ഹൂസ്റ്റൺ: പിയർലാന്റ് സെന്റ് മേരീസ് സീറോ മലബാർ കത്തോലിക്കാ ദേവാലയത്തിന്റെ നിർമ്മാണ ധനശേഖരണാർഥം വാർഷിക ഇടവക കൂട്ടായ്മയും 'വണേ്ടഴ്‌സ് ഓഫ് വിന്റർ' കലാപരിപാടികളും സംഘടിപ്പിച്ചു.

ജനുവരി ഒമ്പതിന് വൈകുന്നേരം ദേവാലയങ്കണത്തിൽ നടന്ന പരിപാടികൾ ദിയ ഫിലിപ്പിന്റേയും ദിയ ജേക്കബിന്റെയും പ്രാർത്ഥന നൃത്തത്തോടെ തുടക്കം കുറിച്ചു.

അസിസ്റ്റന്റ് വികാരി ഫാ. വിൽസൺ ആന്റണി 'വണേ്ടഴ്‌സ് ഓഫ് വിന്റർ' ഉദ്ഘാടനം ചെയ്തു. സീറോ മലബാർ കാത്തലിക് കോൺഗ്രസ് ദേശീയ പ്രസിഡന്റ് ബോസ് കുര്യൻ വിശിഷ്ടാതിഥിയായിരുന്നു. മുഖ്യ പ്രഭാഷണത്തിൽ എസ്എംസിസി നാഷണൽ കമ്മിറ്റിയിലേക്കു തെരഞ്ഞെടുക്കപ്പെട്ട സോണി ഫിലിപ്പിനെ അദ്ദേഹം അനുമോദിച്ചു. ചടങ്ങിൽ ട്രസ്റ്റി ജിമ്മി കുമ്പാട്ട്, പ്രോഗ്രാം കമ്മിറ്റിയംഗങ്ങളായ സന്തോഷ് ഐപ്പ്, ജോഷി വർഗീസ്, ജോമോൻ ജേക്കബ്, നവീൻ ജോസഫ് എന്നിവർ സന്നിഹിതരായിരുന്നു. ട്രസ്റ്റി ജേക്കബ് തോമസ് സ്വാഗതം ആശംസിച്ചു. ട്രസ്റ്റിമാരായ ടെന്നിസൺ മാത്യു, സിബി ജേക്കബ് എന്നിവർ റാഫിൾ ടിക്കറ്റ് വിജയികളെ തെരഞ്ഞെടുത്തു.

തുടർന്നു ഇവന്റ് മാനേജർ സോണി ഫിലിപ്പിന്റെ നേതൃത്വത്തിൽ മൂന്നു മണിക്കൂർ നീണ്ട വണേ്ടഴ്‌സ് ഓഫ് വിന്ററിൽ ഷാരോൻ സിബിയുടെ ഏകാംഗാഭിനയം, യുവജനങ്ങളുടെയും മുതിർന്നവരുടേയും വിവിധ കലാപരിപാടികൾ, നൃത്തനിർത്യങ്ങൾ തുടങ്ങിയവ അരങ്ങേറി. ആഷിൻ ജോസഫ് ദൃശ്യങ്ങൾ ചിത്രീകരിച്ചു.

സോണി ഫിലിപ്പ് സംവിധാനം ചെയ്ത 'യുദീത' എന്ന ബൈബിൾ നാടകത്തിൽ ജോമോൻ ജേക്കബ്, ഷാജു വർഗീസ്, സന്തോഷ് ഐപ്പ്, ജെസീന ടോം, അലൻ, എറിക്, ഓസ്റ്റിൻ തുടങ്ങിയവർ കേന്ദ്രകഥാപാത്രങ്ങളായി വേഷമിട്ടു. ലോകരക്ഷകനെ ചുംബനം കൊണ്ട് ഒറ്റിക്കൊടുത്ത് ഒരുമുഴം കയറിൽതൂങ്ങി മരിക്കുമ്പോൾ ലോകമറിയാതെ പോയ യൂദാസിന്റെ പ്രണയിനി, യൂദിതയുടെ വിരഹ ദുഃഖം ഭാവനയുടെ അതിർവരമ്പിൽ നിന്നുകൊണ്ട് അനാവരണം ചെയ്യുന്നതായിരുന്നു നാടകത്തിന്റെ പ്രമേയം.

അശോകും ഇന്ദിരയും കാര്യപരിപാടികൾ നിയന്ത്രിച്ചു. അത്താഴവിരുന്നിനുശേഷം സോണി ഫിലിപ്പിന്റെ നന്ദിപ്രസംഗത്തോടെ വാർഷിക ഇടവക കൂട്ടായമയ്ക്ക് പര്യവസാനമായി.