കൊച്ചി: ചലച്ചിത്ര മേഖലയിൽ പുതുതായി രൂപീകരിച്ച വുമൻ കളക്ടീവ് ഇൻ സിനിമ എന്ന സ്ത്രീ കൂട്ടായ്മയ്ക്ക് ഔദ്യോഗിക അംഗീകാരം. മഞ്ജു വാര്യർ, ബീനാ പോൾ, പാർവതി, വിധു വിൻസെന്റ്, റിമാ കല്ലിങ്കൽ, സജിതാ മഠത്തിൽ എന്നിവരുടെ നേതൃത്വത്തിലാണ് സംഘടന.ചലച്ചിത്ര മേഖലയിലുള്ള സ്ത്രീകളുടെ പ്രശ്നങ്ങൾ അടുത്തറിയുന്നതിനും ചർച്ച ചെയ്യുന്നതിനുമായാണ് സംഘടന.

പത്മപ്രിയയാണ് ട്വിറ്ററിലൂടെ അംഗീകാരത്തിന്റെ കാര്യം അറിയിച്ചത്. 'വുമൻ ഇൻ കലക്ടീവിന് ജന്മദിനാശംസകൾ. ഇനി ഇവിടെ തന്നെ തുടരും. ഇത് എനിക്കും മലയാളസിനിമയിലെ സ്ത്രീകൾക്കും പ്രധാനപ്പെട്ടതാണ്.പത്മപ്രിയ പറയുന്നു. മലയാളത്തിലെ പ്രമുഖ നടിക്കുനേരെ ആക്രമണമുണ്ടായ പശ്ചാത്തലത്തിൽ ഈ രംഗത്ത് പ്രവർത്തിക്കുന്ന സ്ത്രീകളുടെ സുരക്ഷ ഉറപ്പുവരുത്തുക എന്ന ലക്ഷ്യത്തോടെയാണ് ഇങ്ങനെയൊരു ആശയവുമായി നടിമാരും സംവിധായകരും ഉൾപ്പെടുന്ന വനിതകൾ രംഗത്തെത്തിയത്.

നിലവിൽ ചലച്ചിത്ര മേഖലയിലുള്ള വിവിധ സംഘടനകളിലെ വനിതകൾക്ക് ഈ സംഘടനയുടെ ഭാഗമാകാം. അമ്മ, ഫെഫ്കാ എന്നീ സംഘടനകൾക്ക് ബദൽ അല്ല ഈ സംഘടനയെന്നും സ്ത്രീ പ്രശ്നങ്ങൾക്ക് പ്രാഥമിക പരിഗണന എന്ന ലക്ഷ്യത്തിലൂന്നിയാവും ഇതെന്നും സംഘടനാ നേതൃത്വം വ്യക്തമാക്കുന്നു.