന്നാണ് ജോക്കോയുടെ മുന്നേറ്റം. സ്‌കോർ 6-3, 6-3, 6-3.
മൂന്ന് സെറ്റിലും ആൻഡേഴ്‌സന്റെ ഓരോ ഗെയിം വീതം ബ്രേക്ക് ചെയ്ത ജോക്കോ ഒന്നേകാൽ മണിക്കൂറിൽ മത്സരം സ്വന്തമാക്കി. വിമ്പിൾഡണിൽ ആറാമത്തെയും തുടർച്ചയായ മൂന്നാമത്തെയും കിരീടം തേടിയാണ് ജോക്കോവിച്ച് ഇത്തവണ പൊരുതുന്നത്.
പുരുഷ വിഭാഗം സിംഗിൾസിലെ മറ്റൊരു മത്സരത്തിൽ നിക്ക് കിർഗിയോസ് അഞ്ച് സെറ്റ് പോരാട്ടത്തിൽ യുഗോ ഹംബർട്ടിനെ മറികടന്നു. സ്‌കോർ. 6-4 4-6 3-6 6-1 9-7. വിമ്പിൾഡണിൽ ഒമ്പതാം കിരീടം തേടയിറങ്ങുന്ന റോജർ ഫെഡറർ രണ്ടാം റൗണ്ട് പോരാട്ടത്തിൽ റിച്ചാർഡ് ഗസ്സ്‌കറ്റിനെയാണ് നേരിടുക. ആദ്യ റൗണ്ടിൽ മന്നാരിന്നോയുടെ കടുത്ത പോരാട്ടത്തെ അതിജീവിച്ചാണ് ഫെഡറർ രണ്ടാം റൗണ്ടിലെത്തിയത്. രണ്ട് സെറ്റ് നഷ്ടമാക്കി രണ്ട് സെറ്റ് നേടിയ ഫെഡറർക്കെതിരെ പരിക്കുമൂലം അവസാന സെറ്റ് കളിക്കാതെ മന്നാരിന്നോ പിന്മാറുകയായിരുന്നു.
അതേസമയം യു എസ് താരം സെറിന വില്യംസ് പരിക്കിനെ തുടർന്ന് വിംബിൾഡണിൽ നിന്ന് പിന്മാറി. ഏഴ് തവണ വിംബിൾഡൺ നേടിയിട്ടുള്ള സെറിന ആദ്യ റൗണ്ട് പൂർത്തിയാക്കാതെയാണ് മടങ്ങുന്നത്. ബലാറസിന്റെ അലക്സാണ്ട്ര സാസ്നോവിച്ചുമായുള്ള മത്സരത്തിനിടെയാണ് സെറിനയുടെ കാലിന് പരിക്കേൽക്കുന്നത്. ആദ്യ സെറ്റിൽ സ്‌കോർ 3-3ൽ നിൽക്കുമ്പോഴായിരുന്നു 39 കാരിയുടെ പിന്മാറ്റം.
എട്ടാം കിരീടം ലക്ഷ്യമിട്ടാണ് സെറിന വിംബിൾഡണിനെത്തിയത്. 24 ഗ്രാൻഡ് സ്ലാം നേടിയിട്ടുള്ള മാർഗരറ്റ് കോർട്ടിന്റെ നേട്ടത്തിനൊപ്പമെത്താനും സെറിന കൊതിച്ചു. എന്നാൽ കണ്ണീരോടെ മടങ്ങാനായിരുന്നു. സാസ്നോവിച്ചിനെതിരെ ഒരു ബാക്ക്ഹാൻഡ് കളിച്ച ശേഷം കാലിലെ വേദനകൊണ്ട് കോർട്ടിൽ ഇരിക്കുകയായിരുന്നു താരം. പിന്നീട് കരഞ്ഞുകൊണ്ട് ടൂർണമെന്റിനോട് വിട വാങ്ങി.
സെറിനയുടെ സഹോദരി വീനസ് വില്യംസ് രണ്ടാം റൗണ്ടിൽ പ്രവേശിച്ചു. റൊമാനിയയുടെ മിഹെയ്ല ബുസർനെസ്‌കുവിനെ ഒന്നിനെതിരെ രണ്ട് സെറ്റുകൾക്കാണ് വീനസ് തോൽപ്പിച്ചത്. സ്‌കോർ 5-7, 6-4, 3-6. ഗ്രീസിന്റെ മരിയ സക്കറി 6-1, 6-1ന് ഡച്ച് താരം റസിനെ തകർത്ത് രണ്ടാം റൗണ്ടിലെത്തി.
വനിതകളിലെ ഒന്നാം സീഡ് അഷ്ലി ബാർട്ടി 6-1 6-7 6-1ന് സ്പാനിഷ് താരം സുവാരസ് നവാരോയെ തോൽപ്പിച്ചു. 2018ലെ ചാംപ്യൻ ആംഗ്വലിക് കെർബറും രണ്ടാം റൗണ്ടിലെത്തി. സെർബിയയുടെ നിന സ്റ്റൊജാനോവിച്ചിനെ നേരിട്ടുള്ള സെറ്റുകൾക്കാണ് ജർമൻ താരം തോൽപ്പിച്ചത്. സ്‌കോർ 6-4 6-3.
