ന്യൂജേഴ്‌സി: ക്രിയാത്മകവും സാമൂഹിക പ്രതിബദ്ധത നിറഞ്ഞതുമായ പ്രവർത്തനങ്ങൾകൊണ്ട് അന്തർദേശീയ ശ്രദ്ധ പടിച്ചുപറ്റിയ വേൾഡ് മലയാളി കൗൺസിൽ ന്യൂജേഴ്‌സി പ്രോവിൻസ് 2015 മെയ് 18-ന് മറ്റൊരു ചരിത്രപരമായ നീക്കത്തിനു തുടക്കമിട്ടു. ഒരേ ആശയത്തോടെ വ്യത്യസ്തമായ വഴികളിൽ സഞ്ചരിച്ചിരുന്ന വേൾഡ് മലയാളി കൗൺസിലിന്റെ രണ്ടു ഘടകങ്ങൾ എല്ലാ ഭിന്നതകളും മറന്ന് പ്രവാസി മലയാളി സമൂഹത്തിനുവേണ്ടി ഐക്യബോധത്തോടെ ഒരുമിച്ച് നിന്ന് പ്രവർത്തിക്കാൻ തീരുമാനിച്ചു.

എഡിസണിൽ കൂടിയ യോഗത്തിൽ രണ്ട് ഘടകങ്ങളുടേയും പ്രവർത്തകർ സന്നിഹിതരായിരുന്നു. വ്യക്തിതാത്പര്യങ്ങൾക്ക് ഉപരിയായി ചിന്തിച്ച പ്രവർത്തകർ ഊഷ്മളമായ അന്തരീക്ഷത്തിൽ തങ്കമണി അരവിന്ദൻ, വേൾഡ് മലയാളി കൗൺസിലിന്റെ പ്രവർത്തകർ ഒരുമിച്ചു നിൽക്കേണ്ടതിന്റെ ആവശ്യകതയെപ്പറ്റി ബോധ്യപ്പെടുത്തിക്കൊണ്ട്, ആ സ്വപ്നം സാക്ഷാത്കരിക്കുന്നതിനുള്ള ആഹ്വാനം കരഘോഷത്തോടെ എല്ലാ പ്രവർത്തകരും സ്വാഗതം ചെയ്തപ്പോൾ അത് മലയാളി സംഘടനകളുടെ ചരിത്രത്തിലെ നാഴികക്കല്ലായി.

ഇത്തരമൊരു കൂടിച്ചേരലിന് വളരെകാലമായി ആഗ്രഹിച്ചിരുന്നുവെന്ന് ജോൺ വർഗീസ് പറഞ്ഞതിനെ എല്ലാവരും പിന്തുണച്ചു. മലയാളി സമൂഹത്തിന്റെ ഉത്ഥാനത്തിനുവേണ്ടി പ്രവർത്തിക്കാൻ ഇത്തരം ഐക്യത്തോടെയുള്ള പ്രവർത്തനം കാലത്തിന്റെ അനിവാര്യതയാണെന്നും, മറ്റ് സംഘടനകൾക്ക് ഇതൊരു മാതൃകയാകണമെന്നും പറഞ്ഞ തോമസ് മൊട്ടയ്ക്കൽ ഇത് യാഥാർത്ഥ്യമാക്കുയ എല്ലാവരേയും അഭിനന്ദിച്ചു.

വേൾഡ് മലയാളി കൗൺസിലിന്റെ മുന്നോട്ടു എല്ലാ പ്രവർത്തനങ്ങൾക്കും പൂർണ്ണ പിന്തുണ പ്രഖ്യാപിച്ച ആൻഡ്രൂ പാപ്പച്ചൻ ഇതിനുവേണ്ടി മുന്നോട്ടുവന്ന എല്ലാവരേയും അഭിനന്ദിച്ചു.  ആഗോളതലത്തിൽ ഏകോപനത്തിന്റെ പാതയിലേക്ക് നീങ്ങുന്ന വേൾഡ് മലയാളി കൗൺസിലിന്റെ തീരുമാനം ന്യൂജേഴ്‌സി പ്രോവിൻസിൽ തന്നെ ആരംഭം കുറിച്ചതിൽ അതിയായ സന്തോഷമുണ്ടെന്ന് അലക്‌സ് കോശി പറഞ്ഞു.

രണ്ടു ഘടകങ്ങളും മുമ്പേ പ്രഖ്യാപിച്ചിരുന്ന തീയതികളിൽ പരസ്പര സഹകരണത്തോടെ ഇരുപതാം വാർഷികാഘോഷങ്ങൾ മികവുറ്റതാക്കാൻ തീരുമാനിച്ചു. പരിപാടികളുടെ നടത്തിപ്പിലേക്ക് രണ്ടു സംഘടനകളേയും സംയോജിപ്പിച്ച് സുധീർ നമ്പ്യാരുടെ നേതൃത്വത്തിൽ ഒരു പ്രോഗ്രാം കമ്മിറ്റിയെ ചുമതലപ്പെടുത്തി. ജൂൺ ആറാം തീയതി എഡിസൺ ഹോട്ടലിൽ വച്ച് .യൂത്ത് എംപവർമെന്റ് സെമിനാറിനെ തുടർന്ന് ഫാമിലി നൈറ്റും നടത്തുന്നതാണെന്ന് അനിൽ പുത്തൻചിറ അറിയിച്ചു. ജൂൺ 20-ന് എഡിസൺ റിനയറസൻസ് ഹോട്ടലിൽ വച്ച് നടത്തുന്ന വാർഷികാഘോഷങ്ങളിൽ വിവിധ മേഖലകളിൽ പ്രാഗത്ഭ്യം തെളിയിച്ച വ്യക്തികൾക്ക് വേൾഡ് മലയാളി കൗൺസിൽ എക്‌സലൻസ് അവാർഡുകൾ സമ്മാനിക്കും. തുടർന്ന് പ്രവാസി സമൂഹത്തിലെ കലാകാര•ാരുടെ വിവിധ കലാപരിപാടികൾ അരങ്ങേറും.

വേൾഡ് മലയാളി കൗൺസിലിന്റെ യൂത്ത് വിംഗിന്റെ നേതൃത്വത്തിലുള്ള ചാരിറ്റി പ്രവർത്തനങ്ങളുടെ ഭാഗമായി സമാഹരിച്ച വിവിധ വസ്തുക്കൾ രണ്ടു ഘടകങ്ങളുടെ പ്രവർത്തകരുടേയും സാന്നധ്യത്തിൽ മോണ്ട് ക്ലയർ റിയൽഹൗസ് ഇൻകിന് കൈമാറുമെന്ന് കോർഡിനേറ്റർ പിന്റോ ചാക്കോ അറിയിച്ചു. തികച്ചും ഊർജ്ജസ്വലമായ ഈ കൂട്ടായ്മയിൽ മാറ്റത്തിനു തിരിതെളിയിച്ച് തലമുറകളുടെ സംയോജനമായ ഐക്യദാർഢ്യ മീറ്റിംഗിൽ പങ്കെടുത്ത എല്ലാവർക്കും സുധീർ നമ്പ്യാർ നന്ദി പറഞ്ഞു.

ഏകോപന സമ്മേളനത്തിൽ തങ്കമണി അരവിന്ദൻ, അനിൽ പുത്തൻചിറ, തോമസ് മൊട്ടയ്ക്കൽ, സോമൻ ജോൺ, സുധീർ നമ്പ്യാർ, ആൻഡ്രൂ പാപ്പച്ചൻ, അലക്‌സ് കോശി, പിന്റോ ചാക്കോ, സോമൻ ജോൺ തോമസ്, ജോൺ വർഗീസ്,  രാജു, ഫിലിപ്പ് മാരേട്ട്, ജോൺ സഖറിയ, സണ്ണി മാത്യൂസ്, രുക്മിണി, രാജശ്രീ പിന്റോ എന്നിവർ പങ്കെടുത്തു.

വേൾഡ് മലയാളി കൗൺസിലിന്റെ ഐക്യപ്രഖ്യാപനം സ്വാഗതാർഹമാണെന്നും അതിനു പിന്നിൽ പ്രവർത്തിച്ച എല്ലാവരേയും അഭിനന്ദിക്കുന്നതോടൊപ്പം, എല്ലാ പ്രവർത്തനങ്ങൾക്കും ആശംസകൾ നേരുന്നുവെന്നും കെ.സി.സി.എൻ.എയ്ക്കുവേണ്ടി ചെയർമാൻ ദിലീപ് വർഗീസ് പത്രക്കുറിച്ചിൽ അറിയിച്ചു. രാജശ്രീ പിന്റോ അറിയിച്ചതാണിത്.